ព័ត៌មានអន្ដរជាតិ

រុស្ស៊ីបញ្ជាក់ជំហរនៅប្រកៀកស្មាជាមួយចិន ក្នុងបញ្ហាដែនកោះតៃវ៉ាន់

បានផុស

៣ ខែ មុន

នៅ

ថ្ងៃចន្ទ ២ កុម្ភៈ ២០២៦

ដោយ

ទីភ្នាក់ងារព័ត៌មានរដ្ឋ TASS បានរាយការណ៍កាលពីថ្ងៃអាទិត្យថា លេខាធិការក្រុមប្រឹក្សាសន្តិសុខរុស្ស៊ី លោក Sergei Shoigu បានប្រាប់រដ្ឋមន្ត្រីការបរទេសចិន លោក វ៉ាង យី (Wang Yi) ថា ទីក្រុងមូស្គូនៅតែបន្តគាំទ្រ ទីក្រុងប៉េកាំងអំពីបញ្ហាជាមួយកោះតៃវ៉ាន់។

លោក វ៉ាង យី និង លោក Sergei Shoigu ។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរ៉យទ័រ ប្រទេសចិន និងរុស្ស៊ីបានពង្រឹងទំនាក់ទំនងយ៉ាងជិតស្និទ្ធក្នុងរយៈពេលប៉ុន្មានឆ្នាំចុងក្រោយនេះ ហើយបានប្រកាសភាពជាដៃគូយុទ្ធសាស្ត្រ «គ្មានដែនកំណត់» នៅប៉ុន្មានថ្ងៃមុន ពេលប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) បានបញ្ជូនទាហានរាប់ម៉ឺននាក់ ចូលប្រទេសអ៊ុយក្រែនក្នុងខែកុម្ភៈឆ្នាំ២០២២។

គួរបញ្ជាក់ថា ចិនចាត់ទុកតៃវ៉ាន់ក្នុងការគ្រប់គ្រងតាមបែបប្រជាធិបតេយ្យ ថា ជាទឹកដីរបស់ខ្លួន ហើយមិនបានបោះបង់ចោលការប្រើប្រាស់កម្លាំងលើកោះនេះឡើយ។ ទីក្រុងប៉េកាំងបានផ្តល់ជូនតៃវ៉ាន់នូវគំរូជា «ប្រទេសមួយ ប្រព័ន្ធពីរ» ស្រដៀងនឹងហុងកុង ទោះបីជាមិនមានគណបក្សនយោបាយធំណាមួយ នៅតៃវ៉ាន់គាំទ្រលើរឿងនេះក៏ដោយ។

យ៉ាងណា រុស្ស៊ីបាននិយាយម្តងហើយម្តងទៀតថា ខ្លួនប្រឆាំងនឹងឯករាជ្យភាពរបស់តៃវ៉ាន់ក្នុងគ្រប់រូបភាព ហើយចាត់ទុកកោះនេះជាផ្នែកមួយដែលមិនអាចបំបែកចេញពីចិនឡើយ។

បើតាមទីភ្នាក់ងារព័ត៌មាន TASS លោក Shoigu ថា៖«យើងឃើញជនទុច្ចរិតរបស់ចិន នៅតែបន្តធ្វើឱ្យស្ថានការណ៍ នៅច្រកសមុទ្រតៃវ៉ាន់មានអស្ថិរភាព។ ពួកយើងចង់បញ្ជាក់ឡើងវិញថា យើងនៅតែបន្តគាំទ្រដ៏ខ្ជាប់ខ្ជួន និងមិនផ្លាស់ប្តូរចំពោះទីក្រុងប៉េកាំង លើបញ្ហាលើកោះតៃវ៉ាន់ទេ»។

លោកបន្តទៀតថា៖ «យើងបន្តនៅពីក្រោយការពិត ដែលរដ្ឋាភិបាលនៃសាធារណៈរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់ដែលតំណាងឱ្យប្រទេសចិនទាំងអស់»។

គួរឱ្យដឹងថា លោក Shoigu អតីតរដ្ឋមន្ត្រីការពារជាតិរុស្ស៊ីបានមកដល់ប្រទេសចិន កាលពីព្រឹកថ្ងៃអាទិត្យ។

ក្រុមប្រឹក្សាសន្តិសុខរុស្ស៊ីបានឱ្យដឹងថា លោក Shoigu និង លោក Wang Yi នឹងជួបប្រជុំគ្នាដើម្បីពិភាក្សាអំពីបញ្ហាសន្តិសុខ។

មិនតែប៉ុណ្ណោះ លោក Wang បានលើកឡើងថា ប្រទេសចិន និងរុស្ស៊ីមាន «កាតព្វកិច្ច» អនុវត្តពហុភាគីនិយម និងតស៊ូមតិសម្រាប់ពិភពលោកពហុប៉ូលស្មើគ្នា ឱ្យមានរបៀបរៀបរយ។ នេះបើយោងតាមក្រសួងការបរទេសចិន។

លើសពីនេះ អ្នកការទូតកំពូលរបស់ប្រទេសចិនបានអំពាវនាវឱ្យប្រទេសទាំងពីររក្សាទំនាក់ទំនងជិតស្និទ្ធ លើបញ្ហាសំខាន់ៗ ទាក់ទងនឹងទំនាក់ទំនងទ្វេភាគី និងបង្កើនការគាំទ្រគ្នាទៅវិញទៅមកសម្រាប់ផលប្រយោជន៍ស្នូលទៅវិញទៅមក។

លោក Wang បានលើកឡើងទៀតថា ប្រទេសចិនមានឆន្ទៈក្នុងការធ្វើការជាមួយប្រទេសរុស្ស៊ី ដើម្បីពង្រឹងទំនាក់ទំនងជាយុទ្ធសាស្រ្ត និងបង្កើនទំនាក់ទំនងទ្វេភាគីនៅឆ្នាំនេះ៕

ប្រែសម្រួល៖ ណឺ មិនា