ថៃ ថា ការវាយប្រហារនៅភាគខាងត្បូងជាអំពើអមនុស្សធម៌ រំលោភគោលការណ៍អន្តរជាតិ

កងទ័ពជើងគោកថៃបានប្រតិកម្មខ្លាំងៗទៅនឹងការបំផ្ទុះគ្រាប់បែកបំផ្លាញស្ថានីយ៍ប្រេងឥន្ធនៈចំនួន១១កន្លែង នៅភាគខាងត្បូង ដោយថ្កោលទោសការវាយប្រហារទាំងនោះថាជាអំពើអមនុស្សធម៌ បំផ្លាញសន្តិភាពនិងរំលោភលើគោលការណ៍អហិង្សាស្របតាមស្ដង់ដារអន្តរជាតិ។

តាមការផ្សាយរបស់ Amarin, អ្នកនាំពាក្យកងទ័ពជើងគោកថៃ Winthai Suvari បាននិយាយកាលពីថ្ងៃអាទិត្យទី១១ខែមករាឆ្នាំ២០២៦ថា៖ «ការវាយប្រហារទាំងនេះធ្វើឲ្យប៉ះពាល់ដោយផ្ទាល់ដល់សុវត្ថិភាពជីវិត ទ្រព្យសម្បត្តិ និងហេដ្ឋារចនាសម្ព័ន្ធសាធារណៈរបស់ប្រជាពលរដ្ឋស៊ីវិល ហើយវាគឺជាការប៉ុនប៉ងបង្កឲ្យមានអំពើហិង្សា ភាពភ័យខ្លាច និងបំផ្លាញដល់សន្តិភាពនៅក្នុងតំបន់»។

អ្នកនាំពាក្យដដែលបន្តថា ហេតុការណ៍នេះគឺជាការរំលោភច្បាប់ដោយចេតនានិងធ្ងន់ធ្ងរបំផុត ជាអំពើអមនុស្សធម៌ និងមានផលប៉ះពាល់យ៉ាងធំធេង ដល់សន្តិសុខសណ្តាប់ធ្នាប់សាធារណៈ។ រាល់ទម្រង់នៃអំពើហិង្សាមិនមែនជាដំណោះស្រាយចំពោះបញ្ហាទេ ហើយក៏ជាអ្វីដែលមិនអាចទទួលយកបានដែរ។

ទន្ទឹមនោះ Winthai ក៏សង្កត់ធ្ងន់ផងដែរលើការអនុវត្តច្បាប់យ៉ាងតឹងរ៉ឹង ដើម្បីនាំខ្លួនជនល្មើសមកកាត់ទោសតាមផ្លូវច្បាប់។

សូមជម្រាបជាថ្មី កាលពីអាធ្រាត្រថ្ងៃសៅរ៍ឈានដល់ចូលថ្ងៃអាទិត្យ មានការវាយប្រហារបំផ្ទុះគ្រាប់បែកបំផ្លាញស្ថានីយ៍ប្រេងឥន្ធនៈចំនួន១១កន្លែងនៅខេត្ត៣នាភាគខាងត្បូងដូចជា Pattani, Yala និង Narathiwat។

មិនទាន់មានការចាប់ខ្លួនអ្នកវាយប្រហារបាននៅឡើយទេ ប៉ុន្តែអាជ្ញាធរថៃបានចង្អុលចំៗទៅក្រុមផ្តាច់ខ្លួន ថាជាអ្នកនៅពីក្រោយរឿងនេះ។

ក្រោយមក ថៃក៏​​ដាក់ចេញ​បម្រាមគោ​ចរ​ចាប់ពីម៉ោង​​៩​យប់ដល់​ម៉ោង​៥ទៀបភ្លឺ​នៅភាគខាងត្បូង និងកំពុងគិតគូរចាត់វិធានការរឹតបន្តឹងសន្តិសុខបន្ថែមទៀត៕

អត្ថបទ៖ សុខ សុវណ្ណ