ព័ត៌មានជាតិ

សម្តេច ម៉ែន សំអន ជូនពរ លោកកិត្តិឧទ្ទេសបណ្ឌិត ហ៊ុន ហេង ឆាប់ជាសះស្បើយ និងត្រលប់មកបង្កើតស្នាដៃផ្សេងៗ បន្ថែមទៀត ពាក់ព័ន្ធការនិពន្ធបទចម្រៀង

បានផុស

៣ ខែ មុន

នៅ

ថ្ងៃព្រហស្បតិ៍ ១២ កុម្ភៈ ២០២៦

ដោយ

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា បានជូនពរ លោកកិត្តិឧទ្ទេសបណ្ឌិត ហ៊ុន ហេង ឆាប់បានជាសះស្បើយឡើងវិញ និងត្រលប់មកបង្កើតស្នាដៃផ្សេងៗ បន្ថែមទៀត ពាក់ព័ន្ធនឹងការនិពន្ធបទចម្រៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ជូនពរបែបនេះក្នុងពេលអញ្ជើញសួរសុខទុក្ខ លោកកិត្តិឧទ្ទេសបណ្ឌិត ហ៊ុន ហេង បន្ទាប់ពីធូរសះស្បើយពីជំងឺរលាកសួតធ្ងន់ធ្ងរនៅគេហដ្ឋាន ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ នាព្រឹកថ្ងៃពុធ ៩រោច ខែមាឃ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី១១ ខែកុម្ភៈ ឆ្នាំ២០២៦។

សម្តេចកិត្តិសង្គហបណ្ឌិត ក៏បានពាំនាំនូវការផ្ដាំផ្ញើសាកសួរសុខទុក្ខពីសម្តេចតេជោ ហ៊ុន សែនប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា ជាប្រធានយុវជនគណបក្សប្រជាជនកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការកាយឫទ្ធិនារីកម្ពុជា ព្រមទាំងថ្នាក់ដឹកនាំគណបក្សគ្រប់លំដាប់ថ្នាក់ ជូនដល់ លោកកិត្តិឧទ្ទេសបណ្ឌិត ហ៊ុន ហេង និងលោកស្រី ព្រមទាំងក្រុមគ្រួសារ ដែលជានិច្ចកាល សម្ដេច និងលោកជំទាវ តែងតែគិតគូរយកចិត្តទុកដាក់អំពីសុខទុក្ខប្រជាជន និងថ្នាក់ដឹកនាំគ្រប់លំដាប់ថ្នាក់ គ្រប់ទីកន្លែងគ្រប់ពេលវេលា។

គួររំលឹកផងដែរថា លោកកិត្តិឧទ្ទេសបណ្ឌិត ហ៊ុន ហេង ទីប្រឹក្សា សម្តេចមហាបវរធិបតី ហ៊ុន ម៉ាណែត គឺជាកវីនិពន្ធខ្មែរដ៏ល្បីល្បាញមួយរូបដែលបានចូលរួមចំណែកក្នុងការលើកស្ទួយវិស័យវប្បធម៌ជាតិក្នុងវិស័យដូរ្យតន្ត្រី និងចម្រៀង។ លោកក៏បាននិពន្ធបទចម្រៀងជាច្រើនបទដែលពាក់ព័ន្ធនឹងមនោសញ្ចេតនា ជាចង្វាក់ប្រជាប្រិយ ពាក់ព័ន្ធនឹងបុណ្យចូលឆ្នាំ បុណ្យអុំទូក អកអំបុក និងសំពះព្រះខែ បុណ្យភ្ជុំបិណ្ឌជាដើម ដែលនៅគ្រប់បទសុទ្ធតែបានបង្កប់នូវតម្លៃនៃការអប់រំខ្ពស់។ មិនត្រឹមតែប៉ុណ្ណោះ លោក ក៏បាននិពន្ធបទចម្រៀងដែលពាក់ព័ន្ធនឹងការកសាង ការអភិវឌ្ឍ ក៏ដូចជាសមិទ្ធផលជាច្រើនទៀតរបស់ថ្នាក់ដឹកនាំកំពូលរបស់ជាតិផងដែរ។

ឆ្លៀតក្នុងឱកាសនោះផងដែរ សម្តេចកិត្តិសង្គហបណ្ឌិត ក៏ជូនពរឲ្យ លោកកិត្តិឧទ្ទេសបណ្ឌិត ហ៊ុន ហេង ឆាប់បានជាសះស្បើយឡើងវិញ និងត្រលប់មកបង្កើតស្នាដៃផ្សេងៗ បន្ថែមទៀត ពាក់ព័ន្ធនឹងការនិពន្ធបទចម្រៀង៕

អត្ថបទ ៖ វិមាន

Related Topics:សម្តេច ម៉ែន សំអន