លោកត្រាំ អះអាងថា អាមេរិកចំណេញពីជំនួយឲ្យទៅអ៊ុយក្រែន តាមរយៈកិច្ចព្រមព្រៀង«រ៉ែកម្រ»

ប្រធានាធិបតីអាមេរិក លោក ដូណាល់ ត្រាំ បានប្រាប់អ្នកយកព័ត៌មានកាលពីថ្ងៃចន្ទ​ទី​៥​ខែ​មករា​ឆ្នាំ​២០២៦ថា រដ្ឋបាលរបស់លោក រំពឹងនឹងទទួលបានមកវិញនូវទឹកប្រាក់ចំនួន៣៥០​ពាន់លានដុល្លារ ដែលធ្លាប់ចំណាយលើជំនួយដល់អ៊ុយក្រែន ឬអាច «លើសពីនេះទៅទៀត» តាមរយៈកិច្ចព្រមព្រៀងដ៏សំខាន់មួយពាក់ព័ន្ធនឹងធនធានធម្មជាតិរបស់ប្រទេស​មួយនេះ។

យោង​តាម​សារព័ត៌មាន Pravda ថ្លែងនៅលើយន្តហោះ Air Force One លោកត្រាំបានអះអាងថា សង្គ្រាមនៅអ៊ុយក្រែនបានឈប់ក្លាយជាបន្ទុកសេដ្ឋកិច្ចសម្រាប់​អាមេរិកហើយ ដោយសារទីក្រុងវ៉ាស៊ីនតោន កំពុងទទួលបានការទូទាត់សម្រាប់រាល់ការបញ្ជូនជំនួយយោធាទៅកាន់ទីក្រុងកៀវ។

លោកប្រធានាធិបតី បានលើកឡើងពី «កិច្ចព្រមព្រៀងរ៉ែកម្រ» ថាជាយន្តការចម្បងក្នុងការដណ្តើមយកមកវិញនូវមូលនិធិទាំងឡាយ ដែលលោកអះអាងថាត្រូវបាន «ផ្ដល់ឲ្យទទេៗ» ដោយរដ្ឋបាលមុន។ ការលើកឡើងរបស់លោកត្រាំ កើតឡើងបន្ទាប់ពីមានការផ្លាស់ប្តូរគោលនយោបាយអាមេរិក-អ៊ុយក្រែន ទៅជាទម្រង់ពាណិជ្ជកម្ម រួមទាំងការចាប់ផ្ដើមកម្មវិធី «បញ្ជីតម្រូវការអាទិភាពអ៊ុយក្រែន (PURL)» កាលពីខែកក្កដា​ឆ្នាំ២០២៥។ ក្រោមកម្មវិធីដែលសម្របសម្រួលដោយអង្គការ​ណាតូនេះ សម្ព័ន្ធមិត្តអឺរ៉ុប គឺជាអ្នកចេញថ្លៃសម្រាប់ការបញ្ជូនឧបករណ៍យោធាអាមេរិកពីឃ្លាំងស្តុកដែលមានស្រាប់ទៅ​ឲ្យអ៊ុយក្រែន ដែលនេះប្រៀបដូចជាការបង្កើតទីផ្សារលក់អាវុធសម្រាប់ឧស្សាហកម្មការពារជាតិអាមេរិក។

នៅក្នុងសន្និសីទដដែល​នោះ លោកត្រាំ ក៏បានលើកឡើងពីតួលេខអ្នកបាត់បង់ជីវិតដ៏គួរ​ឲ្យរន្ធត់ ដោយលោកអះអាងថា មានទាហានចន្លោះពី ២៥០០០ ទៅ ៣០០០០នាក់ ត្រូវបានសម្លាប់នៅក្នុងសង្គ្រាម​រុស្ស៊ី-អ៊ុយក្រែន​ជារៀងរាល់ខែ។ ទោះបីជាលោកបានបញ្ជាក់ជាថ្មីនូវបំណងចង់បញ្ចប់សង្គ្រាមតាមរយៈការចរចាក៏ដោយ ក៏លោកប្រធានាធិបតីនៅតែសង្កត់ធ្ងន់លើគោលនយោបាយ «America First» ចំពោះជំនួយបរទេស។ ជំហរនេះបានបង្ក​ឲ្យមានប្រតិកម្មចម្រុះពីសម្ព័ន្ធមិត្តអឺរ៉ុប ខណៈដែលប្រទេសខ្លះគាំទ្រយន្តការ PURL ចំពោះភាពរហ័សទាន់ចិត្ត ប៉ុន្តែប្រទេសខ្លះទៀតបង្ហាញកង្វល់អំពីអធិបតេយ្យភាពរយៈពេលវែងលើធនធានរ៉ែរបស់អ៊ុយក្រែន ដែលជាសមាសធាតុសំខាន់សម្រាប់ថាមពលបៃតង និងការផលិតបច្ចេកវិទ្យាកម្រិតខ្ពស់៕

ប្រែសម្រួល៖ ឈាង