នាយករដ្ឋមន្ត្រីកាណាដា លែងពាក់ព័ន្ធនឹងពាណិជ្ជកម្មជាមួយចិនហើយ ក្រោយត្រាំ ព្រមានដាក់ពន្ធ១០០% 

នាយករដ្ឋមន្ត្រីកាណាដា លោក Mark Carney បានមានប្រសាសន៍កាលពីថ្ងៃទី ២៥ ខែមករា ថា កាណាដាគ្មានបំណងក្នុងការបន្តកិច្ចព្រមព្រៀងពាណិជ្ជកម្មសេរីជាមួយប្រទេសចិនទៀតទេ ខណៈដែលប្រធានាធិបតីអាមេរិក ដូណាល់ ត្រាំ គំរាមដាក់ពន្ធគយ១០០ភាគរយ ប្រសិនបើប្រទេសនេះធ្វើកិច្ចព្រមព្រៀងជាមួយចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងារ CBC នៅក្នុងកិច្ចព្រមព្រៀងពាណិជ្ជកម្មសេរីរវាងកាណាដា និងសហរដ្ឋអាមេរិក និងម៉ិកស៊ិក ភាគីនានាសន្យាថានឹងមិនចរចា ឬចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយ «សេដ្ឋកិច្ចមិនមែនទីផ្សារ» ដោយគ្មានការជូនដំណឹងជាមុននោះទេ។

សេចក្តីថ្លែងការណ៍របស់លោក Carney បានកើតឡើង បន្ទាប់ពីប្រធានាធិបតីអាមេរិកត្រាំ គំរាមកំហែងដាក់ពន្ធ ១០០ ភាគរយលើការនាំចូលពីកាណាដា ប្រសិនបើប្រទេសនេះសម្រេចបានកិច្ចព្រមព្រៀងពាណិជ្ជកម្មជាមួយចិន។ លោកត្រាំបានអះអាងថា ចិននឹងព្យាយាមប្រើប្រាស់កាណាដា ដើម្បីគេចវេសពន្ធនាំចូលពីសហរដ្ឋអាមេរិក។

លោកត្រាំបានសរសេរថា «ប្រសិនបើលោក Carney គិតថា គាត់អាចប្រែក្លាយប្រទេសកាណាដាទៅជាច្រកឆ្លងកាត់ សម្រាប់ប្រទេសចិនដើម្បីនាំទំនិញ និងផលិតផលចូលទៅក្នុងសហរដ្ឋអាមេរិក គាត់យល់ច្រឡំយ៉ាងខ្លាំង»។

លោក Scott Bessent រដ្ឋមន្ត្រីក្រសួងហិរញ្ញាវត្ថុសហរដ្ឋអាមេរិកក៏បាននិយាយផងដែរថា ប្រទេសកាណាដាមិនអាចត្រូវបានអនុញ្ញាតឲ្យក្លាយជាច្រកទ្វារសម្រាប់ប្រទេសចិន ដើម្បីលក់ទំនិញថោកៗ ចូលទៅក្នុងសហរដ្ឋអាមេរិកបានទេ។

នៅឆ្នាំ ២០២៤ កាណាដានឹងដើរតាមគន្លងអាមេរិកដោយដាក់ពន្ធ ១០០% លើយានយន្តអគ្គិសនី និង ២៥% លើអាលុយមីញ៉ូម និងដែកថែបដែលនាំចូលពីប្រទេសចិន។ ផ្ទុយទៅវិញ ទីក្រុងប៉េកាំងបានឆ្លើយតប ដោយដាក់ពន្ធនាំចូល ១០០% លើប្រេងកាណូឡា និងម្សៅ ព្រមទាំង ២៥% លើសាច់ជ្រូក និងអាហារសមុទ្រពីប្រទេសកាណាដាដូចគ្នា។

ក្នុងអំឡុងពេលទស្សនកិច្ចទៅកាន់ប្រទេសចិននៅពាក់កណ្តាលខែនេះ លោក Carney បានប្រឆាំងនឹងជំហររបស់សហរដ្ឋអាមេរិក ដោយយល់ព្រមកាត់បន្ថយពន្ធ ១០០% លើយានយន្តអគ្គិសនីរបស់ចិន ជាថ្នូរនឹងការដែលទីក្រុងប៉េកាំងបន្ថយពន្ធលើការនាំចេញពីប្រទេសកាណាដាដែលបានរៀបរាប់ខាងលើ។

សូមជម្រាបជូនថា មេដឹកនាំនៃប្រទេសកាណាដា និងសហរដ្ឋអាមេរិកនាពេលថ្មីៗនេះ បាន្រទាក់ក្រឡាជាមួយគ្នាក្នុងសង្គ្រាមពាក្យសម្តីជុំវិញបំណងប្រាថ្នារបស់រដ្ឋបាលលោកត្រាំក្នុងការកាន់កាប់កោះ Greenland ។ ប្រធានាធិបតីអាមេរិកបានប្រកាសនៅថ្ងៃទី ២២ខែមករាថា លោកកំពុងដកការអញ្ជើញរបស់លោកឲ្យចូលរួមក្រុមប្រឹក្សាសន្តិភាពដែលផ្តួចផ្តើមឡើង ជាមួយនឹងគោលដៅបញ្ចប់ជម្លោះនៅជុំវិញពិភពលោក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោកត្រាំ ព្រមានដាក់ពន្ធ១០០% លើកាណាដា ពាក់ព័ន្ធនឹងទំនាក់ទំនងពាណិជ្ជកម្មជាមួយចិន