ចរាចរណ៍

ជិះម៉ូតូបញ្ច្រាសទិសដៅចរាចរណ៍ ត្រូវរថយន្តបុកស្លាប់ភ្លាមៗ

បានផុស

២ years មុន

នៅ

ថ្ងៃពុធ ១៦ តុលា ២០២៤

ដោយ

បុរសម្នាក់ ជិះម៉ូតូបញ្ច្រាសទិសដៅចរាចរណ៍បត់ឆ្លងផ្លូវមិនប្រយ័ត្ន ត្រូវបានរថយន្តកូរ៉េបើកលឿនជ្រុលបុកអូសជាង ១០ ម៉ែត្រ បណ្តាលឱ្យស្លាប់ភ្លាមៗ នៅនឹងកន្លែងកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៥ ល្ងាច ថ្ងៃទី ១៥ ខែតុលា ឆ្នាំ ២០២៤ នៅផ្លូវជាតិលេខ ៣ ភូមិព្រៃព្រីងត្បូង ១ សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះឈ្មោះ កុង ស៊ុន ភេទប្រុស អាយុ ៣០ ឆ្នាំ ជាជាងជួសជុលទូរស័ព្ទនៅផ្សារចោមចៅ ស្នាក់នៅភូមិព្រៃកី ខ សង្កាត់ពងទឹក ខណ្ឌដង្កោ។

តាមប្រភពព័ត៌មានបានឱ្យដឹងថា មុនពេលកើតហេតុគេបានឃើញជនរងគ្រោះជិះម៉ូតូម៉ាកហុងដា ពណ៌ខ្មៅ ពាក់ស្លាកលេខកំពង់ស្ពឺ 1 M 9818 ធ្វើដំណើរចេញពីផ្សារចោមចៅទីកន្លែងលក់ និងជួសជុលទូរស័ព្ទ តាមបណ្ដោយផ្លូវជាតិលេខ ៣ ទិសដៅពីជើងទៅត្បូងបំណងទៅផ្ទះនៅសង្កាត់ពងទឹក ដោយបញ្ច្រាសទិសដៅចរាចរណ៍ ខណៈមកដល់ចំណុចកើតហេតុ ក៏ឆ្លងផ្លូវពីកើតទៅលិចចូលគន្លងខាងស្ដាំវិញ ភ្លាមៗនោះ ស្រាប់តែមានរថយន្តកូរ៉េ ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខភ្នំពេញ 2BJ 0248 ធ្វើដំណើរពីត្បូងទៅជើងជ្រុលបុកពេញទំហឹងអូសជាង ១០ ម៉ែត្រ បណ្តាលឱ្យជនរងគ្រោះបាក់.ក ស្លាប់ភ្លាមៗ។

ក្រោយកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុ និងទាក់ទងជំនាញមកធ្វើការវាស់វែងយករថយន្ត និងម៉ូតូ ទៅរក្សាទុកនៅស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយពេលក្រោយ។ ចំណែកសពជនរងគ្រោះ ត្រូវបានប្រគល់ជូនក្រុមគ្រួសារមកទទួលយកទៅធ្វើបុណ្យតាមប្រពៃណីនៅស្រុកកំណើត៕

អត្ថបទ ៖ សុខា