ព័ត៌មានអន្ដរជាតិ

សេដ្ឋកិច្ចថៃចុះខ្សោយ បង្ខំឱ្យធនាគារកណ្ដាលកាត់អត្រាការប្រាក់់ជាថ្មី

បានផុស

៤ ខែ មុន

នៅ

ថ្ងៃព្រហស្បតិ៍ ១៨ ធ្នូ ២០២៥

ដោយ

កម្សោយសេដ្ឋកិច្ចថៃ បានបង្ខំឱ្យធនាគារកណ្ដាលរបស់ប្រទេសនេះ បង្ខំកាត់អត្រាការប្រាក់ ២៥ ពិន្ទុ បន្ថែមទៀត ដើម្បីជំរុញកំណើនដែលដើរអូសជើងដោយសារតែបញ្ហាផ្សេងៗ រាប់តាំងពីបំណុលគ្រួសារ ព្យុះនយោបាយក្នុង វិបត្តិទេសចរណ៍ និងជម្លោះព្រំដែនជាមួយកម្ពុជា។ នេះបើតាមការចុះផ្សាយរបស់កាសែតបាងកកប៉ុស្តិ៍។

*នាយករដ្ឋមន្រ្តីចាំផ្ទះថៃ លោក អានុទីន ឆានវីរៈគុណ*

ការកាត់ ២៥ ពិន្ទុ ឬ ០,២៥% នាំឱ្យអត្រាការប្រាក់សរុបធ្លាក់ចុះមកត្រឹម ១,២៥%។ នេះគឺជាការកាត់អត្រាការប្រាក់លើកទី៥ហើយ រាប់តាំងពីខែតុលា ឆ្នាំ ២០២៤ ដែលសរុបមកទល់ពេលនេះប្រមាណ ១,២៥%។

លេខាធិការនៃគណៈកម្មាធិការគោលនយោបាយរូបិយវត្ថុ (MPC) នៃធនាគារកណ្ដាលថៃ លោក Sakkapop Panyanukul បាននិយាយក្នុងសេចក្តីថ្លែងការណ៍ថា៖ «គណៈកម្មាធិការគោលនយោបាយរូបិយវត្ថុថៃ បានវាយតម្លៃពីទស្សនវិស័យសេដ្ឋកិច្ចថៃ ដែលបង្ហាញពីការធ្លាក់ចុះកាន់តែច្បាស់ បើធៀបនឹងកិច្ចប្រជុំមុនៗ»។

សេដ្ឋវិទូថៃមើលឃើញថា បច្ចុប្បន្នសេដ្ឋកិច្ចថៃបានដុនដាបដោយសារតែបញ្ហាផ្សេងៗ រួមទាំងបំណុលគ្រួសារខ្ពស់ កម្សោយតម្រូវការ វិបត្តិនយោបាយ ការធ្លាក់ចុះនៃវិស័យទេសចរណ៍ គ្រោះទឹកជំនន់ និងជម្លោះព្រំដែនជាមួយកម្ពុជាជាដើម។ ក្រៅពីនេះ សេដ្ឋកិច្ចថៃក៏រងសម្ពាធពីពន្ធខ្ពស់របស់សហរដ្ឋអាមេរិក និងភាពមិនប្រាកដប្រជាសកលផងដែរ។

ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDC)ថៃ ព្យាករថា កំណើន GDP (ផលិតផលក្នុងស្រុកសរុប) របស់ថៃ នឹងថយចុះមកត្រឹម ២% នៅឆ្នាំនេះ និង ១,៧% នៅឆ្នាំក្រោយ។ GDP ថៃ បានកើនឡើងត្រឹមតែ ១,២% ប៉ុណ្ណេះ នៅត្រីមាសទី៣ ឆ្នាំ ២០២៥ ធៀបនឹង ២,៨% នៅត្រីមាសទី២ ខណៈកំំណើនត្រីមាសទី៤ រំពឹងថានឹងធ្លាក់ចុះក្រោយ ១%។

អនុប្រធានគ្រប់គ្រងនៃមជ្ឈមណ្ឌលស្រាវជ្រាវ Kasikorn (K-Research) លោកស្រី Nattaporn Triratanasirikul បាននិយាយថា ការកាត់បន្ថយអត្រាការប្រាក់របស់ធនាគារកណ្ដាលថៃ ឆ្លុះបញ្ចាំងពីការព្រួយបារម្ភរបស់គណៈកម្មាធិការអំពីទស្សនវិស័យសេដ្ឋកិច្ចរបស់ប្រទេស។

លោកស្រីបានប្រាប់កាសែតបាងកកប៉ុស្តិ៍ថា៖ «ដោយសារសភាត្រូវបានរំលាយរួចហើយ គោលនយោបាយសារពើពន្ធ និងការចំណាយថវិកាផ្សេងៗ នឹងដំណើរការយឺតយ៉ាវ ហើយអាចនឹងរងការរំខានក្រោមការគ្រប់គ្រងរបស់រដ្ឋាភិបាលចាំផ្ទះ»។

បណ្ដាសេដ្ឋវិទូថៃបានព្រមានថា ចំពេលដែលបរិមាណភ្ញៀវបរទេសធ្លាក់ចុះ ការនាំចេញរបស់ថៃ ដែលជាវិស័យសំខាន់មួយផ្សេងទៀតសម្រាប់សេដ្ឋកិច្ច រំពឹងថានឹងចុះខ្សោយ ជាពិសេសនៅឆ្នាំក្រោយ។

Kasikorn បានរំពឹងថា ការនាំចេញនឹងធ្លាក់ចុះ ១,២% នៅឆ្នាំក្រោយ បន្ទាប់ពីកើនឡើង ១១% នៅឆ្នាំនេះ នៅពេលក្រុមហ៊ុននានាបានប្រញាប់ប្រញាល់នាំចេញទំនិញមុនពេលពន្ធខ្ពស់របស់ប្រធានាធិបតីអាមេរិក ដូណាល់ ត្រាំ ចូលជាធរមាន។

បន្ថែមពីលើនេះ លោកស្រី Nattaporn បាននិយាយថា ការប្រយុទ្ធគ្នារវាងថៃ និងកម្ពុជា អាចនឹងធ្វើឱ្យព្រំដែនគោករវាងប្រទេសទាំង២ បន្តបិទនៅឆមាសទី១ ឆ្នាំ ២០២៦ ដែលអាចបណ្តាលឱ្យការនាំចេញរបស់ថៃទៅកាន់អាស៊ីអាគ្នេយ៍សរុប ធ្លាក់ចុះ៕