តម្លៃប្រេងអន្តរជាតិ បិទការជួញដូរខ្ពស់ជាង ១០០ ដុល្លារ​/បារ៉ែល

តម្លៃប្រេងអន្តរជាតិ​បាន​បិទការជួញដូរនៅថ្ងៃសុក្រ ខ្ពស់ជាង ១០០ ដុល្លារ​/បារ៉ែល ដោយសារតែការបន្តបិទនៃច្រកសមុទ្រហ័រមូហ្ស ពាក់ព័ន្ធនឹងជម្លោះរវាងអ៊ីស្រាអែល សហរដ្ឋអាមេរិក និងអ៊ីរ៉ង់។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅម៉ាក Brent សម្រាប់កុងត្រាខែឧសភា បាន​កើនឡើង ២,៦៨ ដុល្លារ ឬ ២,៦៧% ដល់ ១០៣,១៤ ដុល្លារ/បារ៉ែល នៅថ្ងៃសុក្រ ដែលជាថ្ងៃបិទការជួញដូរប្រចាំសប្ដាហ៍។ ដោយឡែកតម្លៃប្រេងអាមេរិក ម៉ាក West Texas Intermediate (WTI) សម្រាប់កុងត្រាខែមេសា វិញ បាន​កើនឡើង ២,៩៨ ដុល្លារ ឬ ៣,១១% ដល់ ៩៨,៧១ ដុល្លារ/បារ៉ែល។

ក្នុងអត្រាប្រចាំសប្ដាហ៍ តម្លៃប្រេងម៉ាក Brent បាន​កើនឡើង ១១,២៧% ហើយ WTI បាន​កើនឡើង ៨% ធៀបនឹង​តម្លៃបិទការជួញដូរកាលពីសប្ដាហ៍មុន។

មកទល់ពេលនេះ វាមាន​រយៈពេល ២ សប្ដាហ៍ទៅហើយ រាប់តាំងពីអ៊ីស្រាអែល និងសហរដ្ឋអាមេរិក បើកការវាយប្រហារលើអ៊ីរ៉ង់ ដោយ​បំផ្ទុះសង្រ្គាមបច្ចុប្បន្ន។ តម្លៃប្រេងបានហក់ឡើងជាបន្តបន្ទាប់ ដោយសារតែក្ដីបារម្ភផ្នែកផ្គត់ផ្កង់សកល នៅពេលច្រកសមុទ្រហ័រមូហ្ស ដែលដឹកជញ្ជូនប្រេង ២០% នៃតម្រូវការប្រចាំថ្ងៃរបស់ពិភពលោក ត្រូវបានកាត់ផ្ដាច់។

តម្លៃប្រេងហក់ឡើង ទោះបីជាមាន​ចំណាត់ការផ្សេងៗពីសហរដ្ឋអាមេរិក ដែលដកទណ្ឌកម្មបណ្ដោះអាសន្នលើប្រេង​រុស្ស៊ីរយៈពេល ៣០ ថ្ងៃ និងការព្រមព្រៀងរបស់ទីភ្នាក់ងារថាមពលអន្តរជាតិ (IEA) ក្នុងការបញ្ចេញប្រេងពីក្នុងស្តុកបម្រុងប្រមាណ ៤០០ លាន​បារ៉ែល ក៏ដោយ៕