រថយន្តម៉ាកKIA បុករះរថយន្ដ ម៉ូតូ និងបង្គោលភ្លើងរបួសធ្ងន់ស្រាលពីរនាក់

បុរសម្នាក់រួមដំណើរជាមួយបុរសម្នាក់ទៀតបើករថយន្តក្នុងល្បឿនលឿនរេចង្កូតបុករថយន្តកុងតឺន័រពីក្រោយហើយបន្តទៅបុកម៉ូតូវីវ៉ាមួយគ្រឿង និងបន្តទៅបុកបង្គោលភ្លើងមួយដើមទៀតរងការខូចខាតយ៉ាងដំណំ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ ថ្ងៃទី១៧ ខែមីនា ឆ្នាំ២០២២ នៅចំណុចមុខធនាគារABA តាមបណ្តោយផ្លូវចោមចៅ ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ  ។

តាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តម៉ាកKIA ពណ៌ទឹកប្រាក់ ពាក់ស្លាកលេខភ្នំពេញ2AG 9574 បើកបរដោយបុរសម្នាក់រួមដំណើរ​ជាមួយបុរស​ម្នាក់​ទៀតធ្វើដំណើរតាមបណ្តោយផ្លូវចោមចៅក្នុងល្បឿនលឿន ខណៈមកដល់ចំណុចកើតហេតុស្រាប់តែបុករថយន្តកុងតឺន័រពីក្រោយ និងបានរេចង្កូតមកខាងស្តាំងដៃបុកម៉ូតូវីវ៉ាពណ៌ខ្មៅពាក់ស្លាកលេខភ្នំពេញ1AY 2480 ដែលកំពុងឈប់នៅចិញ្ចើមផ្លូវបណ្តាលឱ្យរងការខូចខាតយ៉ាងដំណំ  ហើយរថយន្តបង្កនៅមិនទាន់អស់ល្បឿនបន្តទៅបុកបង្គោលភ្លើងថ្មមួយដើមបាក់ជាពីរកំណាត់ ឯរថយន្តខ្ទេចផ្នែកខាងមុខទាំងស្រុង និងបណ្ដាលឱ្យអ្នក​បើក​បរ​រងរបួស​ធ្ងន់​ចំណែកអ្នករួមដំណើររងរបួសស្រាល។ បន្ទាប់មករថយន្តសង្គ្រោះបន្ទាន់មកដឹកជនរងគ្រោះទៅសង្គ្រោះនៅឯមន្ទីរពេទ្យភ្លាមៗ។

ក្រោយកើតហេតុសមត្ថកិច្ចមូលដ្ឋានបានចុះដល់បានទំនាក់ទំនងត្រូវសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយគ្នាតាមផ្លូវច្បាប់៕

អត្ថបទ៖ សុខា