អាមេរិកអន់ចិត្ត! លោក Rubio ព្រមានពិចារណាដកខ្លួនចេញពី NATO ក្រោយ​ចប់​សង្គ្រាម

រឿងរ៉ាវក្នុងពិភពលោកកាន់តែមានភាពចលាចល បន្ទាប់ពីរដ្ឋមន្ត្រីការបរទេសអាមេរិក លោក Marco Rubio បានចេញមុខបង្ហើបថា សហរដ្ឋអាមេរិកប្រហែលជាត្រូវពិចារណាឡើងវិញអំពីតម្លៃ និងអត្ថប្រយោជន៍នៃបក្សសម្ព័ន្ធយោធា​ណាតូ (NATO) នៅពេលដែលសង្រ្គាមជាមួយអ៊ីរ៉ង់ត្រូវបានបញ្ចប់។

ការព្រមានដ៏ភ្ញាក់ផ្អើលនេះបានកើតឡើងក្នុងអំឡុងពេលកិច្ចសម្ភាសន៍ជាមួយទូរទស្សន៍ FOX News កាល​ពី​ថ្ងៃ​អង្គារ​ទី​៣១​ខែ​មីនា​ឆ្នាំ​២០២៦ ដោយលោក Rubio បានបង្ហាញពីអារម្មណ៍ខកចិត្តយ៉ាងខ្លាំង ចំពោះបណ្តាប្រទេសជាមិត្តដែលធ្លាប់តែសន្យាថានឹងជួយគ្នា ប៉ុន្តែបែរជាមិនព្រមសហការជាមួយអាមេរិកក្នុងគ្រាអាសន្នទៅវិញ។

លោក Rubio បានលើកឡើងដោយមានចម្ងល់ថា នៅពេលដែលអាមេរិកត្រូវការប្រើប្រាស់មូលដ្ឋានទ័ព ឬសុំបើកផ្លូវលើដែនអាកាសពីប្រទេសសមាជិកណាតូផ្សេងទៀតដើម្បីធ្វើប្រតិបត្តិការយោធា បែរជាត្រូវបានគេឆ្លើយថា «ទេ»។ លោកបានសង្កត់ធ្ងន់ថា បើស្ថានការណ៍នៅតែបែបនេះ តើអាមេរិកបន្តស្ថិតក្នុងបក្សសម្ព័ន្ធណាតូ​ ដើម្បីអ្វីទៀត? លោកចាត់ទុកថា ទំនាក់ទំនងនេះហាក់ដូចជា «ផ្លូវដែលមានតែមួយខ្សែ» ពោលគឺមានតែអាមេរិកដែលជួយគេ ប៉ុន្តែដល់ពេលអាមេរិកត្រូវការជំនួយវិញ បែរជាគ្មានអ្នកណាមកជួយទៅវិញ។ ទោះបីជាកន្លងមក លោកធ្លាប់ជាអ្នកគាំទ្រដ៏ខ្លាំងក្លាចំពោះណាតូ​ក៏ដោយ ប៉ុន្តែលោកថាការសម្រេចចិត្តចុងក្រោយថាតើត្រូវបន្ត ឬបញ្ចប់ទំនាក់ទំនងនេះ គឺស្ថិតនៅលើលោកប្រធានាធិបតីតែម្នាក់គត់។

ដើមហេតុដែលនាំ​ឲ្យ​មានការឈ្លោះប្រកែកគ្នាដ៏ធំនេះ គឺដោយសារតែប្រទេសមួយចំនួនដូចជា អ៊ីតាលី និងអេស្ប៉ាញ បានសម្រេចចិត្តបិទមិន​ឲ្យ​អាមេរិកប្រើប្រាស់មូលដ្ឋានទ័ព និងដែនអាកាសរបស់ពួកគេឡើយ ដោយសារពួកគេមានការព្រួយបារម្ភថា សង្រ្គាមនេះអាចជារឿងខុសច្បាប់។ ទោះបីជាប្រទេសមហាអំណាចផ្សេងទៀតដូចជា អង់គ្លេស បារាំង និងអាល្លឺម៉ង់ បានជួយក្នុងកម្រិតតិចតួចត្រឹមតែការការពារខ្លួនក៏ដោយ ក៏លោក Rubio នៅតែយល់ថា វាគ្មានន័យឡើយក្នុងការដាក់ទ័ពអាមេរិកនៅតាមតំបន់ទាំងនោះ ប្រសិនបើទាហានទាំងនោះមិនអាចចេញធ្វើសកម្មភាពបាននៅពេលដែលអាមេរិកត្រូវការបំផុត៕

ប្រែសម្រួល៖ ឈាង