លោក Rubio អំពាវនាវ ឲ្យមានក្របខ័ណ្ឌគ្រប់គ្រងអាវុធនុយក្លេអ៊ែរ រួមទាំងចិនដែរ

កាលពីថ្ងៃសុក្រទី៦ ខែកុម្ភៈ រដ្ឋមន្ត្រីការបរទេសអាមេរិកលោក Marco Rubio បានចេញការអំពាវនាវមួយ ឲ្យមានការបង្កើតក្របខ័ណ្ឌពហុភាគីនៃការគ្រប់គ្រងអាវុធនុយក្លេអ៊ែរ រួមទាំងប្រទេសចិនផងដែរ បន្ទាប់ពីផុតកំណត់នៃកតិកាសញ្ញា «New START» រវាងសហរដ្ឋអាមេរិក និងរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារ NHK លោក Rubio បានចេញសេចក្តីថ្លែងការណ៍មួយដែលមានចំណងជើងថា «យុគសម័យបន្ទាប់នៃការគ្រប់គ្រងអាវុធនុយក្លេអ៊ែរ» មួយថ្ងៃបន្ទាប់ពីកិច្ចព្រមព្រៀង «New START» ផុតកំណត់។ កតិកាសញ្ញាចាស់តម្រូវឲ្យសហរដ្ឋអាមេរិក និងរុស្ស៊ីកំណត់ចំនួនក្បាលគ្រាប់នុយក្លេអ៊ែរយុទ្ធសាស្ត្រដែលដាក់ពង្រាយរបស់ពួកគេនៅត្រឹម ១,៥៥០គ្រាប់។

សេចក្តីថ្លែងការណ៍នោះបាននិយាយថា ការពង្រីកឃ្លាំងអាវុធនុយក្លេអ៊ែររបស់ខ្លួនយ៉ាងឆាប់រហ័ស និងមិនច្បាស់លាស់របស់ប្រទេសចិន បានធ្វើឲ្យគំរូគ្រប់គ្រងអាវុធពីមុនដែលផ្អែកលើកិច្ចព្រមព្រៀងទ្វេភាគីរវាងសហរដ្ឋអាមេរិក និងរុស្ស៊ី ហួសសម័យ។

នៅក្នុងរបាយការណ៍ដដែល ក៏បានលើកឡើងអំពីការគ្រប់គ្រងអាវុធដោយថា លែងក្លាយជាបញ្ហាទ្វេភាគីរវាងសហរដ្ឋអាមេរិក និងរុស្ស៊ីទៀតហើយ។ ប្រទេសផ្សេងទៀតមានការទទួលខុសត្រូវក្នុងការជួយធានាស្ថិរភាពយុទ្ធសាស្ត្រ ហើយក៏គ្មានប្រទេសណា ក្រៅពីប្រទេសចិនទេ។

ដូចគ្នានេះដែរ កាលពីថ្ងៃសុក្រ មន្ត្រីជាន់ខ្ពស់ម្នាក់របស់ក្រសួងការបរទេសសហរដ្ឋអាមេរិក ទទួលបន្ទុកគ្រប់គ្រងអាវុធ បានថ្លែងនៅក្នុងសន្និសីទមួយទាក់ទងនឹងការរំសាយអាវុធនៅទីក្រុងហ្សឺណែវ ប្រទេសស្វីស។ លោក​បាន​មានប្រសាសន៍​ថា រដ្ឋាភិបាល​សហរដ្ឋអាមេរិកដឹង​ថា ចិន​បាន​ធ្វើ​តេស្ត​គ្រាប់បែក​នុយក្លេអ៊ែរ ហើយ​ការ​ធ្វើ​តេស្ត​នោះ​ត្រូវ​បាន​ធ្វើ​ឡើង​កាលពី​ថ្ងៃទី ២២ ខែមិថុនា ឆ្នាំ ២០២០។ ឃ្លាំង​អាវុធ​នុយក្លេអ៊ែរ​ក្នុង​ប្រទេស​ចិន​គ្មាន​ដែន​កំណត់ និង​គ្មាន​ការ​គ្រប់គ្រង​ឡើយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក Medvedev៖  ភាពតានតឹងនៅ Greenland គ្រាន់តែជាការចាប់ផ្តើម សម្រាប់ EU