សេដ្ឋកិច្ច

ចំណូលលក់សំបុត្រចូលទស្សនាអង្គរ បានជាង ១៥ លានដុល្លារ នៅក្នុងរយៈពេល ៤ ខែ ឆ្នាំនេះ

បានផុស

១ ខែ មុន

នៅ

ថ្ងៃចន្ទ ៤ ឧសភា ២០២៦

ដោយ

ភ្ញៀវទេសចរអន្តរជាតិចំនួនជាង ៣ សែននាក់ (៣២២០០៤) បានទិញសំបុត្រចូលទស្សនារមណីយដ្ឋានអង្គរនៅក្នុងរយៈពេល ៤ ខែ (មករា-មេសា) ២០២៦ ដែលនាំឱ្យកម្ពុជារកចំណូលបានជាង ១៥ លានដុល្លារ (១៥ ៤៩៧ ៣៣៨) ធ្លាក់ចុះ ៣០,២២% ធៀបនឹងរយៈពេលដូចគ្នា នៅក្នុងឆ្នាំ ២០២៥។ នេះបើយោងតាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃពុធ ០១ ឧសភា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រឹះស្ថានអង្គរបញ្ជាក់ថា គិតត្រឹមតែមួយខែមេសា ២០២៦ មានភ្ញៀវទេសចរចំនួន ៥១ ០៩៣ នាក់ បានទិញសំបុត្រចូលទស្សនារមណីយដ្ឋានអង្គរ ធ្លាក់ចុះជាង ៣៣% និងរកចំណូលបានជាង ២,៣៩ លានដុល្លារ ធ្លាក់ចុះ ៣១,៤២% ធៀបនឹងខែមេសាឆ្នាំមុន។

លោក ខៀវ ធី ប្រធានសមាគមមគ្គុទ្ទេសក៍អង្គរខេត្តសៀមរាប យល់ឃើញថា បញ្ហាសង្គ្រាមព្រំដែនកម្ពុជា-ថៃ និងការបារម្ភពីការឆបោកអនឡាញបានធ្វើឱ្យភ្ញៀវទេសចរចូលមកទស្សនាខេត្តសៀមរាបធ្លាក់ចុះ។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) ប្រាប់កម្ពុជាថ្មីថា កម្ពុជារងសម្ពាធធ្ងន់ធ្ងរកាលពីឆ្នាំមុន បន្ទាប់ពីជំងឺកូវីដ១៩ ដោយសារការចោទប្រកាន់ពីការឆបោកអនឡាញ និងការឈ្លានពានពីប្រទេសថៃ។

លោក ធួន ស៊ីណាន បញ្ជាក់ថា៖ «ភូមិសាស្ត្រនយោបាយកំពុងកើតមានឡើងនៅលើពិភពលោក ពិភពលោក អ្វីក៏អាចកើតមានឡើងគ្រប់ពេលវេលា យើងអត់ដឹងថា តើថ្ងៃស្អែកមានអ្វីកើតឡើង»។

យោងតាមគ្រឹះស្ថានអង្គរ នៅឆ្នាំ ២០២៥ កម្ពុជារកចំណូលបានជិត ៤៥ លានដុល្លារ ពីការលក់សបុត្រចូលទស្សនារមណីយដ្ឋានអង្គរ ធ្លាក់ចុះ ៦,៥១% ប្រៀបធៀបនឹងឆ្នាំ ២០២៤។

នៅឆ្នាំ ២០២៥ កម្ពុជាទទួលបានភ្ញៀវទេសចរអន្តរជាតិចំនួន ៥,៥៧ លាននាក់ ធ្លាក់ចុះ ១៦,៩% ប្រៀបធៀបនឹងឆ្នាំ ២០២៤ និងទេសចរជាតិប្រមាណ ២៥ លាននាក់ ខណៈចំណូលទេសចរណ៍សម្រេចបានប្រមាណ ៣,៧ ពាន់លានដុល្លារ កើន ៣%៕

អត្ថបទ៖ ឡេង ដេត

Related Topics:ភ្ញៀវទេសចរ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា