​រដ្ឋបន្តលើកទឹកចិត្តគម្រោងវិនិយោគ ២៤ ​តម្លៃ ២០៨ លានដុល្លារ នៅខេត្តព្រះសីហនុ​

រាជរដ្ឋាភិបាលបានសម្រេចផ្ដល់គោលការណ៍លើកទឹកចិត្តពិសេសដល់គម្រោងចំនួន ២៤ ក្នុងនោះ គម្រោងពាក់ព័ន្ធនឹងអគារកំពុងជាប់គាំងចំនួន ៨, គម្រោងថ្មី ចំនួន ១៥ និងគម្រោងពង្រីកចំនួន ១ ដែលមានទុនវិនិយោគសរុបប្រមាណ ២០៨ លានដុល្លារអាមេរិក និងអាចបង្កើតការ​ងារ​បាន​ប្រមាណ ៣ ពាន់កន្លែង។

ការសម្រេចនេះ បានធ្វើឡើងក្នុងពេលលោកបណ្ឌិតសភាចារ្យ ហ៊ាន សាហ៊ីប ​ប្រធាន​ក្រុមការ​ងារជំរុញការវិនិយោគក្នុងខេត្តព្រះសីហនុដឹកនាំកិច្ចប្រជុំ នៅថ្ងៃទី ១៣ ខែមករា ឆ្នាំ ២០២៦ ​ដើម្បីពិនិត្យ​លើការ​ស្នើការ​លើកទឹកចិត្ត ការអនុគ្រោះ និងការសម្រួលនីតិវិធី ដែលជាការលើក​ទឹកចិត្តពិសេស ក្នុងខេត្តព្រះសីហនុ។

​គម្រោងទាំង ២៤ នេះ មានរោងចក្រផលិត និងដំឡើងឧបករណ៍ចម្អិន, រោងចក្រផលិត​ប្រេងសម្រាប់​ឧស្សាហកម្មកែច្នៃផលិតផលកៅស៊ូ, រោងចក្រផលិតសម្ភារៈពេទ្យ, គម្រោងរោង​ចក្រកែច្នៃម្សៅត្រី, អគារពហុមុខងារ និងអគារស្នាក់នៅរួម។

​បន្ទាប់ពីក្រុមការងារសម្រេចជាគោលការណ៍ផ្តល់ ការលើកទឹកចិត្តពិសេសដល់គម្រោងនានាហើយ, ក្រុមការងារ និង ក្រសួង ស្ថាប័ន ត្រូវបន្តជួយសម្របសម្រួល ដោះស្រាយបញ្ហា សំណូមពរ សម្រួលនីតិវិធី និងផ្តល់ការលើកទឹកចិត្តជាក់ស្តែង ដូចជា ការលើកទឹកចិត្តផ្នែកពន្ធដារ ផ្នែកគយ និងការផ្តល់អាជ្ញាបណ្ណ លិខិតអនុញ្ញាត និងវិញ្ញាបនបត្រ រួមទាំងការចុះបញ្ជីក្រុមហ៊ុន និងការចេញប្រកាសបើករោងចក្រ ជាដើម ដើម្បីឱ្យវិនិយោគិន អាចដំណើរការវិនិយោគដោយរលូន។

រាជរដ្ឋាភិបាលសម្រេចឯកភាពជាគោលការណ៍ក្នុងការបន្តអនុវត្តកម្មវិធីពិសេសជំរុញការវិនិយោគក្នុងខេត្តព្រះសីហនុ រយៈពេល ២ ឆ្នាំ រហូតដល់ដំណាច់ឆ្នាំ ២០២៧ ដោយបន្ថែមវិធានការចំនួន ៤ ទៀត ដើម្បីបន្តជំរុញសកម្មភាពវិនិយោគ និង ធុរកិច្ច សំដៅប្រែក្លាយខេត្តព្រះសីហនុឱ្យ​ទៅជាតំបន់សេដ្ឋកិច្ចពិសេស​គំរូពហុបំណង និងជាប៉ូលសេដ្ឋកិច្ចដ៏រឹងមាំ។

​ក្រុមការងារមានភារកិច្ចស្នូល ឬការងារសំខាន់ៗចំនួន ៤ ៖ ការងារទី១ គឺផ្តល់គោលការណ៍​លើកទឹកចិត្ត, ការងារទី២ គឺផ្តល់ការលើកទឹកចិត្តជាក់ស្តែង, ការងារទី៣ គឺខិតខំជំរុញការប្រើប្រាស់​កម្លាំងពលកម្មក្នុងស្រុក ឱ្យបានជាអតិបរិមា និង ការពង្រឹងសមត្ថភាពកម្មករ និយោជិត និងផលិតករ រួមទាំង ការផ្ទេរជំនាញ និងបច្ចេកវិទ្យា, និងការងារទី៤ គឺជំរុញការប្រើប្រាស់វត្ថុធាតុ​ដើមក្នុងស្រុក និងការតភ្ជាប់ឧស្សាហកម្ម។​

គិតរហូតមកដល់ពេលនេះ ក្រុមការងារបានសម្រេចជាគោលការណ៍ផ្តល់ការលើកទឹកចិត្តដល់គម្រោង​ចំនួន ៤១២ ដែលមានទុនវិនិយោគសរុបប្រមាណ ៧ ៩៧១ លានដុល្លារអាមេរិក និង​អាច​បង្កើតការងារ ៥២ ០០៤ កន្លែង។ ​

គម្រោងវិនិយោគពាក់ព័ន្ធអគារជាប់​គាំង​ចំនួន ១៩៤ គម្រោង, គម្រោងវិនិយោគថ្មី ១៧៨ គម្រោង, គម្រោងពង្រីក ២៥ គម្រោង និងគម្រោង​វិនិយោគមានស្រាប់ ១៥ គម្រោង៕