ព័ត៌មានជាតិ

អភិបាលខណ្ឌឫស្សីកែវ ចុះពិនិត្យកាយស្ដារប្រព័ន្ធលូបង្ហូរទឹកកកស្ទះ ត្រង់ចំណុចជិត វិទ្យាល័យ ជាស៊ីម ចំរើនរដ្ឋ

បានផុស

៨ ខែ មុន

នៅ

ថ្ងៃអង្គារ ២១ តុលា ២០២៥

ដោយ

លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំក្រុមការងាររដ្ឋបាលខណ្ឌ ចុះត្រួតពិនិត្យស្ថានភាពប្រព័ន្ធលូបង្ហូរទឹក ត្រង់ចំណុចជិត វិទ្យាល័យ ជាស៊ីម ចំរើនរដ្ឋ ស្ថិតនៅសង្កាត់ស្វាយប៉ាក ខណ្ឌឫស្សីកែវ ក្រោយទទួលបានព័ត៌មានថា ទឹកហូរយឺត ស្ទះដោយសារភក់ជ្រាំ និងសំរាមកាកសំណល់ កាលពីរសៀលថ្ងៃទី ២០ ខែតុលា ឆ្នាំ ២០២៥ ម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសចុះត្រួតពិនិត្យនោះ លោក ជិន ប៊ុនធឿន បានបញ្ជាឲ្យក្រុមការងារខណ្ឌ និងសង្កាត់ ដាក់គ្រឿងចក្រកាយស្តារ ដើម្បីបំបាត់ការកកស្ទះ និងធានាទឹកអាចហូរបានលឿនតាមធម្មតាវិញ។

លោក ជិន ប៊ុនធឿន បានណែនាំឲ្យមន្ត្រីពាក់ព័ន្ធធ្វើការត្រួតពិនិត្យជាបន្តបន្ទាប់ រាល់ប្រព័ន្ធបង្ហូរទឹកឲ្យមានប្រសិទ្ធភាពក្នុងតំបន់ដែលមានការហូរទឹកយឺតជារឿយៗ។

លោក យិន សុផល ប្រជាពលរដ្ឋរស់នៅក្បែរ វិទ្យាល័យ ជាស៊ីម ចំរើនរដ្ឋ បានលើកឡើងថា លោករីករាយណាស់ដែលលោកអភិបាលខណ្ឌឫស្សីកែវ មកពិនិត្យផ្ទាល់ និងបញ្ជាឲ្យជួសជុលភ្លាមៗ ព្រោះកន្លែងនេះ មុនៗ ទឹកហូរយឺតណាស់ នៅពេលមានភ្លៀងធ្លាក់។ ការយកចិត្តទុកដាក់របស់លោកអភិបាលខណ្ឌឫស្សីកែវ គឺ ជួយដល់ប្រជាពលរដ្ឋច្រើនណាស់។

លោកបានបន្តថា សកម្មភាពនេះ បានបង្ហាញពីការយកចិត្តទុកដាក់ខ្ពស់របស់លោកអភិបាលខណ្ឌឫស្សីកែវចំពោះបញ្ហាជាក់ស្ដែងរបស់ប្រជាពលរដ្ឋ និងជាការងារជាក់ស្ដែងរបស់អាជ្ញាធរ ក្នុងការបំពេញភារកិច្ចសេវាសាធារណៈដើម្បីពលរដ្ឋ៕

អត្ថបទ ៖ សំណាង