លោកពូទីន ហៅ​ទូរសព្ទ​ទៅ​ប្រធានាធិបតី​អ៊ីរ៉ង់ និង​អំពាវនាវឲ្យ​បញ្ឈប់ការបាញ់គ្នា

ប្រធានាធិបតីរុស្ស៊ី លោក វ៉្លាឌីមៀរ ពូទីន បានជជែកតាមទូរសព្ទជាមួយប្រធានាធិបតីអ៊ីរ៉ង់ លោក Masoud Pezeshkian កាលពីថ្ងៃសុក្រ​ទី​៦​ខែ​មីនា​ឆ្នាំ​២០២៦ ដើម្បីជំរុញ​​ឲ្យ​មានការបញ្ចប់អរិភាពជាបន្ទាន់នៅមជ្ឈិមបូព៌ា។

តាម​ការ​ផ្សាយ​របស់​សារព័ត៌មាន Xinhua ក្នុងកិច្ចសន្ទនានោះ លោកពូទីន បានសម្តែងការចូលរួមរំលែកទុក្ខចំពោះការបាត់បង់ជីវិតរបស់មេដឹកនាំកំពូលអ៊ីរ៉ង់ Ayatollah Ali Khamenei ព្រមទាំងក្រុមគ្រួសារ និងមន្ត្រីយោធាជាន់ខ្ពស់ នៅក្នុងព្រឹត្តិការណ៍ដែលវិមានក្រឹមឡាំងហៅថាជា «ការឈ្លានពានដោយអាវុធពីសំណាក់អាមេរិក និងអ៊ីស្រាអែល»។ លោកពូទីន បានសង្កត់ធ្ងន់ថា ការប្រើប្រាស់កម្លាំងបាយត្រូវតែបញ្ឈប់ ហើយជំនួសមកវិញនូវកិច្ចខិតខំប្រឹងប្រែងតាមផ្លូវការទូត។

ជាការឆ្លើយតប លោក Pezeshkian បានថ្លែងអំណរគុណដល់រុស្ស៊ី ដែលបានបង្ហាញសាមគ្គីភាពជាមួយប្រជាជនអ៊ីរ៉ង់ ក្នុងការការពារអធិបតេយ្យភាពជាតិ និងបានពន្យល់យ៉ាងលម្អិតអំពីស្ថានភាពចុងក្រោយនៃជម្លោះនេះ។ លោកពូទីន ក៏បានបញ្ជាក់ដែរថា លោកកំពុងទាក់ទងយ៉ាងជិតស្និទ្ធជាមួយមេដឹកនាំបណ្តាប្រទេសក្នុងក្រុមប្រឹក្សាសហប្រតិបត្តិការឈូងសមុទ្រ (GCC) ពាក់ព័ន្ធនឹងស្ថានការណ៍នេះ។ ភាគីទាំងពីរបានព្រមព្រៀងគ្នា បន្តរក្សាទំនាក់ទំនងតាមរយៈបណ្តាញផ្សេងៗ ដើម្បីតាមដានវិវត្តន៍នៃសង្គ្រាមនេះតទៅទៀត៕

ប្រែសម្រួល៖ ឈាង