ព័ត៌មានជាតិ

អ្នកទទួលផ្ញើរថយន្តនៅសាកលវិទ្យាល័យ ១ កន្លែង យកផ្លូវសាធារណៈធ្វើជាចំណត ត្រូវអាជ្ញាធរខណ្ឌ ៧ មករា ចុះណែនាំមិនអនុញ្ញាតឲ្យបន្តចត

បានផុស

៦ ខែ មុន

នៅ

ថ្ងៃសុក្រ ២៤ តុលា ២០២៥

ដោយ

កម្លាំងនគរបាលសណ្ដាប់ធ្នាប់ នៃអធិការដ្ឋាននគរបាលខណ្ឌ ៧ មករា បានចុះណែនាំដល់អ្នកទទួលផ្ញើរថយន្តនៅសាកលវិទ្យាល័យ វ៉ាន់ដា ជាប់របងវត្តមង្គលវ័ន ដោយមិនអនុញ្ញាតឲ្យយកផ្លូវសាធារណៈធ្វើជាចំណត បង្កការកកស្ទះ និងផលលំបាកដល់ប្រជាពលរដ្ឋរស់នៅក្បែរនោះទេ។

ជាក់ស្ដែងកាលពីព្រឹកថ្ងៃទី ២៤ ខែតុលា ឆ្នាំ ២០២៥ នេះ ដោយមានការណែនាំពីលោកវរសេនីយ៍ឯក ជុន ប៊ុនណាន អធិការនគរបាលខណ្ឌ ៧ មករា បានចាត់ឲ្យកម្លាំងផ្នែកសណ្ដាប់ធ្នាប់ខណ្ឌ និងប៉ុស្តិ៍មនោរម្យ ចុះណែនាំអ្នកទទួលផ្ញើរថយន្តនៅសាកលវិទ្យាល័យ វ៉ាន់ដា ស្ថិតក្នុងសង្កាត់មនោរម្យ ដែលគាត់យករថយន្តមកចតសងខាងផ្លូវលេខ ១២៤ ជាប់របងវត្តមង្គលវ័ន ហៅវត្តស្វាយដង្គុំ ចាប់ពីពេលនេះទៅមិនអនុញ្ញាតឲ្យយករថយន្តផ្ញើមកចតទាំងសងខាងផ្លូវទៀតទេ។

លោកអធិការ បានបញ្ជាក់ថា ក្រោយទទួលបានសំណូមពរពីប្រជាពលរដ្ឋ លោកបានចាត់ឲ្យកម្លាំងផ្នែកជំនាញចុះទៅភ្លាមៗ ដោយណែនាំ និងធ្វើកិច្ចសន្យា មិនអនុញ្ញាតឲ្យបន្តចតរថយន្តអមសងខាងផ្លូវ បង្កការរំខានដល់ប្រជាពលរដ្ឋ និងអ្នកដំណើរនោះឡើយ ជាពិសេសធ្វើឲ្យបាត់បង់សណ្ដាប់ធ្នាប់ផងដែរ។

លោកអធិការសង្កត់ធ្ងន់ថា ក្រោយណែនាំរួច បើនៅតែបន្តចតនោះ នឹងចាត់វិធានការក្ដៅ ដោយស្ទូចរថយន្តទៅរក្សាទុកនៅអធិការដ្ឋាននគរបាលខណ្ឌតែម្ដង។

សូមបញ្ជាក់ថា កន្លងមក តាមបណ្ដោយផ្លូវលេខ ១២៤ ជាប់របងវត្តមង្គលវ័ន ហៅវត្តស្វាយដង្គុំ សាកលវិទ្យាល័យ វ៉ាន់ដា បានយករថយន្តមកចតលើអមសងខាងផ្លូវ ធ្វើឲ្យបាត់បង់សណ្ដាប់ធ្នាប់ និងប្រជាពលរដ្ឋលំបាកក្នុងការធ្វើដំណើរចេញចូល ជាពិសេសអ្នកធ្វើដំណើរថ្មើរជើង ត្រូវដើរកណ្ដាលផ្លូវតែម្ដង ដែលអាចបង្កគ្រោះថ្នាក់បានគ្រប់ពេល៕

អត្ថបទ ៖ សុភា