លោក​ត្រាំ ប្រកាសពីការកម្ទេចគោលដៅយោធាអ៊ីរ៉ង់លើកោះ Kharg

ប្រធានាធិបតី ដូណាល់ ត្រាំ បានប្រកាសកាលពីថ្ងៃសុក្រថា កងកម្លាំងអាមេរិកបានវាយកម្ទេចទាំងស្រុង នូវគោលដៅយោធាសំខាន់ៗនៅលើកោះ Kharg របស់អ៊ីរ៉ង់ ដែលនេះជាប្រតិបត្តិការទម្លាក់គ្រាប់បែកដ៏ខ្លាំងក្លា​បំផុតមួយនៅក្នុងប្រវត្តិសាស្ត្រមជ្ឈិមបូព៌ា។

តាម​ការ​ផ្សាយ​របស់ AFP ​នា​ថ្ងៃ​សៅរ៍​ទី​១៤​ខែ​មីនា​ឆ្នាំ​២០២៦ កោះនេះគឺជាមជ្ឈមណ្ឌលនាំចេញប្រេងដ៏សំខាន់របស់​អ៊ីរ៉ង់ ហើយ​លោក​ត្រាំ បានបញ្ជាក់ថា លោកបានសម្រេចចិត្តមិនទាន់វាយប្រហារលើហេដ្ឋារចនាសម្ព័ន្ធប្រេងនៅឡើយទេ ប៉ុន្តែព្រមានថា លោកនឹងប្តូរចិត្តវិញ ប្រសិនបើអ៊ីរ៉ង់នៅតែបន្តរារាំង​ការធ្វើដំណើរ និងសុវត្ថិភាព​របស់នាវាដឹកជញ្ជូន​ក្នុង​ច្រក​សមុទ្រ Hormuz។

ស្របពេលដែលតម្លៃប្រេងពិភពលោកកំពុងហក់ឡើងខ្ពស់ លោកប្រធានាធិបតីបានបញ្ជាក់ថា កងទ័ពជើងទឹកអាមេរិកនឹងចាប់ផ្តើមធ្វើការ​អមដំណើរ​​នាវាដឹកប្រេងឆ្លងកាត់ច្រកសមុទ្រ Hormuz ក្នុងពេលឆាប់ៗនេះ ដើម្បីធានាសុវត្ថិភាព ខណៈដែលចរាចរណ៍ផ្លូវទឹកនៅក្នុងតំបន់ស្ទើរតែជាប់គាំងទាំងស្រុងដោយសារការវាយប្រហាររបស់អ៊ីរ៉ង់។

ស្ថានភាពកាន់តែមានភាពតានតឹងខ្លាំង នៅពេលដែលទីក្រុងតេហេរ៉ង់បានឆ្លើយតបវិញតាមរយៈការបង្ហោះដ្រូន និងបាញ់មីស៊ីលជាច្រើនគ្រឿងសំដៅទៅរកប្រទេសអ៊ីស្រាអែល និងប្រទេសជិតខាងក្នុងតំបន់ឈូងសមុទ្រ បន្ទាប់ពីការទម្លាក់គ្រាប់បែករបស់អាមេរិក។ ទន្ទឹមនឹងនេះ សង្រ្គាមរវាងអ៊ីស្រាអែល និងក្រុមហេសបូឡានៅក្នុងប្រទេសលីបង់ នៅតែបន្តអូសបន្លាយ ដែលបណ្តាល​ឲ្យ​មនុស្សយ៉ាងហោចណាស់ ៧៧៣នាក់បានស្លាប់បាត់បង់ជីវិត រួមទាំងបុគ្គលិកពេទ្យ ១២នាក់ដែលបានស្លាប់ក្នុងមជ្ឈមណ្ឌលសុខភាពមួយកាលពីថ្ងៃសុក្រផងដែរ។

នៅក្នុងទីក្រុងតេហេរ៉ង់ឯណោះវិញ បាតុកម្មគាំទ្ររដ្ឋាភិបាលបានផ្ទុះឡើងយ៉ាងខ្លាំងក្លា ដោយមានមន្ត្រីជាន់ខ្ពស់អ៊ីរ៉ង់ជាច្រើនរូបបានចូលរួមដង្ហែក្បួនជាមួយប្រជាជន ព្រមទាំងស្រែក​ថា «ទៅស្លាប់ទៅ​អាមេរិក និង​អ៊ីស្រាអែល» ដើម្បីបង្ហាញពីការមិនចុះចាញ់ចំពោះការគាបសង្កត់របស់សហរដ្ឋអាមេរិក៕

ប្រែសម្រួល៖ ឈាង