ផ្លូវការ! រកឃើញក្រុមខ្លាំងឡើងវគ្គ ១៦ ក្រុមចុងក្រោយ ពានសម្តេចតេជោថ្នាក់ជាតិ

ការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ រដូវកាល ២០២៥/២៦ បានរកឃើញគ្រប់ក្រុមឡើងមកកាន់វគ្គ ១៦ ក្រុមចុងក្រោយ​ថ្នាក់​ជាតិ​ហើយ ខណៈក្រុមខេត្តបាត់ដំបង គឺជាក្រុម ទទួលបានកៅអីចុងក្រោយគេ។

ក្រុមខេត្តបាត់ដំបង បានទទួលកៅអីឡើងមកកាន់វគ្គ ១៦ ក្រុមពានសម្តេចតេជោថ្នាក់ជាតិរដូវកាល ២០២៥/២៦ បន្ទាប់ពីឆ្លងកាត់ការប្រកួតវគ្គជម្រុះកាលពីរសៀលថ្ងៃទី ៣០ ខែ​ធ្នូ ឆ្នាំ ២០២៥ ម្សិលមិញ ដោយយកឈ្នះលើក្រុមខេត្ត កំពង់ស្ពឺ ក្នុងលទ្ធផល ១០ ទល់នឹង ០។

ដូច្នេះក្រុមទាំង ១៦ ដែលឡើងមកកាន់វគ្គ ១៦ ក្រុមបានរកឃើញអស់ហើយ ដោយក្រុមក្នុងលីគកំពូលកម្ពុជា Cambodian Premier League មានចំនួន ១១ ក្រុម រួមមាន ព្រះខ័នរាជស្វាយរៀង ភ្នំពេញក្រោន អង្គរថាយហ្គឺរ បឹងកេត ណាហ្គាវើលដ៍ អឹមអូអាយ កំពង់ដេវ៉ា វិសាខា កងយោធពលខេមរភូមិន្ទ គិរីវង្សសុខសែនជ័យ អាយអេសអាយ ដង្កោរសែនជ័យ និង ឡាយហ្វ ខេត្តព្រះសីហនុ។

ចំណែក ៥ ក្រុមទៀត ទទួលបានកៅអីមកពីការប្រកួតពានរង្វាន់សម្តេចតេជោថ្នាក់ខេត្ត រួមមាន ភ្នំពេញហ្គាឡាក់ស៊ី ខេត្តត្បូងឃ្មុំ ឡាយអ៉ិនឃីង​ខេត្តសៀមរាប ខេត្តកំពង់ចាម និងខេត្តបាត់ដំបង។

គួរបញ្ជាក់ ថា ក្រុមជើងឯកនៃពានសម្តេចតេជោថ្នាក់ខេត្ត បានទៅលើក្រុមខេត្ត កំពង់ចាម បន្ទាប់ពីពួកគេយកឈ្នះលើក្រុមឡាយអ៉ិនឃីង ខេត្តសៀមរាបនៅវគ្គផ្តាច់ព្រ័ត្រក្នុងលទ្ធផល ២ ទល់នឹង ១៕

អត្ថបទ៖ សេម កុសល