កីឡា

សិស្សប្អូន សួន ចាន់ណារ៉ូ ម្នាក់នេះអនាគតអាចនឹងល្បីមិនចាញ់រៀមច្បងឡើយកម្ពស់ក៏ខ្ពស់ទម្រង់លេងក៏ល្អ

បានផុស

៣៣ វិនាទី មុន

នៅ

ថ្ងៃចន្ទ ១៥ មិថុនា ២០២៦

ដោយ

យុវជន គុជ រស្មី នៅក្លឹបស្នងការខេត្តស្វាយរៀង និងត្រូវជាសិស្សប្អូន សួន ចាន់ណារ៉ូ ទើបហ្វឹកហាត់បាល់ទះបានត្រឹម ២ឆ្នាំនោះទេ ប៉ុន្តែសមត្ថភាព បច្ចេកទេសលេងមិនធម្មតាទើបជួយសកលវិទ្យាល័យស្វាយរៀងឲ្យឈ្នះមេដាយមាស ខណៈពេលអនាគតអាចនឹងល្បីមិនចាញ់រៀមច្បងឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ គុជ រស្មី

កីឡាករ គុជ រស្មី បានឲ្យដឹងថា នេះជាលើកទី១ ដែលរូបគេបានពាក់មេដាយមាស និងជាលើកដំបូងដូចគ្នាដែលបានចូលរួមការប្រកួតក្នុងរយៈពេល ២ឆ្នាំដែលចូលរួមហ្វឹកហាត់បាល់ទះមកនេះ។ ដោយសារតែការហ្វឹកហាត់បានល្អ និងមានរយៈពេលយូរដែរហើយនោះធ្វើឲ្យរូបគេមិនមានការភ័យអ្វីទេអំឡុងការប្រកួត។

គុជ រស្មី ពេលប្រកួតផ្ដាច់ព្រ័ត្រ

យុវជនវ័យ ១៨ឆ្នាំរូបនេះបន្ថែមទៀតថា ខ្លួនជាកីឡាករនៅក្លឹបបាល់ទះស្នងការខេត្តស្វាយរៀង និងបានហ្វឹកហាត់រយៈពេល ២ឆ្នាំមកហើយ។ រូបគេបានហ្វឹកហាត់ជាមួយរៀមច្បង សួន ចាន់ណារ៉ូ ប្រហែលជិតមួយឆ្នាំផងដែរ និងបានរៀនបច្ចេកទេសល្អៗជាច្រើន។

ដៃប៉ះខាងលើបង្ហើបពីក្ដីស្រមៃក្នុងអាជីពបាល់ទះនេះថា នៅថ្ងៃអនាគតចង់លេងឲ្យឈុតធំស្នងការខេត្តស្វាយរៀង និងចង់ជាប់ជាកីឡាករជម្រើសជាតិកម្ពុជាប្រសិនបើអាចធ្វើបាន។ រូបគេស្រឡាញ់ និងតែងតែហាត់រៀនបច្ចេកទេសតាមរៀមច្បង សួន ចាន់ណារ៉ូ នាពេលកន្លងមក។

កីឡាករ គុជ រស្មី

បញ្ជាក់ដែរថា គុជ រស្មី ទើបតែដណ្ដើមបានមេដាយមាស ១គ្រឿងជូនសកលវិទ្យាល័យស្វាយរៀង បន្ទាប់ពីយកឈ្នះលើសកលវិទ្យាល័យ ហេង សំរិន ត្បូងឃ្មុំ នៅវគ្គផ្ដាច់ព្រ័ត្រកីឡាឧត្តមសិក្សា ឆ្នាំ២០២៦។ រូបគេជាទើបតែអាយុ ១៨ឆ្នាំប៉ុណ្ណោះ តែមានកម្ពស់ដល់ទៅ ១.៨៧ Cm ទៅហើយ។ កូនអ្នកស្វាយរៀងរូបនេះមានសមត្ថភាពល្អមែនតាមរយៈការបោះបាល់ច្បាស់ៗឲ្យស្មាត់ និងមានភាពឆ្លាតវៃ ចេះបត់បែនគ្រប់ស្ថានការណ៍ប្រកួតតែម្ដងនៅក្នុងការប្រកួតកីឡាឧត្តមសិក្សានេះ៕