រុស្ស៊ី៖ ការកែផែនការ​សន្តិភាព​របស់អឺរ៉ុប-អ៊ុយក្រែន ធ្វើឲ្យឱកាសកិច្ចព្រមព្រៀងកាន់តែអាក្រក់

ជំនួយការជាន់ខ្ពស់ផ្នែកគោលនយោបាយការបរទេសរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាន​លើក​ឡើង​កាលពីថ្ងៃអាទិត្យ​ទី​២១​ខែ​ធ្នូ​ឆ្នាំ​២០២៥​ថា វិសោធនកម្ម​ដែលស្នើឡើងដោយអឺរ៉ុប និងអ៊ុយក្រែន ចំពោះសេចក្តីព្រាងផែនការរបស់សហរដ្ឋអាមេរិក ដើម្បីបញ្ចប់សង្គ្រាមនៅអ៊ុយក្រែន មិនបានជួយឲ្យឱកាសនៃសន្តិភាពយូរអង្វែងប្រសើរឡើងនោះទេ។

យោង​តាម​ Telegraph លោក Yuri Ushakov បាន​និយាយ​ថា ការផ្លាស់ប្តូរដែលចង់បានដោយអ្នកចរចាអឺរ៉ុប និងអ៊ុយក្រែន បន្ទាប់ពីមានការព្រួយបារម្ភថា សំណើដើមរបស់​អាមេរិកមានលក្ខណៈលម្អៀងទៅរកទីក្រុងមូស្គូនោះ នឹងមិនធ្វើឲ្យ​ឯកសារនេះអាចយកទៅអនុវត្តបានកាន់តែប្រសើរឡើយ។ លោកបានបន្ថែមថា លោកមិនទាន់បានឃើញអត្ថបទដែលបានកែសម្រួលនោះទេ ប៉ុន្តែលោកជឿ​ថា វានឹងមិនជួយជំរុញឲ្យមានដំណោះស្រាយឡើយ។

ការអត្ថាធិប្បាយរបស់លោក Ushakov បានធ្វើឡើងបន្ទាប់ពីបេសកជនរបស់លោកពូទីន គឺលោក Kirill Dmitriev បានជួបជាមួយបេសកជនពិសេស​អាមេរិក លោក Steve Witkoff និងលោក Jared Kushner នៅរដ្ឋផ្លរីដា បន្ទាប់ពីកិច្ចពិភាក្សាមុនៗរបស់​អាមេរិកជាមួយមន្ត្រីអ៊ុយក្រែន និងអឺរ៉ុប។

ការចរចាទាំងនេះផ្តោតសំខាន់លើបញ្ហាថា តើទីក្រុងមូស្គូនឹងយល់ព្រមបញ្ចប់សង្គ្រាម ដែលជាសង្គ្រាមដ៏សាហាវបំផុតនៅអឺរ៉ុបចាប់តាំងពីសង្គ្រាមលោកលើកទីពីរមកនេះដែរឬទេ ហើយថាតើកិច្ចព្រមព្រៀងដែលសម្របសម្រួលដោយ​អាមេរិក អាចនឹងមាននិរន្តរភាពដែរឬទេ ចំពេលដែលមានការបែកបាក់គ្នាយ៉ាងខ្លាំងរវាងរុស្ស៊ី អ៊ុយក្រែន និងក្រុមអ្នកគាំទ្រលោកខាងលិច៕

ប្រែសម្រួល៖ ឈាង