អនុប្រធានព្រឹទ្ធសភា លើកឡើងពីតួនាទីរបស់អាជ្ញាធរមូលដ្ឋានដើម្បីរួមចំណែកលុបបំបាត់អំពើឆបោកអនឡាញ

អនុប្រធានទី២ព្រឹទ្ធសភា លោក ធន់ វឌ្ឍនា បានលើកឡើងពីតួនាទីដ៏សំខាន់របស់អាជ្ញាធរមូលដ្ឋាន ក្នុងការចូលរួមជាចំណែកមួយដើម្បីលុបបំបាត់នូវអំពើឆបោកតាមប្រព័ន្ធអនឡាញ (online scams) ដែលមាននៅក្នុងមូលដ្ឋានរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពេលជួបជាមួយសមាជិកក្រុមប្រឹក្សាសង្កាត់ អាជ្ញាធរមូលដ្ឋាន មកពីសង្កាត់ទាំង៧ ក្នុងខណ្ឌបឹងកេងកង កាលពីរសៀលថ្ងៃទី១៦ ខែមករា ឆ្នាំ២០២៦ លោក ធន់ វឌ្ឍនា បានសង្កត់ធ្ងន់ថា អាជ្ញាធរសង្កាត់ មានតួនាទីសំខាន់ខ្លាំងក្នុងការតាមដាន និងលុបបំបាត់ការឆបោកតាមអនឡាញ (online scams)។ សម្រាប់លោក ធន់ វឌ្ឍនា ការឆបោកអនឡាញនេះ កើតឡើងនៅច្រើនប្រទេស ទាំងនៅអាស៊ី អាម៉េរិក អាហ្រ្វិក និងមានយូរណាស់មកហើយ។

«ដូច្នេះយើងត្រូវរួមគ្នាលុបបំបាត់អំពើឆបោកនេះ ដើម្បីផ្តល់ទំនុកចិត្តដល់ទេសចរ មកកម្សាន្តនៅប្រទេសយើងច្រើនថែមទៀត»។ លោក ធន់ វឌ្ឍនា លើកឡើងយ៉ាងដូច្នេះ បើយោងតាមខ្លឹមសារចុះផ្សាយលើបណ្ដាញសង្គមរបស់ព្រឹទ្ធសភា។ លោកអនុប្រធានទី២ព្រឹទ្ធសភា ក៏បានផ្ដាំផ្ញើដល់អាជ្ញាធរមូលដ្ឋាន ឱ្យបន្តយកចិត្តទុកដាក់បន្ថែមទៀតចំពោះបញ្ហាសន្តិសុខសង្គម ដោយបន្តអនុវត្តគោលនយោបាយភូមិឃុំមានសុវត្ថិភាព ជាពិសេសលុបបំបាត់ការឆបោកអនឡាញនេះតែម្ដង។

លោក បានកោតសរសើរថ្នាក់ដឹកនាំសង្កាត់ និងខណ្ឌបឹងកេងកងទាំងអស់ ដែលខិតខំផ្តល់សេវាសាធារណៈសន្តិសុខ សុវត្ថិភាព និងទទួលបានការទុកចិត្តពីប្រជាពលរដ្ឋ។ ការខិតខំរបស់អាធរសង្កាត់ និងខណ្ឌ លោក ធន់ វឌ្ឃនា ថា បានធ្វើឱ្យខណ្ឌបឹងកេងកង ជាខណ្ឌសម្បូរទៅដោយតំបន់ទីប្រជុំជន ហាងអាហារចម្រុះជាតិសាសន៍ និងតំបន់ពាណិជ្ជកម្មជាច្រើនទៀត។

លោក បានបន្ថែមថា ក្នុងស្ថានភាពប្រទេសជាតិកំពុងប្រឈមនឹងបញ្ហាទាំងកត្តាខាងក្រៅ និងខាងក្នុង កម្ពុជាត្រូវរួបរួមសាមគ្គីភាព និងខិតខំបំពេញតួនាទីរបស់ខ្លួនឱ្យបានល្អប្រសើរ ដើម្បីធានាប្រក្រតីភាពសង្គម និងការអភិវឌ្ឍប្រទេសជាតិ ជាពិសេសត្រូវខិតខំសម្រេចឱ្យបានតាមការសន្យាទាំង៧ ចំណុច ដែលបានឃោសនាបោះឆ្នោតកន្លងមក និងមាននៅក្នុងគោលនយោបាយអភិវឌ្ឍឃុំសង្កាត់ ឆ្នាំ២០២២-២០២៧៕