ធ្លាក់យន្តហោះឯកជនមួយគ្រឿង នៅអាមេរិក ខណៈជោគវាសនាអ្នកដំណើរពុំទាន់ដឹង

យន្តហោះឯកជនមួយគ្រឿងបានឆេះធ្លាក់នៅពេលវាកំពុងហោះចេញពីអាកាសយានដ្ឋាន Maine កាលពីថ្ងៃអាទិត្យ ទី២៥ ខែមករា ដោយផ្ទុកអ្នកដំណើរ៨នាក់ នេះបើយោងតាមនិយតករអាកាសចរណ៍សហរដ្ឋអាមេរិក ប៉ុន្តែជោគវាសនា និងអត្តសញ្ញាណរបស់ពួកគេ មិនទាន់ដឹងនូវឡើយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្លាក់យន្តហោះ Bombardier Challenger 650 នៅអាកាសយានដ្ឋានអន្តរជាតិ Bangor បានកើតឡើងនៅម៉ោងប្រហែល ៧:៤៥ យប់ នេះបើយោងតាមសេចក្តីថ្លែងការណ៍របស់រដ្ឋបាលអាកាសចរណ៍សហព័ន្ធ ដោយបន្ថែមថា ខ្លួនមានគម្រោងស៊ើបអង្កេតលើការធ្លាក់មួយនេះ ដោយសារតែបច្ចុប្បន្នព័ត៌មានលម្អិតតិចតួចណាស់ ប៉ុន្តែមន្ត្រីរដ្ឋាភិបាលម្នាក់ដែលបានជូនដំណឹងអំពីបញ្ហានេះបានប្រាប់ Reuters ថា មានអគ្គីភ័យធ្ងន់ធ្ងរមួយ បន្ទាប់ពីការធ្លាក់យន្តហោះភ្លាមៗ។

ផ្អែកតាមរបាយការណ៍អាកាសធាតុបានបញ្ចាក់ថា ព្យុះព្រិលបានចាប់ផ្តើមធ្លាក់នៅអាកាសយានដ្ឋាន មុនពេលធ្លាក់យន្តហោះ ប៉ុន្តែអាជ្ញាធរមិនបានផ្តល់ការចង្អុលបង្ហាញភ្លាមៗថា អាកាសធាតុដើរតួនាទីក្នុងគ្រោះថ្នាក់នោះទេ ស្របពេលដែលការព្រមានអំពីព្យុះរដូវរងាបានគ្របដណ្តប់ភាគច្រើននៃរដ្ឋ Maine រួមទាំង Bangor ដែលជាទីក្រុងធំទីបីរបស់រដ្ឋ។

យោងតាមកំណត់ត្រាសហព័ន្ធ យន្តហោះបានចុះបញ្ជីថាជាកម្មសិទ្ធិរបស់ក្រុមហ៊ុនមួយនៅទីក្រុងហ៊ូស្តុន រដ្ឋតិចសាស។ ដូច្នេះហើយ រដ្ឋបាលអាកាសចរណ៍សហព័ន្ធសហរដ្ឋអាមេរិក (FAA) នឹងសម្របសម្រួលជាមួយក្រុមប្រឹក្សាសុវត្ថិភាពដឹកជញ្ជូនជាតិ (NTSB) ដើម្បីស៊ើបអង្កេតឧប្បត្តិហេតុនេះ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

នាយករដ្ឋមន្ត្រីកាណាដា លែងពាក់ព័ន្ធនឹងពាណិជ្ជកម្មជាមួយចិនហើយ ក្រោយត្រាំ ព្រមានដាក់ពន្ធ១០០%