សម្តេចប៉ាប រិះគន់​ការបង្កើនកញ្ចប់ថវិកាយោធារបស់អឺរ៉ុប ថា «ក្បត់នឹងការទូត»​​

តាមការចេញផ្សាយពីសារព័ត៌មាន Reuters សម្តេចប៉ាបលីអូ ទី១៤ កាលពីថ្ងៃព្រហស្បតិ៍ ទី១៤ ខែឧសភា បានរិះគន់យ៉ាងខ្លាំងចំពោះការកើនឡើងនៃការចំណាយលើវិស័យយោធារបស់បណ្តាប្រទេសនៅអឺរ៉ុប ដោយព្រមានថា ការបំពាក់អាវុធឡើងវិញគឺជាការក្បត់នឹងកិច្ចខិតខំប្រឹងប្រែងការទូត និងកំពុងជំរុញឲ្យមានភាពតានតឹង​​និង​ការ​រត់ប្រណាំង​សព្វាវុធ​ជាថ្មី​​នៅក្នុងពិភពលោកមួយដែលកំពុងរងការ «បំផ្លិចបំផ្លាញដោយសារតែសង្គ្រាម» រួចទៅហើយនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមវិទ្យាស្ថានស្រាវជ្រាវសន្តិភាពអន្តរជាតិស្តុកខុម (SIPRI) ដែលបានចេញផ្សាយកាលពីខែមុន ការចំណាយ​លើ​វិស័យយោធានៅទូទាំងទ្វីបអឺរ៉ុបបានកើនឡើង ១៤% ក្នុងឆ្នាំ២០២៥ ដែល​មាន​តម្លៃ​​ទឹក​ប្រាក់​រហូតដល់ ៨៦៤ ពាន់លានដុល្លារ។ វិទ្យាស្ថានបានភ្ជាប់ការហក់ឡើងខ្លាំងនេះ ទៅនឹងជម្លោះនៅក្នុងប្រទេសអ៊ុយក្រែន ភាពតានតឹងជាមួយរុស្ស៊ី និងសម្ពាធកាន់តែខ្លាំងឡើងពីអាមេរិក ក្នុងការបែងចែកបន្ទុកការងារបន្ថែមនៅក្នុងអង្គការណាតូ។

សម្ដេចប៉ាប បានវែកញែកថា គោលនយោបាយបែបនេះមិនគួរត្រូវបានពិពណ៌នាថា ជាកិច្ចការពារជាតិឡើយ ប៉ុន្តែវាគឺជាការបំពាក់អាវុធឡើងវិញដ៏មានគ្រោះថ្នាក់។ នៅក្នុងការថ្លែងទៅកាន់ក្រុមនិស្សិតនៅសាកលវិទ្យាល័យ Sapienza ក្នុងទីក្រុងរ៉ូមកាលពីថ្ងៃព្រហស្បតិ៍ ព្រះប្រមុខសាសនា​គ្រិស្ត​ បានមានបន្ទូលថា យុវជនជំនាន់ក្រោយកំពុងសាកសួរមនុស្សជំនាន់មុន ថា «តើពិភពលោកបែបណាដែលពួកគេនឹងបន្សល់ទុកឲ្យ?»។

សម្តេចប៉ាប បានដាស់តឿននិស្សិតប្រមាណ ១១០,០០០ នាក់នៅសាកលវិទ្យាល័យនោះ កុំឲ្យ «បិទខ្ទប់ខ្លួនឯងនៅក្នុងមនោគមវិជ្ជា និងព្រំដែនជាតិឡើយ» ដោយទ្រង់អំពាវនាវថា៖ «សូមរួមដំណើរជាមួយខ្ញុំ និងជាមួយបងប្អូនប្រុសស្រីជាច្រើនទៀត ដើម្បីក្លាយជាអ្នកកសាងសន្តិភាពដ៏ពិតប្រាកដ»។

មេដឹកនាំបុរីវ៉ាទីកង់បានមានបន្ទូលទៀតថា «ពិភពលោកមួយដែលគួរឲ្យស្តាយកំពុងត្រូវបានបំផ្លិចបំផ្លាញដោយសារសង្គ្រាម ក្នុងឆ្នាំកន្លងទៅនេះ កំណើននៃការចំណាយលើវិស័យយោធានៅទូទាំងពិភពលោក ជាពិសេសនៅអឺរ៉ុប គឺមានទំហំធំធេងណាស់។ ចូរកុំហៅការបំពាក់អាវុធឡើងវិញដែលធ្វើឲ្យកើនឡើងនូវភាពតានតឹង និងអសន្តិសុខ ធ្វើឲ្យខ្សត់ខ្សោយការវិនិយោគលើវិស័យអប់រំ និងសុខាភិបាល បំផ្លាញទំនុកចិត្តលើប្រព័ន្ធការទូត និងធ្វើឲ្យឥស្សរជនដែលមិនខ្វល់ខ្វាយពីផលប្រយោជន៍រួមមានបាននោះថា ជាកិច្ចការពារជាតិឡើយ»។

មិនតែប៉ុណ្ណោះ ទ្រង់ក៏បានព្រមានផងដែរអំពីការកើនឡើងនៃការប្រើប្រាស់បញ្ញាសិប្បនិម្មិត (AI) នៅក្នុងសមរភូមិសង្គ្រាម ដោយបានលើកឡើងថា ជម្លោះនៅក្នុងប្រទេសអ៊ុយក្រែន, តំបន់ហ្គាហ្សា, លីបង់ និងប្រទេសអ៊ីរ៉ង់ គឺជាភស្តុតាងដែលបង្ហាញពី «ការវិវត្តដ៏អមនុស្សធម៌នៃទំនាក់ទំនងរវាងសង្គ្រាម និងបច្ចេកវិទ្យាថ្មីៗ នៅក្នុងវដ្តនៃការបំផ្លិចបំផ្លាញ»៕

អត្ថបទ៖ សាង ស្រីល័ក្ខ

សម្តេចប៉ាប Leo ខកចិត្តខ្លាំង​​ក្នុង​សង្គ្រាម​អាមេរិក-អ៊ីរ៉ង់ ដែល​ចរចាមិនត្រូវគ្នា​​​​​