ព័ត៌មានអន្ដរជាតិ

យន្តហោះយោធាអាមេរិកហោះប៊ិះបុកគ្នាជាមួយយន្តហោះដឹកអ្នកដំណើរ ជិតវ៉េណេស៊ុយអេឡា

បានផុស

៧ ខែ មុន

នៅ

ថ្ងៃអង្គារ ១៦ ធ្នូ ២០២៥

ដោយ

យន្តហោះដឹកអ្នកដំណើរហោះជិតបុកគ្នាជាមួយយន្តហោះយោធាអាមេរិក នៅជិតឆ្នេរសមុទ្រវ៉េណេស៊ុយអេឡា [Venezuelan] កាលពីថ្ងៃសុក្រ បើតាមសារព័ត៌មាន Associated Press និង New York Times ។ សារព័ត៌មានទាំងពីរនេះបានរាយការណ៍ដោយដកស្រង់តាមរយៈបណ្តាញទំនាក់ទំនង និងតាមដានទិន្នន័យនៃការហោះហើរ។

យន្តហោះដឹកអ្នកដំណើររបស់អាមេរិក JetBlue. CNN

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបទ្ទវហេតុនេះបានកើតឡើងចំពេលនៃដំណើរការរបស់កងទ័ពជើងទឹកអាមេរិកនៅតំបន់ការ៉ាប៊ីន និងមានការគំរាមកំហែងរបស់ប្រធានាធិបតីអាមេរិក លោក ដូណាល់ ត្រាំ ក្នុងការវាយប្រហារ «ពួកភេរវករ» នៅលើទឹកដីវេណេស៊ុយអេឡា។

តាមសេចក្តីរាយការណ៍ យន្តហោះ JetBlue Flight ១១១២ បានជួបប្រទះនឹងនាវាដឹកប្រេងរបស់កងទ័ពអាកាសអាមេរិក ខណៈពេលកំពុងធ្វើដំណើរពីតំបន់កោះ Curaçao ដែលជាកោះតូចមួយនៅឆ្នេរសមុទ្រវេណេស៊ុយអេឡា ទៅកាន់អាកាសយានដ្ឋានអន្តរជាតិ John F. Kennedy នៃទីក្រុងញូវយ៉ក។ ២០នាទីបន្ទាប់ពីហោះឡើង យន្តហោះនោះស្រាប់តែបាត់បង់កម្លាំងនៅពេលហោះឡើងលើពីដីបានពាក់កណ្តាល។

អ្នកបើកយន្តហោះ JetBlue បាននិយាយថា៖ «យើងស្ទើរតែមានការប៉ះទង្គិចគ្នានៅកណ្តាលអាកាសទៅហើយ។ យន្តហោះរបស់ពួកគេបានឆ្លងកាត់ដោយផ្ទាល់នៅលើផ្លូវហោះហើររបស់យើង … ហើយមិនបានបើកឧបករណ៍បញ្ជូនសំឡេងរបស់ខ្លួនទេ វាពិតគ្រោះថ្នាក់ណាស់» ។

តែអ្នកនាំពាក្យបញ្ជាការដ្ឋានភាគខាងត្បូងរបស់សហរដ្ឋអាមេរិក លោកវរសេនីយ៍ឯក Manny Ortiz បាននិយាយថា៖ «យើងបានដឹងពីរបាយហេតុការថ្មីៗនេះហើយ ទាក់ទងនឹងប្រតិបត្តិការយន្តហោះយោធាអាមេរិក នៅតំបន់ការ៉ាប៊ីន បច្ចុប្បន្នកំពុងពិនិត្យមើលបញ្ហានេះផងដែរ»។

លោកបានបន្ថែមទៀតថា សុវត្ថិភាពនៅតែជាអាទិភាពកំពូល ហើយថាយោធាកំពុងធ្វើការតាមរយៈបណ្តាញសមស្របណាមួយដើម្បីវាយតម្លៃការពិតជុំវិញស្ថានភាពនេះ៕

ណឺ មិនា