ចំថ្ងៃខួប​៨០ឆ្នាំ លោក ត្រាំ និយាយ​ទូរសព្ទ​ជាមួយ​ ពូទីន និង ហ្សេលេនស្គី ស្ដី​ពី​សង្គ្រាម​នៅ​អ៊ុយក្រែន

ចំថ្ងៃខួបកំណើតឈានចូលវ័យ៨០ឆ្នាំ របស់លោក ដូណាល់ ត្រាំ កាលពីថ្ងៃអាទិត្យ ទី​១៤ ខែ​មិថុនា ឆ្នាំ​២០២៦ បញ្ហាសង្គ្រាមនៅអ៊ុយក្រែន បានក្លាយជាប្រធានបទដ៏ក្តៅគគុកមួយតាមខ្សែទូរសព្ទរបស់វិមានប្រធានាធិបតីអាមេរិក។ មេដឹកនាំនៃប្រទេសកំពុងវាយប្រហារគ្នាទាំងពីរ គឺប្រធានាធិបតីរុស្ស៊ី លោក វ៉្លាឌីមៀរ ពូទីន និងប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានទូរសព្ទទៅជជែកជាមួយលោក ត្រាំ ដាច់ដោយឡែកពីគ្នា ដែលបង្កើតឱ្យមានការជជែកដេញដោលខាងនយោបាយយ៉ាងខ្លាំង មុនពេលកិច្ចប្រជុំកំពូល G7 មកដល់។

បើតាមការបញ្ជាក់ពីជំនួយការវិមានក្រឹមឡាំង លោក Yuri Ushakov ដែល​ត្រូវបានចុះផ្សាយ​​ដោយ​សារព័ត៌មាន PBS នៅក្នុងកិច្ចសន្ទនាដែលមានរយៈពេលជិតមួយម៉ោង លោក ត្រាំ បានជំរុញ​ឱ្យមានការបញ្ចប់សង្គ្រាម និងបង្ហាញពីបំណងចង់ឱ្យទំនាក់ទំនងរវាងអាមេរិក និងរុស្ស៊ីត្រឡប់មកល្អប្រសើរឡើងវិញ។ យ៉ាងណាមិញ លោក ពូទីន បានឆ្លើយតបទៅវិញដោយជំហររឹងរូស និងបានផ្ញើសារឌឺដងចំៗទៅកាន់មេដឹកនាំអ៊ុយក្រែន តាមរយៈលោក ត្រាំ ថា បើលោក ហ្សេលេនស្គី ពិតជាចង់ជួបចរចាសន្តិភាពជាមួយលោកមែននោះ «ចូរឱ្យធ្វើដំណើរទៅ​ទីក្រុងមូស្គូដោយផ្ទាល់មក»។ លោក ពូទីន ក៏បានបន្ថែមទៀតថា ការដែលអ៊ុយក្រែនព្យាយាមវាយប្រហារលើតំបន់ស៊ីវិលរបស់រុស្ស៊ី គឺមិនអាចកែប្រែស្ថានភាពចាញ់ឈ្នះនៅលើសមរភូមិបានឡើយ។

ចំណែកឯខាងលោក ហ្សេលេនស្គី វិញ ក៏បានទូរសព្ទទៅអបអរសាទរថ្ងៃខួបកំណើតរបស់លោក ត្រាំ និងថ្លែងអំណរគុណ ចំពោះការគាំទ្ររបស់អាមេរិកផងដែរ។ លោកបានបង្ហើបថា ពួកគេបានជជែកគ្នាពីវិធីសាស្ត្រនាំយកសន្តិភាព និងបានរាយការណ៍ប្រាប់លោក ត្រាំ ពីស្ថានភាពសមរភូមិជួរមុខរបស់អ៊ុយក្រែន ដែលកំពុងតែមានប្រៀបជាងមុន។ មេដឹកនាំទាំងពីរ បានព្រមព្រៀងគ្នាថានឹងបន្តពិភាក្សាគ្នាបន្ថែមទៀត នៅពេលជួបគ្នាក្នុងកិច្ចប្រជុំកំពូល G7 នាពេលឆាប់ៗខាងមុខ។

ទោះបីជាមានការជជែកគ្នាតាមផ្លូវការទូតយ៉ាងក្តៅគគុកយ៉ាងណាក្តី ក៏ការវាយប្រហារនៅលើសមរភូមិជាក់ស្ដែង​នៅតែបន្តឆាបឆេះខ្លាំង។ ដ្រូនរបស់អ៊ុយក្រែន បានបើកការវាយប្រហារចូលជ្រៅទៅក្នុងទឹកដីរុស្ស៊ី ដោយបានកម្ទេចឃ្លាំងផ្ទុកប្រេង និងបង្កឱ្យមានមនុស្សស្លាប់ និងរបួសជាច្រើននាក់។ ស្របពេលជាមួយគ្នានោះដែរ កងកម្លាំងអង់គ្លេស និងបារាំង បានសហការគ្នាបង្ក្រាប និងឃាត់ទុកកប៉ាល់ដឹកប្រេងខុសច្បាប់មួយគ្រឿងរបស់រុស្ស៊ីនៅសមុទ្រ ដែលជាការព្រមានយ៉ាងធ្ងន់ធ្ងរទៅកាន់វិមានក្រឹមឡាំងថា ពួកគេមិនអាចគេចវេះពីទណ្ឌកម្មអន្តរជាតិបានឡើយ៕

ប្រែសម្រួល៖ ឈាង