វិនាសកម្មកូវីដនៅឥណ្ឌា៖ មន្ទីរពេទ្យក៏ឆេះ រីឯអ្នកជំងឺត្រូវទុកឲ្យស្លាប់នៅខាងក្រៅ ព្រោះពេទ្យលែងទទួលមើល

អ្នកស្លាប់ដោយសារជំងឺកូវីដ-១៩នៅក្នុងប្រទេសឥណ្ឌា ត្រូវបានទុកចោលឲ្យដេកនៅលើហ្វ្រង់ការខាងក្រៅមន្ទីរពេទ្យ ខណៈដែលគ្រូពេទ្យបង្ខំចិត្តលែងទទួលអ្នកជំងឺ ចំពេលករណីឆ្លងនិងស្លាប់ដោយសារជំងឺកូវីដ-១៩នៅក្នុងប្រទេសនេះ បានឈានដល់កម្រិតបំបែកកំណត់ត្រាពិភពលោក។

កាលពីថ្ងៃសុក្រ ការឆ្លងប្រចាំថ្ងៃបានឈានដល់ ៣៣២,៧៣០ករណី ពោលគឺកើនឡើងពី ៣១៤,៨៣៥ករណីកាលពីថ្ងៃព្រហស្បតិ៍ ដោយបំបែកកំណត់ត្រាដែលកាន់កាប់ដោយសហរដ្ឋអាមេរិកកាលពីខែមករា។

ទូរទស្សន៍ Sky News បានចាប់យករូបភាព មនុស្សរាប់សិបនាក់ ដេកស្លាប់លើហ្វ្រង់ការ នៅខាងក្រៅមន្ទីរពេទ្យដ៏ណែនតាន់តាប់មួយក្នុងរដ្ឋធានី New Delhi។ ក្នុងរយៈពេលត្រឹមតែប៉ុន្មាននាទីប៉ុណ្ណោះនៃការផ្សាយផ្ទាល់ សាកសពមនុស្ស៣នាក់ ត្រូវគេមើលឃើញ កំពុងត្រូវបានរុញចេញតាមទ្វារមន្ទីរពេទ្យ។

វាបានកើតឡើងស្របពេលដែលអគ្គិភ័យ បានឆាបឆេះមន្ទីរពេទ្យមួយផ្សេងទៀតដែលព្យាបា​លអ្នកជំងឺកូវីដក្នុងទីក្រុង Mumbai នៅព្រឹកថ្ងៃដដែលនេះ ដោយបានសម្លាប់មនុស្សចំនួន ១៣នាក់។

ចំណែកឯកាលពីថ្ងៃពុធ អ្នកជំងឺចំនួន២២នាក់ បានស្លាប់នៅមន្ទីរពេទ្យមួយក្នុងរដ្ឋ Maharashtra ដោយសារដាច់អុកស៊ីសែន បន្ទាប់ពីមានការលេចធ្លាយ។

លោកនាយករដ្ឋមន្ត្រី Narendra Modi បានហៅវាថាជារឿងគួរអោយសោកស្តាយបំផុត ហើយលោកបានយល់ព្រមផ្តល់ប្រាក់ឧបត្ថម្ភ ដល់សាច់ញាតិជនរងគ្រោះ៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ ​រឿង​ដ៏​កម្សត់ ម្តាយ​ដឹក​កូន​ប្រុស​តាម​កង់​៣​ទៅ​ពេទ្យ​៣​កន្លែង​ស្លាប់​តាម​ផ្លូវនៅឥណ្ឌា