ចិន ជំរុញ​ការ​ចរចាលើបញ្ហា​អ៊ីរ៉ង់ និង ប្រកាសជំហរប្រឆាំងការផ្ទុះជម្លោះជាថ្មី

​ក្រោយ​ជំនួប​ពិភាក្សាជាមួយសមភាគីអ៊ីរ៉ង់ រដ្ឋមន្ត្រីការបរទេសចិន លោក វ៉ាង យី (Wang Yi) ​នៅ​ថ្ងៃពុធ ទី៦ ខែឧសភា បានអំពាវនាវឲ្យមានការបញ្ឈប់អរិភាពនៅក្នុងតំបន់​មជ្ឈិមបូព៌ា និងបានជំរុ​ញឲ្យសហរដ្ឋអាមេរិក ក៏ដូចជាអ៊ីរ៉ង់ បើកច្រកសមុទ្រ Hormuz ឡើងវិញ «ឲ្យបានឆាប់តាមដែលអាចធ្វើទៅបាន»។ នេះបើតាមការចុះផ្សាយពីសារព័ត៌មាន Xinhua។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍របស់ក្រសួងការបរទេសចិន បន្ទាប់ពីកិច្ចពិភាក្សាជាមួយលោក Abbas Araghchi នៅទីក្រុងប៉េកាំង លោក វ៉ាង យី បាននិយាយថា៖ «ចិនយល់ឃើញថា ការបញ្ឈប់ការប្រយុទ្ធគ្នាទាំងស្រុងត្រូវតែសម្រេចឲ្យបាន​ដោយគ្មានការពន្យារពេល ហើយការចាប់ផ្ដើមអរិភាពឡើងវិញ គឺជាអ្វីដែលមិនអាចទទួលយកបានឡើយ ខណៈការបន្តកិច្ចចរចានៅតែជាកត្តាចាំបាច់បំផុត»។

ប្រមុខការបរទេសចិនរូបនេះថែមទាំងលើកឡើងទៀតថា ចិនសង្ឃឹមថា ភាគីពាក់ព័ន្ធទាំងអស់នឹងឆ្លើយតបឲ្យបានឆាប់តាមដែលអាចធ្វើទៅបាន ចំពោះការអំពាវនាវយ៉ាងទទូចរបស់សហគមន៍អន្តរជាតិ ដើម្បីឲ្យមានការបន្តឡើងវិញនូវចរាចរណ៍ផ្លូវទឹកជាប្រក្រតី និងមានសុវត្ថិភាព ឆ្លងកាត់ច្រកសមុទ្រ Hormuz។

លោកបានបន្ថែមថា ចំពោះបញ្ហានុយក្លេអ៊ែរ ចិនស្វាគមន៍ចំពោះការប្តេជ្ញាចិត្តរបស់អ៊ីរ៉ង់ ក្នុងការមិនអភិវឌ្ឍអាវុធនុយក្លេអ៊ែរ ខណៈពេលដែលយល់ឃើញថា អ៊ីរ៉ង់មានសិទ្ធិស្របច្បាប់ក្នុងការប្រើប្រាស់ថាមពលនុយក្លេអ៊ែរក្នុងគោលបំណងសន្តិភាព។

នៅក្នុងសារចុងក្រោយនេះ លោក Wang បានសង្កត់ធ្ងន់ថា ចិននឹងខិតខំប្រឹងប្រែងបន្ថែមទៀតដើម្បីបន្ធូរបន្ថយភាពតានតឹង និងបញ្ចប់ការប្រយុទ្ធគ្នា បន្តគាំទ្រដល់ការចាប់ផ្ដើមកិច្ចចរចាសន្តិភាព និងដើរតួនាទីកាន់តែធំក្នុងការស្ដារសន្តិភាព និងភាពស្ងប់ស្ងាត់ឡើងវិញនៅក្នុងតំបន់មជ្ឈិមបូព៌ា។

ដោយឡែក លោក Araghchi បាននិយាយដែរថា អ៊ីរ៉ង់វាយតម្លៃខ្ពស់ និងគាំទ្រយ៉ាងពេញទំហឹងចំពោះសំណើរ ៤ចំណុចរបស់ចិន ក្នុងការលើកកម្ពស់សន្តិភាព និងស្ថិរភាពនៅក្នុងតំបន់មជ្ឈិមបូព៌ា ហើយបានកោតសរសើរដល់ប្រទេសចិន ចំពោះកិច្ចខិតខំប្រឹងប្រែងមិនខ្លាចនឿយហត់ ក្នុងការដើរតួនាទីប្រកបដោយស្ថាបនា ដើម្បីបង្ការកុំឲ្យស្ថានការណ៍កាន់តែអាក្រក់ទៅៗ និងរីករាលដាលកាន់តែខ្លាំង៕

អត្ថបទ៖ សាង ស្រីល័ក្ខ

​លោក ម៉ាក្រុង៖ តំបន់​កូកាស​​ខាងត្បូង មិនគួរ​​ជាទីតាំង​​ប្រជែងគ្នា​របស់​មហាអំណាច​ទេ​​