ព័ត៌មានអន្ដរជាតិ

លោកត្រាំព្រមានសងសឹក ក្រោយទាហានអាមេរិកស្លាប់ក្នុងការវាយប្រហាររបស់ DAESH នៅស៊ីរី

បានផុស

៤ ខែ មុន

នៅ

ថ្ងៃអាទិត្យ ១៤ ធ្នូ ២០២៥

ដោយ

Chheang

ប្រធានាធិបតីអាមេរិក ដូណាល់ ត្រាំ បានបញ្ជាក់ថា ក្រុងវ៉ាស៊ីនតោននឹងធ្វើការសងសឹកប្រឆាំងនឹងក្រុម DAESH បើកងកម្លាំងអាមេរិកត្រូវបានវាយប្រហារម្ដងទៀត បន្ទាប់ពីទាហានអាមេរិក២នាក់ និងជនស៊ីវិលម្នាក់ត្រូវបានសម្លាប់ក្នុងការវាយឆ្មក់នៅប្រទេសស៊ីរី។

យោងតាមបញ្ជាការកណ្ដាលអាមេរិក (CENTCOM) ការវាយប្រហារនេះបានកើតឡើងនៅថ្ងៃទី១៣ធ្នូ នៅពេលដែលខ្មាន់កាំភ្លើង DAESH ម្នាក់បានបើកការបាញ់ប្រហារទៅលើកងកម្លាំងអាមេរិក និងកងកម្លាំងជាដៃគូនៅតំបន់វាលខ្សាច់ Palmyra។ ទាហានអាមេរិក៣នាក់ផ្សេងទៀតបានរងរបួសក្នុងហេតុការណ៍នេះ។

CENTCOM បាននិយាយក្នុងសេចក្ដីថ្លែងការណ៍មួយថា «ទាហានអាមេរិក២នាក់ និងជនស៊ីវិលអាមេរិកម្នាក់ត្រូវបានសម្លាប់ ហើយទាហាន៣នាក់បានរងរបួសដោយសារការវាយឆ្មក់របស់ខ្មាន់កាំភ្លើង DAESH ម្នាក់នៅស៊ីរី» ដោយបន្ថែមថា ក្រោយមកអ្នកវាយប្រហារនោះត្រូវបានបាញ់សម្លាប់។

លោក Sean Parnell អ្នកនាំពាក្យក្រសួងការពារជាតិអាមេរិក បានប្រាប់ថា ជនស៊ីវិលដែលត្រូវបានសម្លាប់នោះ គឺជាអ្នកបកប្រែភាសាសញ្ជាតិអាមេរិក។

ថ្លែងក្រោយការវាយប្រហារ លោកត្រាំ បានព្រមានថា ទីក្រុងវ៉ាស៊ីនតោននឹងឆ្លើយតបយ៉ាងដាច់ណាត់ បើក្រុម DAESH ហ៊ានវាយប្រហារកងកម្លាំងអាមេរិកម្ដងទៀត ដោយសង្កត់ធ្ងន់ថា អាមេរិកនឹងបន្តយុទ្ធនាការប្រឆាំងក្រុមជ្រុលនិយមមួយនេះ។

លោក Tom Barrack បេសកជនពិសេសអាមេរិកប្រចាំស៊ីរី បានថ្កោលទោសឧបទ្ទវហេតុនេះថាជា «ការវាយឆ្មក់ភេរវកម្មដ៏កំសាក» ដោយសម្ដែងការរំលែកទុក្ខដល់ក្រុមគ្រួសារជនរងគ្រោះ និងជូនពរឲ្យអ្នករបួសឆាប់ជាសះស្បើយ។

កងកម្លាំងអាមេរិកកំពុងប្រតិបត្តិការនៅស៊ីរីដែលជាផ្នែកមួយនៃសម្ព័ន្ធភាពអន្តរជាតិដែលដឹកនាំដោយអាមេរិកដែលត្រូវបានបង្កើតឡើងក្នុងឆ្នាំ២០១៤ ដើម្បីប្រយុទ្ធប្រឆាំងនឹងក្រុម DAESH។ ប្រទេសស៊ីរីបានចូលរួមជាផ្លូវការជាមួយសម្ព័ន្ធភាពនេះក្នុងខែវិច្ឆិកាឆ្នាំ២០២៥ បន្ទាប់ពីការដួលរលំនៃរដ្ឋាភិបាលរបស់អតីតប្រធានាធិបតី Bashar al-Assad កាលពីចុងឆ្នាំមុន។

ចាប់តាំងពីពេលនោះមក រដ្ឋបាលថ្មីរបស់ស៊ីរីបានស្វះស្វែងដើម្បីពង្រឹងសន្តិសុខ និងធ្វើឲ្យប្រទេសមានស្ថិរភាពឡើងវិញបន្ទាប់ពីជម្លោះជាងមួយទសវត្សរ៍៕

ប្រែសម្រួល៖ ឈាង