គ្រូ Man United រកឃើញគ្រាប់ពេជ្រថ្មីម្នាក់ទៀត ក្រោយ​ស្មើ Arsenal យប់​មិញ

អ្នកចាត់ការរបស់ Manchester United លោក Ruben Amorim បានចាត់ទុកខ្សែការពារវ័យ ១៨ ឆ្នាំ Ayden Heaven ជាគ្រាប់ពេជ្រថ្មីរបស់ក្រុម បន្ទាប់ពីរូបគេបង្ហាញសមត្ថភាពបានយ៉ាងល្អ នៅក្នុងការប្រកួត ដែលក្រុមបិសាចក្រហមស្មើគ្នាក្នុងលទ្ធផល ១-១ ទល់នឹង Arsenal កាលពីយប់ថ្ងៃ អាទិត្យ ទី ៩ ម្សិលមិញ ។

ការផ្លាស់ប្តូរចូលជំនួស Leny Yoro នៅនាទីទី ៤៦ យប់មិញ គឺជាការបង្ហាញខ្លួនលើកដំបូងរបស់ Ayden Heaven នៅក្នុងក្របខណ្ឌ Premier League ប៉ុន្តែអ្វីដែលគួរឱ្យភ្ញាក់ផ្អើល ខ្សែការពារសញ្ជាតិ អង់គ្លេស រូបនេះពិតជាបង្ហាញសមត្ថភាពល្អមែនទែន រហូតធ្វើឱ្យលោក Amorim កោតសរសើរគេមិនដាច់ពីមាត់។

បន្ទាប់ពីបញ្ចប់ការប្រកួតភ្លាម អ្នកចាត់ការសញ្ជាតិ ព័រទុយហ្គាល់ វ័យ ៣៩ ឆ្នាំបានលើកឡើងពី Ayden Heaven ថា ៖«ចាំឈ្មោះរបស់គេទុក គឺ Ayden Heaven… ពួកយើងបានរកឃើញកីឡាករម្នាក់ ដែលជាកីឡាករដ៏សក្តិសមពិតប្រាកដ នៅទីនេះ។ គាត់គឺស្ងប់ស្ងាត់ និងមានទំនុកចិត្ត។ គាត់ល្អខ្លាំងណាស់»។

គួរបញ្ជាក់ថា Ayden Heaven ជាអតីតថ្នាលយុវជនរបស់ Arsenal ហើយគាត់បានផ្លាស់មកកាន់ទឹកដី Old Trafford កាលពីទីផ្សារដោះដូរកីឡាករខែ មករា កន្លងទៅ ដោយបានចុះកុងត្រាដល់ខែ មិថុនា ឆ្នាំ ២០២៩៕

ប្រែ​សម្រួល៖ សេម កុសល
ប្រភព៖ Fabrizio Romano