ព័ត៌មានជាតិ

ម៉ាឡេស៊ី និងសិង្ហបុរី កំពុងក្លាយជាអ្នកនាំចូលសំខាន់ក្រោយថៃធ្លាក់ចុះការនាំចូលមកកម្ពុជា

បានផុស

៥ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

កម្ពុជាបាននាំចូលផលិតផលពីប្រទេសម៉ាឡេស៊ី និងសិង្ហបុរី ឡើងទ្វេរដងបន្ទាប់ពីកម្ពុជាមានជម្លោះព្រំដែនជាមួយថៃ។ ទិន្នន័យពីអគ្គនាយកដ្ឋានគយ និងរដ្ឋាករឱ្យដឹងថាក្នុងខែមករាដើមឆ្នាំ២០២៦នេះការនាំចូលទំនិញពីសិង្ហបុរីកើនឡើងដល់២៥២%បើធៀបនឹងខែមករាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរបាយការណ៍សិង្ហបុរីបានក្លាយជាអ្នកនាំចូលកម្ពុជាធំទី៣បន្ទាប់ពីចិន និងវៀតណាម។ ក្នុងខែមករាឆ្នាំ២០២៦នេះកម្ពុជាបាននាំចូលផលិតផលពីសិង្ហបុរីមានតម្លៃប្រមាណ១៦៦លានដុល្លារ កើនពី៤៧លានកាលពីឆ្នាំ២០២៥។ ដោយឡែកទំនិញដែលនាំចូលពីប្រទេសម៉ាឡេស៊ីមានជាង១០០លានដុល្លាកើនពី៧៦លានដុល្លារ។

តាមតារាងបម្រែបម្រួលទំនិញពីប្រទេសថៃ ដែលធ្លាប់ជាប្រទេសនាំចូលធំមួយរបស់កម្ពុជាបានថយចុះការនាំចូលដល់៤៩,៣% ទោះជាយ៉ាងណាថៃនៅតែជាអ្នកនាំចូលសំខាន់មួយដដែលដោយស្ថិតនៅលំដាប់ទី៤ បន្ទាប់ពីចិន វៀតណាម សិង្ហបុរី។

អ្នកតាមដានភូមិសាស្ត្រនយោបាយលោកបណ្ឌិត ជ័យ តិច មានប្រសាសន៍ថាការកើនឡើងនៃការនាំចូលទំនិញពីសិង្ហបុរីដោយសារតែកម្ពុជាបានបង្វែរទំនិញប្រេងសាំងចេញពីប្រទេសថៃបន្ទាប់ពីមានបញ្ហាព្រំដែនជាមួយគ្នា ជាមួយនឹងការធ្វើពហិការទំនិញថៃពីប្រជាជនកម្ពុជា។ ទោះជាយ៉ាងណាលោកការធ្លាក់ចុះការនាំចូលទំនិញថៃមកកម្ពុជានេះគឺនៅមានកម្រិតនៅឡើយបើធៀបទៅនឹងការមើលងាយ ការឈ្លានពាន ការបំផ្លិចបំផ្លាញរបស់ថៃលើកម្ពុជា។

លោកថា៖ «ប្រជាជនកម្ពុជាគួរតែធ្វើពហិការឱ្យបាន១០០% បើទោះបីជាការហាមប្រាមនៃការនាំចូលទំនិញបួនប្រភេទប៉ុណ្ណោះ តែការធ្វើពហិការវាកើតចេញពីមនសិកាជាតិរបស់យើង មិនមែនកើតចេញពីការបង្ខិតបង្ខំ ឬនៅមុខគេពហិការនៅក្រោយខ្នងលួចប្រើទេ។ សូមបងប្អូនខ្មែរយើងទាំងអស់គ្នាពង្រឹងការធ្វើពហិការនេះឱ្យបានខ្លាំងក្លា»។

បន្ទាប់ពីមានជម្លោះព្រំដែនជាមួយថៃកាលពីខែកក្កដា ឆ្នាំ២០២៥មក ប្រជាជនកម្ពុជាបានធ្វើពហិកាលែងប្រើប្រាស់ទំនិញថៃជាបន្តបន្ទាប់ ខណៈព្រំដែនគោកប្រទេសទាំងពីរត្រូវបានបិទ។ ក្នុងឆ្នាំ២០២៥ដដែលទំហំពាណិជ្ជកម្មកម្ពុជានិងថៃមានទំហំប្រមាណ ៣ ៦៥៧លានដុល្លារអាមេរិក ថយចុះប្រមាណ១៥%៕