ព័ត៌មានអន្ដរជាតិ

អ៊ីរ៉ង់ពិចារណាវាយប្រហារមូលដ្ឋានទ័ពអង់គ្លេសដែលឱ្យអាមេរិកចូលប្រើប្រាស់

បានផុស

៤ ខែ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

ឯកអគ្គរដ្ឋទូតអ៊ីរ៉ង់ប្រចាំចក្រភពអង់គ្លេស បានព្រមានថា ទីក្រុងតេហេរ៉ង់កំពុងពិចារណាដាក់គោលដៅលើមូលដ្ឋានទ័ពអង់គ្លេសដែលអនុញ្ញាតឲ្យអាមេរិកប្រើប្រាស់សម្រាប់ការវាយប្រហារអ៊ីរ៉ង់ ថាតើអ៊ីរ៉ង់នឹងវាយប្រហារសងសឹកវិញឬអត់ ព្រោះមូលដ្ឋាននេះអាមេរិកប្រើសម្រាប់វាយប្រហារកន្លែងសំខាន់ៗរបស់ប្រទេសអ៊ីរ៉ង់។

យោងតាមសារព័ត៌មានអង់គ្លេស Independent ផ្សាយថ្ងៃទី០១ ខែមេសា ឆ្នាំ២០២៦ ចក្រភពអង់គ្លេសបានអនុញ្ញាតឱ្យសហរដ្ឋអាមេរិកប្រើប្រាស់មូលដ្ឋានទ័ព RAF Fairford នៅទីក្រុង Gloucestershire សម្រាប់ប្រតិបត្តិការប្រឆាំងនឹងអ៊ីរ៉ង់។ ឯកអគ្គរដ្ឋទូតអ៊ីរ៉ង់ប្រចាំចក្រភពអង់គ្លេស លោក Seyed Ali Mousavi លើកឡើងថា៖ « វាជារឿងដ៏គួរឱ្យសោកស្តាយសម្រាប់អង់គ្លេស»។

ឯកអគ្គរដ្ឋទូតអ៊ីរ៉ង់ប្រចាំចក្រភពអង់គ្លេស លោក Seyed Ali Mousavi ។ រូបភាព៖ Nournews.ir

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់សារព័ត៌មាន Times Radio លោក Seyed Ali Mousavi និយាយថា៖ « ជំហរដំបូងដែលធ្វើឡើងដោយនាយករដ្ឋមន្ត្រីអង់គ្លេស លោក Starmer គឺល្អណាស់។ យើងពិតជាកោតសរសើរ។ យើងពិតជាស្វាគមន៍ចំពោះការមិនពាក់ព័ន្ធក្នុងទង្វើដ៏អាក្រក់របស់ភាគីអាមេរិកនិងរបបអ៊ីស្រាអែល»។

លោក បន្តថា៖ « តែជាអកុសល ឥឡូវនេះយើងបានដឹងថាមូលដ្ឋានយោធាអង់គ្លេស Fairford បានបម្រើការសម្រាប់យន្តហោះទម្លាក់គ្រាប់បែក B២ និង B១ របស់ភាគីអាមេរិក ដើម្បីបំពាក់ដោយអាវុធផ្សេងៗគ្នា ប្រើប្រឆាំងនឹងប្រជាជនអ៊ីរ៉ង់។ វាជារឿងគួរឱ្យសោកស្ដាយណាស់»។

ពេលអ្នកសារព័ត៌មានសួរ លោក Mousavi ថាតើមូលដ្ឋានទ័ព និងទ្រព្យសម្បត្តិរបស់អង់គ្លេសជាគោលដៅស្របច្បាប់សម្រាប់អ៊ីរ៉ង់វាយប្រហារឬអត់? លោក Mousavi ឆ្លើយតបថា៖ « នេះជាបញ្ហាសំខាន់ណាស់ដែលយើងកំពុងពិចារណា។ នេះជាបញ្ហាសំខាន់សម្រាប់យើងប្រឆាំងការពារខ្លួន»។

លោកបន្ថែមថា៖ « អាជ្ញាធរយោធាអ៊ីរ៉ង់នឹងសម្រេចចិត្តសមស្របថានឹងចាត់វិធានការអ្វី។ ចំណែកការសម្រេចចិត្តណាមួយ អាស្រ័យលើសកម្មភាពរបស់ចក្រភពអង់គ្លេស»។

មូលដ្ឋានទ័ពចក្រភពអង់គ្លេស។ រូបភាព៖ Air Force

ចំណែករដ្ឋមន្ត្រីក្រសួងការពារជាតិអង់គ្លេស លោក John Healey ប្រាប់សមាជិកសភាកាលពីសប្តាហ៍មុនថា សហរដ្ឋអាមេរិកត្រូវបានអនុញ្ញាតឱ្យប្រើប្រាស់មូលដ្ឋានទ័ពរបស់ចក្រភពអង់គ្លេសសម្រាប់វាយប្រហារការពារប្រឆាំងនឹងគោលដៅជាក់លាក់របស់អ៊ីរ៉ង់ រួមទាំងទីតាំងមីស៊ីល និងសមត្ថភាពគំរាមកំហែងដល់ការដឹកជញ្ជូនឆ្លងកាត់ច្រកសមុទ្រ Hormuz៕

ប្រែសម្រួល៖ ណឺ មិនា