New York Times៖ ថៃ គឺជាច្រកឆ្លងកាត់សម្រាប់ក្រុម Scam បោកលុយជនជាតិអាមេរិកជាង ១៦​ពាន់លានដុល្លារ

កាសែត New York Times បានលាតត្រដាងយ៉ាងច្បាស់ថា ប្រទេសថៃ គឺជាច្រកឆ្លងកាត់សម្រាប់ក្រុមបណ្តាញឧក្រិដ្ឋកម្មតាមអនឡាញ (Scam) ដែលបោកប្រាស់ជនជាតិអាមេរិកអស់ទឹកប្រាក់១៦.៦ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអត្ថបទចេញផ្សាយកាលពីថ្ងៃព្រហស្បតិ៍ទី២៣ខែតុលាឆ្នាំ២០២៥ New York Times បានដកស្រង់ប្រភពពីក្រសួងរតនាគារអាមេរិក ដោយសរសេរថា ជនជាតិអាមេរិក បានចាញ់បោកដោយសារតែអំពើឧក្រិដ្ឋកម្មនោះ ខណៈក្រុម Scam បានប្រើអាកាសយានដ្ឋានក្នុងប្រទេសថៃ ធ្វើជាស្ពានចម្លងសម្រាប់ទង្វើឆបោកនិងជួញដូរទៅកន្លែងផ្សេង។

លើសពីនេះ បើយោងតាមអត្ថបទដដែល, មនុស្សត្រូវបានគេល្បួងឲ្យមកប្រទេសថៃដើម្បីបំពេញការងារដែលពួកគេគិតថា ជាការងារបម្រើសេវាអតិថិជន ឬបច្ចេកវិទ្យាព័ត៌មានជាដើម។

យ៉ាងណា បន្ទាប់ពីទៅដល់ទីក្រុងបាងកក អ្នកទាំងនោះ ត្រូវបានគេនាំឆ្លងដែនថៃ យកទៅឃុំឃាំងនៅក្នុងបរិវេណអាគារប្រទេសផ្សេង ហើយជាញឹកញាប់រងការធ្វើបាបរាងកាយ និងធ្វើទារុណកម្មថែមទៀតផង។

ព័ត៌មានរបស់ New York Times នេះបានបង្ហាញច្បាស់ថា ថៃគឺជាកន្លែងគ្មានសុវត្ថិភាពនិងជាមជ្ឈមណ្ឌលជួយដល់ប្រតិបត្តិការរបស់ក្រុមឆបោកតាមអនឡាញ ប៉ុន្តែថៃ បែរជាដើរចោទគេចោទឯង ហើយនិយាយយកល្អនិងខំបិទបាំងរឿងដ៏ខ្មៅកខ្វក់របស់ខ្លួនទៅវិញ។

រឿងហេតុផ្ទុះកក្រើកចុងក្រោយបំផុតគឺពាក់ព័ន្ធតារាម៉ូដែលបេឡារុសឈ្មោះ Vera Krautsova ដែលត្រូវបានគេល្បួងឲ្យមកប្រទេសថៃ ហើយចាប់ជំរិតយកទៅមីយ៉ាន់ម៉ា ដើម្បីសម្លាប់វះយកគ្រឿងក្នុង។

តាមសេចក្តីរាយការណ៍របស់កាសែត Chosun Daily កាលពីថ្ងៃទី១៧ខែតុលាឆ្នាំ២០២៥ តារាវ័យ២៦ឆ្នាំរូបនេះ ត្រូវគេល្បួងឲ្យមកទីក្រុងបាងកកកាលពីខែមុន ដោយបោកថាមកធ្វើការក្រៅម៉ោងនិងធ្វើសម្ភាសន៍ ប៉ុន្តែអ្វីៗមិនដូចការរំពឹងទុកឡើយ នាងបែរជាត្រូវក្រុមអន្ធពាលធ្វើស៊ី ដោយនាំទៅភាគខាងជើងប្រទេសមីយ៉ាន់ម៉ាវិញ។

យ៉ាងណា រដ្ឋាភិបាលទីក្រុងបាងកក ខំប្រឹងដោះសានិយាយលាងខ្លួនយកល្អទាំងមិនចេះខ្មាសមាត់ថា តាមពិតនាង បានចាកចេញពីប្រទេសថៃដោយខ្លួនឯង ហើយគ្មានសញ្ញានៃការចាប់ពង្រត់អ្វីទេ៕

អត្ថបទ៖ សុខ សុវណ្ណ

ចុចអាន៖ ឧក្រិដ្ឋជនមួយក្រុម បើកបណ្តាញ Scam នៅបាងកក, ខែដំបូងបោកលុយបាន ជាង ៣០ម៉ឺនដុល្លារ