អាមេរិក ដកឈ្មោះអ្នកជំនាញអង្គការសហប្រជាជាតិ លោកស្រី Francesca ចេញពីបញ្ជីទណ្ឌកម្ម

សហរដ្ឋអាមេរិកបានដកឈ្មោះ លោកស្រី Francesca Albanese ដែលជាអ្នកជំនាញអង្គការសហប្រជាជាតិ (UN) ទទួលបន្ទុកកិច្ចការដែនដីប៉ាលេស្ទីន ចេញពីបញ្ជី​ឈ្មោះ​បុគ្គលរងទណ្ឌកម្ម​របស់​សហរដ្ឋអាមេរិក​​។ យោងតាមគេហទំព័ររបស់ក្រសួងហិរញ្ញវត្ថុសហរដ្ឋអាមេរិក។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន reuters បាន​ចេញ​ផ្សាយ​ថា ការដកឈ្មោះនេះ បានធ្វើឡើងមួយសប្តាហ៍ បន្ទាប់ពីចៅក្រមសហព័ន្ធម្នាក់ បានចេញដីកាបង្កក​ការ​ដាក់​ទណ្ឌកម្ម​​ដែលសម្រេច​ដោយ​​រដ្ឋបាល​ត្រាំ​ជាបណ្តោះអាសន្ន ដោយរកឃើញថា រដ្ឋបាលរបស់លោក ត្រាំ ហាក់ដូចជាបានរំលោភលើសិទ្ធិសេរីភាពក្នុងការបញ្ចេញមតិរបស់ លោកស្រី តាមរយៈការដាក់វិធានការទណ្ឌកម្មទាំងនេះ ក្រោយពេលដែលលោកស្រីបានរិះគន់សង្រ្គាមរបស់ប្រទេសអ៊ីស្រាអែល ដែលជាសម្ព័ន្ធមិត្តរបស់អាមេរិកនៅក្នុងតំបន់ហ្គាហ្សា។

លោកស្រី Albanese គឺជាមេធាវីជនជាតិអ៊ីតាលី និងជាអ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកដែនដីប៉ាលេស្ទីន ដែលស្ថិតក្រោមការកាន់កាប់របស់អ៊ីស្រាអែល។ នៅក្នុងតួនាទីនោះ គាត់បានផ្តល់អនុសាសន៍ឲ្យតុលាការព្រហ្មទណ្ឌអន្តរជាតិ (ICC) ធ្វើការចោទប្រកាន់ និងកាត់ទោសពីបទឧក្រិដ្ឋកម្មសង្រ្គាម លើជនជាតិអ៊ីស្រាអែល និងជនជាតិអាមេរិក។

លោកស្រីក៏បានរៀបចំបាយការណ៍មួយ ដោយចោទប្រកាន់ក្រុមហ៊ុនធំៗរបស់អាមេរិកថា មានការពាក់ព័ន្ធនៅក្នុងអ្វីដែលលោកស្រីហៅថា «យុទ្ធនាការប្រល័យពូជសាសន៍កំពុងបន្តរបស់អ៊ីស្រាអែលនៅក្នុងតំបន់ហ្គាហ្សា»។

យ៉ាងណាមិញ អាមេរិកបានដាក់ទណ្ឌកម្មលើលោកស្រី Albanese កាលពីខែកក្កដា ឆ្នាំ២០២៥ ចំពោះអ្វីដែលអាមេរិកអះអាងថា ជាកិច្ចប្រឹងប្រែងរបស់លោកស្រី ក្នុងការជំរុញឲ្យតុលាការព្រហ្មទណ្ឌអន្តរជាតិចាត់វិធានការប្រឆាំងនឹងមន្ត្រី ក្រុមហ៊ុន និងនាយកប្រតិបត្តិរបស់អាមេរិក និងអ៊ីស្រាអែល។ ទណ្ឌកម្មទាំងនោះបានហាមឃាត់មិនឲ្យគាត់ចូលមកកាន់ទឹកដីអាមេរិក និងធ្វើប្រតិបត្តិការធនាគារនៅក្នុងប្រទេសនេះឡើយ៕

អត្ថបទ៖ សាង ស្រីល័ក្ខ

មន្ត្រីអ៊ីរ៉ង់ អះអាងថា មេដឹកនាំ​អ៊ីរ៉ង់ Mojtaba Khamenei មិនរងរបួសធ្ងន់ធ្ងរ ដូច​​ពាក្យ​ចចាមអារ៉ាមទេ​​