​​​ក្នុងជំនួប​កំពូល​ ត្រាំ-ស៊ី ​​​​​មាន​ការ​សម្រេចខ្លះ ប៉ុន្តែ​អ្នក​វិភាគថា «គ្មានផលទេ​​​»

​ក្រោយ​​​ជូប​ចរចា​ទ្វេភាគី​ជាមួយ​ប្រធានាធិបតី​ចិន នៅ​ប្រទេសកូរ៉េ​ខាងត្បូង ប្រធានាធិបតីសហរដ្ឋអាមេរិក លោក ដូណាល់ ត្រាំ​ បាន​និយាយ​ថា ​​ការ​ពិភាក្សា​​របស់លោក​ជាមួយសមភាគី​​ចិន​ គឺ​មានផលល្អ​ បើទោះបីជា​ ភាគីបន្ត​រក្សាភាព​ស្ងប់ស្ងៀម​​ក្រោយជំនួប​។​

​ជំនួប​កំពូល​​​​​ប្រធានាធិបតី​អាមេរិក និង​ចិន បានប្រព្រឹត្តទៅនៅ​​ទីក្រុង​ប៊ូសាន ប្រទេសកូរ៉េខាងត្បូង នៅ​ព្រឹកថ្ងៃទី​​៣០ខែ​​​តុលា ក្នុងពេលដែល​ប្រទេស​មហាអំណាច​ទាំង​ពីរកំពុងមានជម្លោះ​​​តានតឹង​​ក្នុង​វិស័យ​​ការទូតនិង​ពាណិជ្ជកម្ម រាប់ចាប់​ពីរ៉ែ​កម្រ ដល់​ទំនិញ​ទូទៅ​។ ក្នុងជំនួប​កំពូល​លើក​ដំបូង​ក្នុងរយៈពេល​៦ឆ្នាំ​នេះ​ ពិភ​ពលោក​កំពុង​តាមដាន​​​យ៉ាងយកចិត្តទុកដាក់​ និង​ចង់​ដឹងថា​តើ​ ជំនួប​ពួកគេ​​អាច​រកឃើញ​កិច្ច​ព្រម​ព្រៀង​​អ្វីខ្លះដើម្បីឈានទៅ​​​​បន្ថយភាព​តានតឹង​។​

​​ប្រាប់​អ្នក​​​យក​ព័ត៌មាន​នៅមុន​ពេល​ឡើង​យន្ត​ហោះ​​​​ប្រធានាធិបតី​ Air Force One ទៅកាន់​​ទីក្រុង​វ៉ាស៊ីនតោន​វិញ ប្រធានាធិបតី​​ ដូណាល់ ត្រាំ បាន​និយាយថា សហរដ្ឋអាមេរិកនឹងទម្លាក់​អត្រា​ពន្ធ​គយ​​លើ​ទំនិញ​ចិន​ពី​​៥៧​ភាគរយ​ មក​នៅត្រឹម​៤៧​ភាគរយ​ ហើយ ថា ប្រធានាធិបតី​ចិន​​យល់​ព្រម​ធ្វើ​ការ​ងារ​កាន់តែ​ខ្លាំង​​បន្ថែមទៀត​ដើម្បី​​បញ្ឈប់​​​ការ​ហូរចូល​នៃគ្រឿង​ផ្សំ​សារធាតុញៀញ​ Fentanyl ទៅ​កាន់​​សហរដ្ឋអាមេរិក។ នេះ​បើយោង​តាមការ​ចេញផ្សាយ​​​​របស់ AL Jazeera​។ ​

