ផ្ទះបុរាណមួយ​កន្លែង​កែច្នៃ​ធ្វើ​ជា​រីសត យក​ម្ហូប​អត្តសញ្ញាណ​​ខេត្ត​បាត់ដំបង​ទាក់ទាញទេសចរ​មកកម្សាន្ត

ផ្ទះបុរាណមួយកន្លែងបានក្លាយជាប្រភពចំណូលដ៏មានសក្តានុពល ក្រោយម្ចាស់ផ្ទះបានកែច្នៃធ្វើជា​រីសតមានទីតាំងស្ថិតក្នុងភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង។

ផ្ទះបុរាណ​នេះបច្ចុប្បន្ន​ត្រូវ​បាន​កែច្នៃ​ជា​រីសត​សម្រាប់​ទទួលភ្ញៀវទេសចរ​គ្រប់​ជាតិសាសន៍មកកម្សាន្ត​និង​ស្នាក់នៅ។

លោក គឹម នូ ម្ចាស់រីសតមេហ្សុងវត្តគរ បានឲ្យដឹងថា ក្រោយពីលោកប្រែក្លាយជារីសតផ្ទះបុរាណនេះ បាន​ទាញ​​ចំណាប់​អារម្មណ៍​​ភ្ញៀវ​មកកម្សាន្តកើនឡើង​គួរឲ្យកត់សម្គាល់ ខណះម្ហូបអាហារជា​ស្នាដៃអ្នកខេត្តបាត់ដំបង​ត្រូវ​បានលោករក្សាធាតុដើមពីបុរាណលើ​ទម្រង់​ម្ហូប​​គ្រប់មុខគ្រប់រសជាតិ។

បុណ្យចូលឆ្នាំនៅពេល​ខាងមុខ លោក​រំពឹងនឹង​ទទួលបានកំណើនភ្ញៀវ​មក​កម្សាន្តនិងស្នាក់នៅ ខណៈ​តម្លៃ​សេវាកម្ម​ទាំង​ស្នាក់នៅ និង​ម្ហូបអាហារ​លោកអះអាង​ថា​​មិន​​ឡើងថ្លៃ​​នោះឡើយ។

មន្ត្រីនៃមន្ទីរទេសចរណ៍ខេត្តបាត់ដំបង លោក ហម អរុណ បានឲ្យដឹងថា ដើម្បីឲ្យមានចំណាប់អារម្មណ៍​ដល់ភ្ញៀវទេសចរទាំងក្នុងនិងក្រៅស្រុកឲ្យកាន់តែមានទំនុកចិត្ត អាជ្ញាធរខេត្ត​​បានយកចិត្តទុកដាក់ពង្រឹងលើកត្តាចំបងចំនួន២ ក្នុងនោះមានសន្តិសុខ និងអនាម័យ។

លោករំពឹងថា ឆ្នាំនេះខេត្តបាត់ដំបងនឹងទទួល​បាន​កំណើនភ្ញៀវ​ទេសចរមកកម្សាន្ត​កាន់តែច្រើន​​ តាមគោលដៅទេសចរណ៍​ទាំង​នៅក្នុងក្រុង និងតាមបណ្តាស្រុកមួយមួយចំនួន ខណៈម្ហូបអាហារ នំចំណីក៏​ជាសក្តានុពលរបស់​ខេត្ត​បាត់ដំបង៕

អត្ថបទ÷សៅ សារិទ្ធ