បុករបាំងថ្មពុះចែកទ្រូងផ្លូវហើយព្យាយាមបើករត់ រហូតដាច់កង់ទៅមុខលែងរួច

បុរសជនជាតិបរទេសម្នាក់បើករថយន្តម៉ាកឡិចសុីស RX300 មួយគ្រឿងជ្រុលទៅបុករបាំងថ្មពុះចែកទ្រូងផ្លូវពេញទំហឹងបណ្ដាលឲ្យបាក់អស់មួយកង់ កាលពីវេលាម៉ោង១១និង៤០នាទីយប់ថ្ងៃទី១៣ ខែកញ្ញា ឆ្នាំ២០២២ នៅចំណុចមុខមន្ទីរពេទ្យ វិសា សុខ តាមបណ្ដោយផ្លូវព្រះមុន្នីរ៉េត ស្ថិតក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ ហើយព្យា​យាម​បើករត់រហូតមកដល់ចំណុចក្បែរស្តុបសំណង់១២ តាមបណ្ដោយផ្លូវ១៨២ ស្ថិតក្នុងសង្កាត់ទឹកល្អកទី២ ខណ្ឌ ទួលគោក ទើបរថយន្តដាច់កាឡេកង់ទៅមុខលែងរួច។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសជនជាតិបរទេសម្នាក់បើករថយន្ត​ឡិចសុីស RX 300 មួយគ្រឿងពណ៌ស ពាក់ស្លាកលេខភ្នំពេញ2S-5315 ធ្វើដំណើរតាមបណ្តោយផ្លូវព្រះមុន្នីរ៉េត ទិសដៅពីកើត លុះមកដល់ចំណុចកើតហេតុខាងលើបានជ្រុលទៅបុករបាំងថ្មពុះចែកទ្រង់ផ្លូវពេញទំហឹងបណ្ដាលឲ្យរបាំងថ្មបាក់អស់មួយកង់ ចំណែករថយន្តបង្កបានព្យាយាមបើករត់រហូតមកដល់ចំណុចក្បែរស្តុបសំណង់១២ ទើបរថយន្តដាច់កាឡេកង់ទៅមុខខាងឆ្វេងទៅមុខលែងរួច។

ក្រោយមកប្រជាពលរដ្ឋក៏បានរាយការណ៍ជូនសមត្ថកិច្ចមូលដ្ឋានបានចុះមកដល់ធ្វើការឃាត់រថយន្តភ្លាមៗរួចទំនាក់ទំនងទៅខាងសមត្ថកិច្ចជំនាញចុះមកធ្វើការវាស់វែងយករថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយគ្នាការផ្លូវច្បាប់៕

អត្ថបទ៖ សុខា