​​តាម​សេចក្តីរាយការណ៍​នោះ ប្រធានាធិបតី ដូណាល់ ត្រាំ បាន​បន្ថែមថា ប្រទេសចិន​​​នឹងបន្តទិញសណ្តែកសៀង​​​របស់សហរដ្ឋអាមេរិក​ និង​បន្ត​នាំចេញរ៉ែកម្រ​​​​​ទៅកាន់​ទីផ្សារ​សហរដ្ឋអមេរិក​។ ​​​លោក ត្រាំ ក៏បាន​ប្រាប់អ្នកយកព័ត៌មានថា ​​លោក​នឹង​​បំពេញទស្សនកិច្ច​នៅប្រទេសចិន​នៅខែ​មេសា​ឆ្នាំ​២០២៦ ខណៈប្រធានាធិបតីចិន​នឹងទៅទស្សនកិច្ច​នៅសហរដ្ឋអាមេរិក​​បន្ទាប់ពីនោះ។

ទីភ្នាក់ងារសារព័ត៌មានស៊ីនហ៊ូ (Xinhua)​ បានដកស្រង់សម្តីលោកស៊ី ដែលបាននិយាយថា «ក្រុមសេដ្ឋកិច្ច និងពាណិជ្ជកម្មនៃប្រទេសចិន និងសហរដ្ឋអាមេរិកបានធ្វើការពិភាក្សាស៊ីជម្រៅ និងឈានដល់ការឯកភាពគ្នាលើដំណោះស្រាយចំពោះបញ្ហា»។

​ប៉ុន្តែ ​អ្នក​ជំនាញ​សេដ្ឋកិច្ច​​ Einar Tangen, អ្នកស្រាវជ្រាវ​​នៅ​វិទ្យាស្ថានTaihe​ ក្នុង​ទីក្រុង​ ប៉េកាំង (Taihe Institute in Beijing) ដែល​ត្រូវ​បាន​សារ​ព័ត៌មាន AL Jazeera​ ស្រង់សម្តី​ បាន​​អះអាងថា ការ​សម្រេចចិត្ត​បន្ថយពន្ធ​របស់​លោកត្រាំ​នៅត្រឹមនោះ​គឹ​កិច្ច​ប្រជុំ​នេះ​គ្មានលទ្ធផល​អ្វីទេ​។​

​នៅក្នុងការ​ពិភាក្សា​លើក​ដំបូង​នេះ​មន្ត្រី​ចិន​និង​សហរដ្ឋអាមេរិក​សំខាន់​ៗ បានចូលរួម​ក្នុងការពិភាក្សា​។ មន្ត្រី​ទាំងនោះ​រួម​មាន៖​

សម្រាប់​ភាគីចិន​៖​

​ឧបនាយករដ្ឋមន្ត្រី លោក ហ៊ី លីហ្វេង (He Lifeng), លោក រដ្ឋមន្ត្រី​ការបរទេស​ចិន លោក វ៉ាង យី (Wang Yi), អនុរដ្ឋមន្ត្រី​ការបរទេស​ លោក ម៉ា សៅស៊ូ (Ma Zhaoxu), រដ្ឋមន្ត្រី​ពាណិជ្ជកម្ម លោក វ៉ាង វេនតៅ (Wang Wentao), ​​​​ប្រធានបុគ្គលិក លោក ចៃ​ គី (Cai Qi), និង​ប្រធាន​គណៈកម្មការ​​អភិវឌ្ឍន៍​​និង​កែទម្រង់​ជា​តិ លោក ហ្សេង​ សាន់ជី​​ (Zheng Shanjie)។

សម្រាប់​ភាគី​អាមេរិក​៖

រដ្ឋមន្ត្រី​ការបរទេស​​ លោក Marco Rubio, រដ្ឋមន្ត្រី​​​ក្រសួង​រតនាគារ​ជាតិ លោក Scott Bessent, តំណាង​​​ពាណិជ្ជកម្ម​អាមេរិក លោក Jamieson Greer, ​ប្រធានបុគ្គលិក​ លោកស្រី​​ Susie Wiles, រដ្ឋមន្ត្រី​​ពាណិជ្ជកម្ម Howard Lutnick, និង ​ឯកអគ្គរដ្ឋទូតសហរដ្ឋ​​អាមេរិក​ប្រចាំប្រទេសចិន David Perdu៕​

រ៉ាន់ រើយ​