ចរាចរណ៍

រថយន្តឡិចស៊ិស GS300 បើកបុករបាំងថ្មលើស្ពានអាកាសស្ទឹងមានជ័យ ក្រឡាប់ផ្ងារជើង

បានផុស

៣ years មុន

នៅ

ថ្ងៃសៅរ៍ ១៥ មករា ២០២២

ដោយ

រថយន្តឡិចស៊ិស GS300 មួយគ្រឿងបើកបរដោយបុរសម្នាក់ក្នុងល្បឿនលឿន បានជ្រុលរេចង្កូតទៅបុកនឹងរបាំងថ្មពុះចែកទ្រូងផ្លូវនៅចំណុចកណ្តាលស្ពានពេញទំហឹង បណ្តាលអោយរថយន្តត្រូវក្រឡាប់រងការខូចខាត នៅចំណុចស្ពានអាកាសស្ទឹងមានជ័យ ស្ថិតក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ បង្កអោយមានការភ្ញាក់ផ្អើលកាលពីវេលាម៉ោង២៣និង៣០នាទីយប់ថ្ងៃទី១៤ ខែមករា ឆ្នាំ២០២២ ។ រថយន្តបង្កម៉ាក GS300 ពណ៌ស ពាក់ស្លាកលេខ គ្មានស្លាកលេខ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានអោយដឹងថា នៅមុនកើតហេតុ គេឃើញរថយន្តបង្កបើកបរដោយបុរសម្នាក់ តាមបណ្តោយផ្លូវលេខ២៧១ ក្នុងទិសដៅពីត្បូងទៅជើង ពោលគឺបើកសំដៅឡើងស្ពានអាកាសស្ទឹងមានជ័យ ។ ខណៈបើកឡើងដល់ចំណុចកើតហេតុ រថយន្តបង្កក៏ជ្រុលរេចង្កូតទៅខាងឆ្វេងដៃ បុកនឹងរបាំងថ្មពុះចែកទ្រូងផ្លូវកណ្តាលស្ពាន បណ្តាលអោយរបាំងថ្មចំនួន០៣ផ្ទាំង ត្រូវរងការខូចខាត ហើយរថយន្តបង្កត្រូវក្រឡាប់ផ្ញារជើងច្រងាងនៅចំណុចកើតហេតុ បណ្តាលអោយបុរសជាអ្នកបើកបររថយន្តត្រូវកៀបជាប់ក្នុងរថយន្តរងរបួស ។

ភ្លាមៗ បន្ទាប់ពីកើតហេតុ ក្រុមរថយន្តសង្គ្រោះបានដល់ទីតាំងខាងលើ និងបានជួយសង្គ្រោះជនរងគ្រោះ ដឹកតាមរថយន្តយកទៅសង្គ្រោះនៅមន្ទីរពេទ្យឯកជនមួយ ។ ដោយឡែក ចំណុចទីតាំងកើតហេតុ សមត្ថកិច្ចមូលដ្ឋានរួមទាំងនគរបាលជំនាញ បានចុះអន្តរាគមន៍វាស់វែង អូសយករថយន្តបង្ក ទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រងចាំដោះស្រាយទៅតាមនីតិវិធីច្បាប់នៅពេលក្រោយ ៕

អត្ថបទ៖ លីហេង