ត្រាំ សន្យាជួយបញ្ចប់សង្គ្រាមស៊ីវិលនៅស៊ូដង់ បន្ទាប់ពីព្រះអង្គម្ចាស់រាជទាយាទអារ៉ាប៊ីសាអូឌីតស្នើសុំ

ប្រធានាធិបតីអាមេរិក លោក ដូណាល់ ត្រាំ សន្យាថានឹងធ្វើការជាមួយអារ៉ាប៊ីសាអូឌីត និងប្រទេសអារ៉ាប់ដទៃទៀត ដើម្បីជួយបញ្ចប់សង្គ្រាមស៊ីវិលដែលកំពុងកើតមាននៅស៊ូដង់។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២០ខែវិច្ឆិកា។

លោក ត្រាំ បាននិយាយថា លោកបានធ្វើការសម្រេចចិត្តនេះ បន្ទាប់ពីព្រះអង្គម្ចាស់រាជទាយាទអារ៉ាប៊ីសាអូឌីត Mohammed bin Salman (MBS) បានស្នើសុំឱ្យលោកធ្វើអន្តរាគមន៍ដោយផ្ទាល់ក្នុងអំឡុងពេលដំណើរទស្សនកិច្ចរបស់លោកទៅកាន់ទីក្រុងវ៉ាស៊ីនតោនឌីស៊ី។

លោក ត្រាំ បានប្រកាសពីការប្តេជ្ញាចិត្តនេះចំនួនពីរដងនៅថ្ងៃពុធ ម្តងនៅវេទិកាវិនិយោគអារ៉ាប៊ីសាអូឌីតនៅទីក្រុងវ៉ាស៊ីនតោន និងម្តងទៀតនៅលើវេទិកាផ្ទាល់របស់លោក Truth Social។ លោកបាននិយាយថា មេដឹកនាំអារ៉ាប់ចង់ឱ្យលោកប្រើប្រាស់ឥទ្ធិពលរបស់ប្រធានាធិបតីអាមេរិក ដើម្បីជំរុញឱ្យមានការបញ្ឈប់ជាបន្ទាន់ចំពោះអំពើហិង្សានៅស៊ូដង់។

លោក ត្រាំ ថារដ្ឋបាលរបស់លោកបានចាប់ផ្តើមចាត់វិធានការក្នុងរយៈពេល ៣០នាទីបន្ទាប់ពីសំណើរបស់ព្រះអង្គម្ចាស់រាជទាយាទ។ មេដឹកនាំទាំងពីរក៏បានពិភាក្សាអំពីការបង្កើនកិច្ចសហប្រតិបត្តិការ និងការវិនិយោគរវាងសហរដ្ឋអាមេរិក និងអារ៉ាប៊ីសាអូឌីត ក្នុងអំឡុងពេលដំណើរទស្សនកិច្ចរយៈពេលពីរថ្ងៃរបស់ព្រះអង្គម្ចាស់ MBSផងដែរ។

លោក ត្រាំ បាននិយាយថា សហរដ្ឋអាមេរិកនឹងធ្វើការជាមួយអារ៉ាប៊ីសាអូឌីត អារ៉ាប់រួម អេហ្ស៊ីប និងដៃគូមជ្ឈិមបូព៌ាផ្សេងទៀត ដើម្បីបញ្ឈប់ការប្រយុទ្ធ និងជួយធ្វើឱ្យស៊ូដង់មានស្ថិរភាព។

គួរបញ្ជាក់ថាសង្គ្រាមស៊ីវិលនៅស៊ូដង់ ដែលបានផ្ទុះឡើងនៅក្នុងខែមេសា ឆ្នាំ២០២៣ រវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័ស (RSF) បានបង្កឱ្យមានការបំផ្លិចបំផ្លាញ ទុរ្ភិក្ស និងបង្ខំប្រជាជនឲ្យផ្លាស់ទីលំនៅយ៉ាងច្រើន។ លើសពីនេះជនស៊ីវិលជាង ៣៣០០នាក់ត្រូវបានសម្លាប់រវាងខែមករា និងខែមិថុនា ឆ្នាំនេះ ហើយមនុស្សជាងបួនលាននាក់បានភៀសខ្លួនចេញពីប្រទេស៕

អត្ថបទ៖ ប៊ុន​ សុភាព