ព័ត៌មានអន្ដរជាតិ

UN៖ ការវាយប្រហាររបស់អ៊ីស្រាអែលលើពន្ធនាគារអ៊ីរ៉ង់ជាប់ពាក់ព័ន្ធ«ឧក្រិដ្ឋកម្មសង្គ្រាម»

បានផុស

២ ខែ មុន

នៅ

ថ្ងៃអង្គារ ១៧ មីនា ២០២៦

ដោយ

ប្រធានផ្នែកស៊ើបអង្កេតរបស់អង្គការសហប្រជាជាតិ (UN) បានឱ្យដឹងកាលពីថ្ងៃចន្ទថា ការវាយប្រហារតាមអាកាសរបស់អ៊ីស្រាអែលលើពន្ធនាគារមួយកន្លែងក្នុងប្រទេសអ៊ីរ៉ង់កាលពីឆ្នាំមុនគឺជា «ឧក្រិដ្ឋកម្មសង្គ្រាម» និងព្រមានពីហានិភ័យនៃការដាក់គំនាបបន្ថែមទៀត បន្ទាប់ពីការទម្លាក់គ្រាប់បែករបស់សហរដ្ឋអាមេរិកនិងអ៊ីស្រាអែលនាពេលបច្ចុប្បន្ន។

ទីភ្នាក់ងាររ៉យទ័រ ផ្សាយថ្ងៃទី១៦ខែមីនាឆ្នាំ២០២៦ បានឲ្យដឹងថា អាជ្ញាធរអ៊ីរ៉ង់ បាននិយាយថា មនុស្សជាង៧០នាក់ត្រូវបានសម្លាប់ ពេលអ៊ីស្រាអែលបានវាយប្រហារចំទីតាំងពន្ធនាគារ Evin របស់ទីក្រុងតេហេរ៉ង់កាលពីខែមិថុនាឆ្នាំមុន អំឡុងសង្គ្រាមតាមអាកាសជាមួយអ៊ីរ៉ង់រយៈពេល១២ថ្ងៃ។

សម័យប្រជុំក្រុមប្រឹក្សាសិទ្ធិមនុស្សនៅ UN ទីក្រុងហ្សឺណែវ ប្រទេសស្វីស។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍នោះ ពន្ធនាគារដែលជាកន្លែងឃុំឃាំងអ្នកទោសនយោបាយក៏រងការខូចខាតដែរ នៅក្នុងការវាយប្រហារតាមអាកាសចុងក្រោយបំផុតរវាងសហរដ្ឋអាមេរិកនិងអ៊ីស្រាអែល។

លោកស្រី Sara Hossain ប្រធានបេសកកម្មស្វែងរកការពិតអន្តរជាតិឯករាជ្យលើស្ថានការណ៍នៅអ៊ីរ៉ង់ បាននិយាយថា៖«យើងបានរកឃើញមូលហេតុសមហេតុផលជឿថាការវាយប្រហារតាមអាកាសលើពន្ធនាគារ Evin គឺអ៊ីស្រាអែលបានប្រព្រឹត្តបទឧក្រិដ្ឋកម្មសង្គ្រាមដោយចេតនា ដឹកនាំការវាយប្រហារប្រឆាំងនឹងជនស៊ីវិលតែម្តង» ។

លោកស្រីបានលើកឡើងថា មនុស្ស៨០នាក់ រួមទាំងកុមារម្នាក់ និងស្ត្រី៨នាក់ត្រូវស្លាប់។

របាយការណ៍របស់អ្នកស៊ើបអង្កេត UN ចុងក្រោយបំផុតផ្អែកលើការសម្ភាសន៍ជាមួយជនរងគ្រោះ សាក្សី រូបភាពផ្កាយរណប និងឯកសារផ្សេងទៀត ត្រូវបានបង្ហាញដល់ក្រុមប្រឹក្សានៅថ្ងៃចន្ទ។

យ៉ាងណាអ៊ីស្រាអែលបានដកខ្លួនចេញពីក្រុមប្រឹក្សា ដែលកត់ត្រាការរំលោភបំពាន និងធ្វើការស៊ើបអង្កេត ហើយបានទុកកៅអីរបស់ខ្លួនឱ្យនៅទទេ។ មិនមានការឆ្លើយតបភ្លាមៗ ចំពោះសំណើសុំការអត្ថាធិប្បាយពីការិយាល័យនាយករដ្ឋមន្ត្រី ក្រសួងការបរទេស ឬយោធាអ៊ីស្រាអែលនោះទេ។

លោកស្រី Hossain បានថ្កោលទោសការស្លាប់ជនស៊ីវិលកាន់តែច្រើននៅក្នុងប្រទេសអ៊ីរ៉ង់ និងសម្តែងការព្រួយបារម្ភចំពោះយុទ្ធនាការទម្លាក់គ្រាប់បែកបច្ចុប្បន្ន អាចនាំឱ្យអ៊ីរ៉ង់បង្ក្រាបលើការប្រឆាំងកាន់តែខ្លាំង។

លោកស្រីនិយាយថា៖ « មេរៀនស្នូលដែលទាញយកចេញពីការស៊ើបអង្កេតរបស់យើងក្នុងបរិបទនេះគឺច្បាស់ណាស់ថាសកម្មភាពយោធា មិនផ្តល់ការទទួលខុសត្រូវ ឬនាំមកនូវការផ្លាស់ប្តូរដែលមានន័យនោះទេ។ ផ្ទុយទៅវិញ វាប្រឈមនឹងការបង្កើនការគាបសង្កត់ក្នុងស្រុក»៕

ប្រែសម្រួល៖ ណឺ មិនា