ព័ត៌មានជាតិ

ទីតាំងកប់សពសហគមន៍ជនជាតិដើមភាគតិចក្លាយជាទីតាំងទាក់ទាញទេសចរនៅខេត្តភាគឦសាន

បានផុស

៣ ខែ មុន

នៅ

ថ្ងៃអាទិត្យ ១២ មេសា ២០២៦

ដោយ

ទីតាំងកប់សពរបស់សហគមន៍ជនជាតិភាគតិចក្នុងខេត្តរតនគិរី បានក្លាយជាគោលដៅមួយដែលទេសចរចង់ទៅទស្សនា ដើម្បីសិក្សាស្វែងយល់ពីវប្បធម៌របស់ជនជាតិដើមភាគតិចក្នុងខេត្តភាគឦសាន។

លោក ញ៉ែម សំអឿន អភិបាលខេត្តរតនគិរីបានប្រាប់ថា ទីតាំងកប់សពរបស់ជនជាតិដើមភាគតិច ស្ថិតនៅឃុំកាចូននៅក្នុងស្រុកវ៉ឺនសៃ ខេត្តរតនគិរី។

លោកថា ទីតាំងបុរាណដ្ឋាននេះបានក្លាយជាគោលដៅទេសចរណ៍មួយ ដែលតែងតែទទួលបានការចាប់អារម្មណ៍ពីភ្ញៀវទៅទស្សនាជាហូហែរ ដើម្បីស្វែងយល់ពីប្រពៃណីកប់សពរបស់ជនជាតិដើមភាគតិចនៅភូមិភាគឦសាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីទីតាំងវប្បធម៌របស់ជនជាតិដើមភាគតិច លោក ញ៉ែម សំអឿន បានបញ្ជាក់ថា នៅក្នុងខេត្តរតនគីរីនៅមានតំបន់ប្រវត្តិសាស្ត្រ និងទេសចរណ៍ផ្សេងទៀត ក្នុងនោះមានសំណង់ប្រាសាទបុរាណ និងដំណាក់ជិះដំរីរបស់ព្រះករុណានៅស្រុកលំផាត់។

លោកថា ដំណាក់ជិះដំរីរបស់អតីតព្រះមហាក្សត្រខ្មែរ បច្ចុប្បន្ននៅសល់ស្ពាននិងជណ្ដើរជាមរតកបន្សល់ទុកមកដល់បច្ចុប្បន្ននេះ។

ពាក់ព័ន្ធទីតាំងកេរ្តិ៍មករតរបស់អតីតព្រះមហាក្សត្រខ្មែរនេះ អាជ្ញាធរបានណែនាំមិនឲ្យមានការប៉ះពាល់ឬធ្វើអ្វីនោះឡើយ ដោយត្រូវរក្សាស្ថានភាពដើមឲ្យនៅដដែលទាំងស្រុង ដើម្បីថែរក្សាមរតកក្នុងការទាក់ទាញភ្ញៀវទេសចរទៅកម្សាន្តនិងសិក្សាស្វែងយល់៕