ព័ត៌មានអន្ដរជាតិ

មន្ត្រីជាន់ខ្ពស់អ៊ីរ៉ង់ អះអាងថា សន្និធិមីស៊ីលនិងដ្រូនដែលអ៊ីរ៉ង់មាន អាចប្រើច្រើនឆ្នាំទៀត

បានផុស

២ ខែ មុន

នៅ

ថ្ងៃព្រហស្បតិ៍ ៣០ មេសា ២០២៦

ដោយ

មន្រ្តីជាន់ខ្ពស់អ៊ីរ៉ង់ម្នាក់ បានលើកឡើងថា សន្និធិ (stock) នៃមីស៊ីលនិងយន្តហោះគ្មានមនុស្សបើក (ដ្រូន) របស់អ៊ីរ៉ង់គឺគ្រប់គ្រាន់ ដើម្បីទ្រទ្រង់សង្គ្រាមច្រើនឆ្នាំទៅមុខទៀត ប្រសិនបើមានសង្រ្គាមថ្មីកើតឡើង។ នេះបើតាមការបញ្ជាក់របស់សមាជិកសភាជាន់ខ្ពស់មួយរូបថ្លែងក្នុងបទសម្ភាសន៍ជាមួយទីភ្នាក់ងារសារព័ត៌មានអ៊ីរ៉ង់ Tasnim នៅថ្ងៃពុធ និងចុះផ្សាយបន្តដោយសារព័ត៌មានមជ្ឈិមបូព៌ា MEMO កាលពីថ្ងៃទី២៩ ខែមេសា ឆ្នាំ២០២៦ ។

លោក Alaeddin Boroujerdi អនុប្រធានគណៈកម្មការសន្តិសុខជាតិនិងគោលនយោបាយការបរទេសរបស់សភាអ៊ីរ៉ង់ និយាយថា៖ « ទីក្រុងតេហេរ៉ង់មិនទាន់បង្ហាញពីសមត្ថភាពពេញលេញរបស់ខ្លួននៅឡើយទេ។ យើងមិនទាន់បានបង្ហាញសន្លឹកបៀថ្មីរបស់យើងនៅឡើយទេ»។

លោក Alaeddin Boroujerdi អនុប្រធានគណៈកម្មការសន្តិសុខជាតិអ៊ីរ៉ង់។ រូបភាព៖ TNR

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Boroujerdi បានច្រានចោលនូវអ្វីដែលពណ៌នាថា ជាការបិទផ្លូវទឹករបស់កងទ័ពជើងទឹកអាមេរិក ដោយហៅ ទង្វើនេះថា «គ្មានប្រសិទ្ធភាព» ហើយ អះអាងថា នាវាប្រហែល ១២០គ្រឿង កំពុងរង់ចាំនៅជិតច្រកសមុទ្រ Hormuz សម្រាប់ដឹកជញ្ជូនឆ្លងកាត់ផ្លូវទឹកនេះ។

លោក បន្ថែមថា៖ « នាវាអ៊ីរ៉ង់ជាច្រើនកំពុងបន្តប្រតិបត្តិការ ដោយគ្មានការអន្តរាគមន៍ពីកងកម្លាំងអាមេរិកទេ។ អ៊ីរ៉ង់នឹងមិនដកថយពីអ្វីដែលជាសិទ្ធិអធិបតេយ្យភាពរបស់ខ្លួនលើច្រកសមុទ្រ Hormuz ទេ។ រឿងទាំងអស់នេះនឹងត្រូវបន្តនៅក្នុងការចរចា»។

ដោយឡែក លោក Hamad Akbarzadeh ជំនួយការនយោបាយរបស់មេបញ្ជាការកងទ័ពជើងទឹកនៃកងឆ្មាំបដិវត្តន៍អ៊ីរ៉ង់ (IRGC) លើកឡើងថា កងកម្លាំងជើងទឹកនឹងប្រើប្រាស់សមត្ថភាពថ្មី ក្នុងករណីមានសកម្មភាពយោធាសហរដ្ឋអាមេរិកប្រឆាំងនឹងប្រទេសខ្លួន។

ថ្លែងនៅក្នុងពិធីជួបជុំសាធារណៈមួយនៅទីក្រុង Minab ភាគខាងត្បូងកាលពីថ្ងៃអង្គារ លោកព្រមានថា៖ « ប្រសិនបើសហរដ្ឋអាមេរិកចាត់វិធានការយោធា នោះកងទ័ពជើងទឹក IRGC នឹងប្រើប្រាស់ប្រព័ន្ធកំណត់គោលដៅកម្រិតខ្ពស់និងសមត្ថភាពប្រតិបត្តិការថ្មី។ សមត្ថភាពបែបនេះអាចត្រូវបានប្រើប្រឆាំងនឹងនាវាចម្បាំងធំៗនៅក្នុងតំបន់»។

គួរបញ្ជាក់ថា សហរដ្ឋអាមេរិកនិងអ៊ីស្រាអែល ចាប់ផ្តើមការវាយលុករួមគ្នាប្រឆាំងនឹងអ៊ីរ៉ង់នៅថ្ងៃទី២៨ ខែកុម្ភៈ ជំរុញឱ្យទីក្រុងតេហេរ៉ង់ឆ្លើយតបដោយការវាយប្រហារលើទ្រព្យសម្បត្តិយោធាអាមេរិកនៅទូទាំងតំបន់ឈូងសមុទ្រ។

មិនតែប៉ុណ្ណោះ បទឈប់បាញ់មួយត្រូវបានប្រកាសនៅថ្ងៃទី៨ ខែមេសា តាមរយៈការសម្របសម្រួលរបស់ប៉ាគីស្ថាន បន្ទាប់មកដោយការចរចាដែលរៀបចំនៅទីក្រុងអ៊ីស្លាម៉ាបាដនៅថ្ងៃទី១១-១២ ខែមេសា ប៉ុន្តែការចរចានេះបានបញ្ចប់ដោយគ្មានកិច្ចព្រមព្រៀងណាមួយឡើយ៕

ប្រែសម្រួល៖ ណឺ មិនា