ព័ត៌មានអន្ដរជាតិ

អាជ្ញាធរថៃខេត្តណារ៉ាធីវ៉ាត់ ប្រកាសដាក់បម្រាមគោចរចាប់ម៉ោង៩យប់ដល់៥ទៀបភ្លឺ

បានផុស

៦ ខែ មុន

នៅ

ថ្ងៃអាទិត្យ ១១ មករា ២០២៦

ដោយ

អាជ្ញាធរថៃនៅខេត្តណារ៉ាធីវ៉ាត ភាគខាងត្បូងប្រទេសថៃ បានដាក់ចេញបម្រាមគោចរចាប់ពីម៉ោង៩យប់ដល់ម៉ោង៥ទៀបភ្លឺចាប់ពីរាត្រីថ្ងៃទី១១ខែមករានេះ បន្ទាប់ពីការវាយប្រហារដោយគ្រាប់បែកដ៏កក្រើកនៅយប់ថ្ងៃទី១០ខែមករា ដែលបណ្តាលឲ្យមនុស្សមួយចំនួនរងរបួស និងស្ថានីយប្រេងសាំង PTT ១១កន្លែងឆេះនៅខេត្ត៣ផ្សេងគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានថៃ Khaosod បានរាយការណ៍ថា ក្រុមការងារនៃខេត្តណារ៉ាធីវ៉ាត់ បានប្រកាសនូវបម្រាមគោចរ ដោយហាមការធ្វើដំណើរចេញពីផ្ទះចន្លោះពីម៉ោង៩យប់ដល់ម៉ោង៥ទៀបភ្លឺ នៅគ្រប់ស្រុកទាំងអស់ចាប់ពីយប់នេះរហូតដល់មានការជូនដំណឹងថ្មី។

យោងសេចក្តីរាយការណ៍របស់ទីភ្នាក់ងារព័ត៌មានបារាំង AFP ដោយដកស្រង់ប្រភពពីមន្ត្រីយោធា ក្នុងការបំផ្ទុះគ្រាប់បែកទាំង១១ទីតាំងនៅខេត្ត៣ផ្សេងគ្នានោះ មានអ្នករងរបួសចំនួន៤នាក់។

ការវាយប្រហារដោយការបំផ្ទុះគ្រាប់បែកនៅតាមស្ថានីយប្រេងសាំង PTT នៅខេត្តចំនួន៣ស្ថិតនៅភាគខាងត្បូងប្រទេសថៃ មានខេត្តណារ៉ាធីវ៉ាត់់ ខេត្តផាតានី និងខេត្តយ៉ាឡា ជាទីដែលមានអំពើហិង្សាដោយសារការវាយប្រហារដោយគ្រាប់បែកនេះជាញឹកញាប់។ ប៉ូលិសដាក់ការសង្ស័យលើក្រុមបំបែកទាមទារបំបែករដ្ឋ។

ប៉ុន្តែ នាយករដ្ឋមន្ត្រីថៃលោក អានុទីន ឆានវីរៈគុល បានច្រានចោលការវាយប្រហារនោះជាប់ពាក់ព័ន្ធដល់ក្រុមទាមទារបំបែករដ្ឋ ប៉ុន្តែវាជាប់ពាក់ព័ន្ធដល់ការបោះឆ្នោតទៅវិញ។ នេះបើយោងតាមសារព័ត៌មានថៃ ដែលមិនបានផ្តល់សេចក្តីរាយការលម្អិតពីរបៀបដែលការវាយប្រហារនោះពាក់ព័ន្ធនឹងកិច្ចការបោះឆ្នោតនៅខែកុម្ភៈខាងមុខ។

ប៉ូលិស ដែលត្រូវបានដកស្រង់ពីអ្នកសារព័ត៌មានថៃ បាននិយាយថា ក្រុមវាយប្រហារ បានធ្វើដំណើរជាក្រុមប្រដាប់ដោយកាំភ្លើងវែង និងដាក់បង្កៃគ្រាប់ផ្ទុះ កំណត់ពេលឲ្យផ្ទុះ នៅស្ថានីយសាំងនិងហាងអាហារ ស៊ីតែនសាំង៕

រ៉ាន់ រើយ