បុរសម្នាក់ ជាប់ចោទពីបទ រៀបគម្រោងសម្លាប់អនុប្រធានាធិបតីអាមេរិក JD Vance

ក្រសួងយុត្តិធម៌បាននិយាយកាលពីថ្ងៃទី៦ ខែកុម្ភៈថា គណៈវិនិច្ឆ័យសហព័ន្ធបានចេញដីកាចោទប្រកាន់ បុរសវ័យ ៣៣ ឆ្នាំម្នាក់ ពីបទរៀបគម្រោងសម្លាប់អនុប្រធានាធិបតីអាមេរិកលោក JD Vance ក្នុងអំឡុងពេលដំណើរទស្សនកិច្ចផ្ទាល់ខ្លួន ទៅកាន់រដ្ឋ Ohio កាលពីខែមករា។ នេះបើយោងតាមសារព័ត៌មាន straitstimes បានចុះផ្សាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយនៅក្នុងសេចក្តីថ្លែងការណ៍មួយថា បុរសនោះមានឈ្មោះ Shannon Mathre ជាអ្នករស់នៅ Toledo រដ្ឋ Ohio ត្រូវបានចោទប្រកាន់ពីបទ គំរាមកំហែងយកជីវិត និងបង្ករបួសស្នាមដល់ អនុប្រធានាធិបតីអាមេរិក JD Vance។

យោងតាមសេចក្តីថ្លែងការណ៍ ជនសង្ស័យធ្លាប់ធ្វើអត្ថាធិប្បាយថា ខ្លួនគេនឹងស្វែងរកកន្លែងដែលអនុប្រធានាធិបតី JD Vance នឹងនៅឬទៅ ហើយប្រើកាំភ្លើងស្វ័យប្រវត្តិ M14 របស់គេសម្លាប់គាត់ចោលតែម្ដង។ ភ្លាមៗនោះ ភ្នាក់ងារសេវាសម្ងាត់អាមេរិក បានចាប់ខ្លួន Mathre កាលពីម្សិលមិញ។

យោងតាមរបាយការណ៍ប្រព័ន្ធផ្សព្វផ្សាយអាមេរិកដោយដកស្រង់សម្ដីលោក Vance ថា នៅដើមខែមករា មានមនុស្សឆ្កួតម្នាក់បានព្យាយាមចូលទៅក្នុងផ្ទះរបស់គាត់នៅរដ្ឋ Ohio ដោយគោះបង្អួចរំខាន។ អនុប្រធានាធិបតី និងក្រុមគ្រួសាររបស់គាត់មិននៅផ្ទះនៅពេលនោះទេ ហើយបុរសអាយុ ២៦ ឆ្នាំម្នាក់ ត្រូវបានឃុំខ្លួនពីបទបង្កការរំខាន។

មិនតែប៉ុណ្ណោះ ក្រសួងយុត្តិធម៌បាននិយាយកាលពីម្សិលមិញថា ខ្លួនបានរកឃើញឯកសារឌីជីថលជាច្រើននៃសម្ភារៈរំលោភបំពានផ្លូវភេទលើកុមារ នៅក្នុងកម្មសិទ្ធិរបស់ជនសង្ស័យ Mathre ខណៈពេលកំពុងស៊ើបអង្កេតការគំរាមកំហែងប្រឆាំងនឹងលោក Vance។

ក្រសួងយុត្តិធម៌បានបញ្ចាក់បន្ថែមថា លោក Mathre បង្ហាញខ្លួនជាលើកដំបូងនៅចំពោះមុខចៅក្រម កាលពីថ្ងៃទី ៦ ខែកុម្ភៈ ខណៈកំពុងរង់ចាំការសវនាការឃុំខ្លួនដែលគ្រោងធ្វើនៅថ្ងៃទី ១១ ខែកុម្ភៈ។ ប្រសិនបើ រកឃើញមានទោសដូចការចោទប្រកាន់ លោកនឹងប្រឈមការផ្តន្ទាទោសអតិបរមា៥ឆ្នាំក្នុងពន្ធនាគារ និងពិន័យជាប្រាក់អតិបរមាចំនួន ២៥០,០០០ដុល្លារ ចំពោះការគំរាមកំហែងដល់អាយុជីវិតរបស់អនុប្រធានាធិបតី។ ជាពិសេស លោកនឹង​​ជាប់​ពន្ធនាគារ​អតិបរមា ២០ ឆ្នាំ និង​ពិន័យ​ជា​ប្រាក់​អតិបរមា ២៥០,០០០ដុល្លារ​ បើ​រក​ឃើញ​ថា​ មាន​ទោស​ពី​បទ​ចោទ​ប្រកាន់​សម្ភារៈ​រំលោភ​បំពាន​ផ្លូវភេទ​លើ​កុមារ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក Rubio អំពាវនាវ ឲ្យមានក្របខ័ណ្ឌគ្រប់គ្រងអាវុធនុយក្លេអ៊ែរ រួមទាំងចិនដែរ