វាយតប់គ្នាក្នុងសភាតួកគី ជុំវិញការតែងតាំងរដ្ឋមន្ត្រីយុត្តិធម៌ថ្មី

អំពើហិង្សាបានផ្ទុះឡើងក្នុងសភាប្រទេសតួកគីកាលពីថ្ងៃពុធ​ទី​១១​ខែ​កុម្ភៈ​ឆ្នាំ​២០២៦ ខណៈដែលការរុះរើគណៈរដ្ឋមន្ត្រីបានបណ្តាល​ឲ្យ​មានការវាយតប់គ្នារវាងសមាជិកបក្សកាន់អំណាច និងបក្សប្រឆាំង។

យោង​តាម India Today ភាពវឹកវរបានចាប់ផ្តើមនៅពេលដែលតំណាងរាស្ត្របក្សប្រឆាំងបានសម្រុកទៅកាន់វេទិកា ដើម្បីរារាំងលោក Akin Gurlek ដែលជាមន្ត្រីដែលត្រូវបានតែងតាំងដោយប្រធានាធិបតី Recep Tayyip Erdoğan មិន​ឲ្យ​ស្បថចូលកាន់តំណែងជារដ្ឋមន្ត្រីយុត្តិធម៌។ ទិដ្ឋភាពនៃការរុញច្រាន និងការដាល់គ្នាទៅវិញទៅមក បានបង្ខំ​ឲ្យ​ប្រធានសភាផ្អាកសម័យប្រជុំរយៈពេល១៥​នាទី ទើបអាចគ្រប់គ្រងស្ថានការណ៍បានវិញ។

កំហឹងរបស់បក្សប្រឆាំងបានផ្ដោតទៅលើប្រវត្តិការងារដ៏ចម្រូងចម្រាសរបស់លោក Gurlek កាលពីលោកនៅជាប្រធានរដ្ឋអាជ្ញាក្រុងអ៊ីស្តង់ប៊ុល។ ក្រុមអ្នករិះគន់បានចោទប្រកាន់រូបលោកថាជា «ឧបករណ៍នយោបាយ» ដោយយោងទៅលើតួនាទីរបស់លោកក្នុងការចោទប្រកាន់សមាជិកបក្សប្រឆាំង (CHP)។ ជាពិសេស លោក Gurlek គឺជាអ្នកដាក់ពាក្យបណ្តឹងប្រឆាំងនឹងអភិបាលក្រុងអ៊ីស្តង់ប៊ុល លោក Ekrem Imamoglu ដែលជាគូប្រជែងនយោបាយដ៏ធំរបស់លោក Erdogan ដោយចោទប្រកាន់ពីបទល្មើសចំនួន១៤២ករណី និងទាមទារទោសជាប់ពន្ធនាគារសរុបជាង ២០០០ឆ្នាំ។

អំពើហិង្សាក្នុងសភានេះ កើតឡើងចំពេលមានការបង្ក្រាបផ្នែកនយោបាយកាន់តែខ្លាំង ដែលក្នុងនោះមន្ត្រីមូលដ្ឋានរាប់រយនាក់មកពីបក្សប្រឆាំងត្រូវបានចាប់ខ្លួន ក្រោមយុទ្ធនាការប្រឆាំងអំពើពុករលួយ។ ទោះបីជាចុងក្រោយលោក Gurlek អាចស្បថចូលកាន់តំណែងបានក្រោមការការពារពីសមាជិកបក្សកាន់អំណាចក៏ដោយ ប៉ុន្តែការរុះរើគណៈរដ្ឋមន្ត្រីនេះបានធ្វើ​ឲ្យមានការរិះគន់យ៉ាងខ្លាំងទាំងក្នុង និងក្រៅប្រទេស ចំពោះឯករាជ្យភាពនៃប្រព័ន្ធតុលាការ និងលទ្ធិប្រជាធិបតេយ្យក្នុងប្រទេសតួកគី៕

ប្រែសម្រួល៖ ឈាង