រដ្ឋបាលរាជធានីភ្នំពេញ បែងចែករថយន្ត ២៥ គ្រឿង សម្រាប់ខេត្តក្រចេះ ក្នុងឱកាសបុណ្យចូលឆ្នាំ

រដ្ឋបាលរាជធានីភ្នំពេញ បានត្រៀមបែងចែករថយន្តចំនួន ២៥ គ្រឿង សម្រាប់ខ្សែរត់ពីភ្នំពេញ-ក្រចេះ និងក្រចេះ-ភ្នំពេញ ចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៦ ដើម្បីជួយសម្រួលដល់ការចំណាយ និងបង្កលក្ខណៈងាយស្រួលដល់បងប្អូនប្រជាពលរដ្ឋក្នុងការធ្វើដំណើរទៅលេងស្រុកកំណើត ជួបជុំក្រុមគ្រួសារក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលខេត្តក្រចេះ បានចេញសេចក្តីជូនដំណឹងដល់សាធារណជនឲ្យបានជ្រាបថា រាជរដ្ឋាភិបាល បានដាក់ចេញនូវគោលនយោបាយនៃការធ្វើដំណើរការសេវាដឹកជញ្ជូនសាធារណៈដោយឥតគិតថ្លៃ។

តាមការឲ្យដឹងរបស់រដ្ឋបាលខេត្តក្រចេះ នៅថ្ងៃទី១០ ខែមេសា ឆ្នាំ២០២៦ ម្សិលម៉ិញនេះថា កិច្ចសហការនេះធ្វើឡើងជាពេលវេលាចេញដំណើរចាប់ពីម៉ោង ៦៖៣០នាទីព្រឹក រហូតដល់ម៉ោង ១១៖៣០នាទីព្រឹក ពីចំណតរថយន្តក្រុង រង្វង់មូលគួចកាណុង ក្នុងរាជធានីភ្នំពេញ ឆ្ពោះទៅចំណតនៅមុខមន្ទីរវប្បធម៌ និងវិចិត្រសិល្បៈខេត្តក្រចេះ។

លោក វ៉ា ថន អភិបាលនៃគណៈអភិបាលខេត្តក្រចេះ បានអំពាវនាវដល់បងប្អូនប្រជាពលរដ្ឋ មកប្រើប្រាស់សេវាដឹកជញ្ជូនសាធារណៈនេះឱ្យបានច្រើនកុះករ ដើម្បីធានាបាននូវការធ្វើដំណើរប្រកបដោយសុវត្ថិភាព ផាសុខភាព និងកាត់បន្ថយការចំណាយបានមួយកម្រិតធំ។

ការផ្តល់សេវារថយន្តក្រុងឥតគិតថ្លៃនេះ គឺជាផ្នែកមួយនៃយុទ្ធនាការរបស់រាជរដ្ឋាភិបាល តាមរយៈរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) ដែលបានបញ្ចេញរថយន្តសរុបចំនួន ៦០០ គ្រឿង សម្រាប់បម្រើសេវាដឹកជញ្ជូនទូទាំងប្រទេស ក្នុងឱកាសបុណ្យចូលឆ្នាំខ្មែរឆ្នាំនេះ៕

អត្ថបទ៖ ប្រុញ វិធិន