ព័ត៌មានអន្ដរជាតិ

ចារកម្មអាមេរិកច្រានចោលការអះអាងរបស់លោកត្រាំ អំពីសមត្ថភាពមីស៊ីលអ៊ីរ៉ង់

បានផុស

២ ខែ មុន

នៅ

ថ្ងៃសុក្រ ២៧ កុម្ភៈ ២០២៦

ដោយ

Chheang

ការអះអាងនាពេលថ្មីៗនេះរបស់ប្រធានាធិបតី ដូណាល់ ត្រាំ ដែលថា អ៊ីរ៉ង់នឹងមានមីស៊ីលដែលអាចបាញ់ដល់សហរដ្ឋអាមេរិកក្នុងពេលឆាប់ៗនេះ ត្រូវបានច្រានចោលដោយមន្ត្រីចារកម្ម។ នេះបើតាមការចុះផ្សាយនាថ្ងៃទី២៧ខែកុម្ភៈឆ្នាំ២០២៦របស់ទីភ្នាក់ងារព័ត៌មានរ៉យទ័រ។

ក្នុងសុន្ទរកថាប្រចាំឆ្នាំកាលពីថ្ងៃអង្គារ លោកត្រាំ បានលើកឡើងថា ទីក្រុងតេហេរ៉ង់កំពុងសម្ងំអភិវឌ្ឍមីស៊ីលដែលអាចបាញ់ដល់ដីអាមេរិកក្នុងពេលឆាប់ៗ ដើម្បីធ្វើជាហេតុផលបើកការវាយប្រហារយោធា។ ទោះជាយ៉ាងណាក៏ដោយ ប្រភពចំនួនបីដែលដឹងពីរបាយការណ៍ចារកម្មបានប្រាប់រ៉យទ័រថា ការអះអាងនេះហាក់ដូចជាមានលក្ខណៈបំផ្លើស និងមិនមានភស្តុតាងគាំទ្រដោយទិន្នន័យបច្ចុប្បន្ននោះទេ។

មន្ត្រីចារកម្មបានឲ្យដឹងថា មិនទាន់មានការផ្លាស់ប្តូរណាមួយនៅក្នុងការវាយតម្លៃឆ្នាំ២០២៥ របស់ទីភ្នាក់ងារចារកម្មជាតិអាមេរិក ដែលថាអ៊ីរ៉ង់អាចនឹងត្រូវការពេលរហូតដល់ឆ្នាំ២០៣៥ ដើម្បីបង្កើត«មីស៊ីលផ្លោងអន្តរទ្វីប (ICBM) ដែលអាចប្រើប្រាស់ក្នុងវិស័យយោធា»បាន។ របាយការណ៍ដដែលបានបញ្ជាក់ថា អ៊ីរ៉ង់អាចអភិវឌ្ឍវាចេញពីបច្ចេកវិទ្យាបាញ់បង្ហោះផ្កាយរណបដែលមានស្រាប់។ ចំពោះបញ្ហានេះ សេតវិមានមិនបានផ្តល់ការអត្ថាធិប្បាយអ្វីឡើយ ខណៈរបាយការណ៍ទាំងនេះបានធ្វើឲ្យមានការសង្ស័យយ៉ាងខ្លាំងលើមូលដ្ឋានគ្រឹះនៃផែនការវាយប្រហារយោធារបស់លោកត្រាំប្រឆាំងនឹងសាធារណរដ្ឋអ៊ីស្លាមមួយនេះ៕

ប្រែសម្រួល៖ ឈាង