ទី​បំផុត ការ​ប្រកួត​ ពាន​រង្វាន់ ស្វាយរៀង​ខាប់ លើក​ទី​៧ វគ្គ​ផ្តាច់​ព្រ័ត្រ​ ធ្វើ​នៅ​ថ្ងៃសៅរ៍​នេះ

ទីបំផុតការប្រកួតពានរង្វាន់ ស្វាយរៀងខាប់ លើកទី៧ ឆ្នាំ ២០២៥ បានឈានចូលមកដល់វគ្គផ្តាច់ព្រ័ត្រ នៅ​ថ្ងៃ​សៅរិ៍ សប្តាហ៍នេះ ជា​ជំនួបរវាងក្រុម ព្រះខ័នរាជស្វាយរៀង អាយុក្រោម ១៨ ឆ្នាំ ទល់នឹងក្រុម យុវជនសាមគ្គី។

ក្រុមទាំង ២ បានពុះពារឆ្លងកាត់នូវការប្រកួតតាមវគ្គនីមួយៗយ៉ាងពិបាក ពោលតាំងពីវគ្គចែកពូល ដែលមាន ៨ ពូល រហូតមកដល់វគ្គ ១៦ ក្រុម, ៨ ក្រុម, ពាក់កណ្តាលផ្តាច់ព្រ័ត្រ និងចុងក្រោយវគ្គផ្តាច់ព្រ័ត្រ។ សម្រាប់ការប្រកួតកាលពីវគ្គពាក់កណ្តាលផ្តាច់ព្រ័ត្រកន្លងទៅ ក្រុម ព្រះខ័នរាជស្វាយរៀង អាយុក្រោម ១៨ ឆ្នាំ បានយកឈ្នះក្រុម ​កាំភ្លើង​ធំ ដោយ​លទ្ធផល ៣-២។ ចំណែក្រុម យុវជនសាមគ្គី វិញ បានយកឈ្នះលើក្រុម CRS Sport ដោយ​លទ្ធផល ៣-០។

រហូត​ដល់​ពេល​នេះ កីឡាករ សុខ គារ៉ា កំពុងត្រូវបានគេរំពឹង ថា នឹងឈ្នះស្បែកជើងមាសសម្រាប់ពានរង្វាន់ ស្វាយរៀងខាប់ លើកទី៧ បើទោះបីក្រុមរបស់គេគឺ​ កាំភ្លើងធំ មិនបានឡើងដល់វគ្គផ្តាច់ព្រ័ត្រក៏ដោយ ដោយសារ​បច្ចុប្បន្ន រូបគេរក​បាន​គ្រាប់​បាល់​ច្រើន​ជាង​គេរហូតដល់ ៣០​ គ្រាប់ វ៉ាដាច់គ្រាប់បាល់អ្នកតាម​ពី​ក្រោយ ​កីឡាករ ទិន កាណូ និងកីឡាករ នៅ សុភាព ដល់ទៅ ១៥ គ្រាប់ ដោយពួកគេមាន ១៥ គ្រាប់ដូចគ្នា។

គួរបញ្ជាក់ ថា ការប្រកួតវគ្គផ្តាច់ព្រ័ត្រពានរង្វាន់ ស្វាយរៀងខាប់ លើកទី៧ ឆ្នាំ ២០២៥ នឹងធ្វើឡើងនៅកីឡដ្ឋានខេត្តស្វាយរៀង ថ្ងៃ សៅរិ៍ ទី ២៥ ខែ តុលា ឆ្នាំ ២០២៥ ដែលនឹងមានការផ្សាយផ្ទាល់ដោយ BTV News ផងដែរ។

អ្វីដែលកាន់តែពិសេស កម្មវិធីនេះនឹងមានវត្តមានតារាចម្រៀង Rap ដ៏ស្រស់សង្ហា គឺលោក Goofy ចូល​រួម​សម្តែង ព្រមទាំងមានការសម្ដែងសិល្បៈ របាំព្រាបសន្តិភាព របាំកុលាបភ្នំពេញ និងមានក្បួនដង្ហែព្រះម៉ែធរណី នាំយកពានរង្វាន់ប្រគល់ជូនក្រុមជើងឯក៕

អត្ថបទ៖ សេម កុសល