ព័ត៌មានអន្ដរជាតិ

ចិននឹងអនុម័តច្បាប់ប្រយុទ្ធប្រឆាំងអំពើពុករលួយឆ្លងដែន កាន់តែស៊ីជម្រៅនៅឆ្នាំនេះ

បានផុស

២ ខែ មុន

នៅ

ថ្ងៃចន្ទ ៩ មីនា ២០២៦

ដោយ

ប៉ុន្មានឆ្នាំចុងក្រោយនេះ ប្រទេសចិនធ្វើយុទ្ធនាការប្រឆាំងអំពើពុករលួយកាន់តែខ្លាំងនិងស៊ីជម្រៅ ក្នុងគោលបំណងរក្សាស្ថិរភាពនយោបាយផ្ទៃក្នុង ពង្រឹងអំណាចរបស់ថ្នាក់ដឹកនាំបក្សកុម្មុយនីស្តចិន ស្តារទំនុកចិត្តពីសាធារណជនឡើងវិញ ជាពិសេសកែលម្អផ្នែកអភិបាលកិច្ច ខណៈសេដ្ឋកិច្ចប្រទេសនេះកាន់តែពើបប្រទះនូវស្មុគស្មាញ។

រ៉យទ័រ ចុះផ្សាយថ្ងៃទី៩ខែមីនា បានឲ្យដឹងថា របាយការណ៍របស់ស្ថាប័ននីតិប្បញ្ញត្តិកំពូលប្រទេសចិន បានចេញផ្សាយកាលពីថ្ងៃចន្ទបង្ហាញថា ក្រុងប៉េកាំងនឹងអនុម័តច្បាប់ស្តីពីការប្រយុទ្ធប្រឆាំងអំពើពុករលួយឆ្លងដែននៅឆ្នាំនេះ ដើម្បីជំរុញក្របខ័ណ្ឌច្បាប់ជាតិក្នុងការត្រួតពិនិត្យប្រឆាំងនឹងអំពើពុករលួយ។

លោក ស៊ី ជីនពីង ក្នុងសមាជប្រជាជនជាតិ (NPC) នៅក្រុងប៉េកាំង។ រូបភាព៖ Reuters

គណៈកម្មាធិការអចិន្ត្រៃយ៍នៃសភាប្រជាជនចិន ជាស្ថាប័នរដ្ឋាភិបាលក្នុងសភាកាន់អំណាចនីតិបញ្ញត្តិនៅក្នុងប្រទេសចិន មិនបានបញ្ជាក់លម្អិតពីអ្វីដែលច្បាប់នេះនឹងកំណត់គោលដៅជាក់លាក់នោះទេ ប៉ុន្តែច្បាប់នេះនឹងក្លាយជាជំហានពង្រីកដ៏ធំមួយ ដើម្បីជំរុញយុទ្ធនាការរបស់ប្រទេសចិនប្រឆាំងនឹងអំពើពុករលួយ។

ថ្នាក់ដឹកនាំចិនធ្វើយុទ្ធនាការប្រឆាំងអំពើពុករលួយយ៉ាងធំ នៅតាមបណ្តាក្រសួងនានា ជាពិសេសផ្តោតលើមន្ត្រីយោធាជាន់ខ្ពស់ ក្នុងយុទ្ធនាការមួយដែលប្រធានាធិបតីចិន លោក ស៊ី ជីនពីង បានបញ្ជា ពេលដែលលោកឡើងកាន់អំណាចក្នុងឆ្នាំ ២០១២។

កាលពីសប្តាហ៍មុន លោក ស៊ី ទាមទារឱ្យយោធាមានភាពស្មោះត្រង់នឹងគណបក្សកុម្មុយនីស្តដែលកំពុងកាន់អំណាច និងលុបបំបាត់អំពើពុករលួយ។

នៅក្នុងរបាយការណ៍មួយផ្សេងទៀត តុលាការប្រជាជនកំពូលលើកឡើងថា តុលាការចិនបានបញ្ចប់ករណីអំពើពុករលួយចំនួន ២២.៤% ច្រើនជាងកាលពីឆ្នាំមុន ពាក់ព័ន្ធនឹងមនុស្សចំនួន ៤០ ០០០ នាក់។

ក្នុងចំណោមអ្នកដែលត្រូវបានផ្តន្ទាទោស មានអតីតមន្ត្រីគ្រប់គ្រងកណ្តាលចំនួន ៥៧ នាក់ រួមទាំងអតីតរដ្ឋមន្ត្រីក្រសួងកសិកម្ម និងអតីតលេខាធិការបក្សខេត្ត Hainan ផងដែរ៕

ប្រែសម្រួល៖ ណឺ មិនា