អាមេរិក នឹងបញ្ចេញ​លុយបង្កកជិត ២៤ពាន់លានដុល្លារ ឱ្យអ៊ីរ៉ង់វិញ ក្រោមលក្ខខណ្ឌចរចាសន្តិភាព

ទីភ្នាក់ងារព័ត៌មានរដ្ឋអ៊ីរ៉ង់ Mehr បានចេញផ្សាយថា នៅក្នុងសេចក្តីព្រាងអនុស្សរណៈនៃការយោគយល់គ្នា (MoU) រវាងសហរដ្ឋអាមេរិក និងអ៊ីរ៉ង់ មានចំណុចមួយ​ ដែល​ចែងយ៉ាងច្បាស់លាស់អំពីការបញ្ចេញ​ទ្រព្យសម្បត្តិ និងសាច់ប្រាក់រាប់ពាន់លានដុល្លាររបស់អ៊ីរ៉ង់ ដែលត្រូវបានបង្កកទុកកន្លងមក។

យោងតាមរបាយការណ៍ដដែល ដែល​ត្រូវ​បាន​ចុះផ្សាយ​បន្ត​ដោយសារព័ត៌មាន Al Jazeera នា​ថ្ងៃទី​១៥ ខែ​មិថុនា ឆ្នាំ​២០២៦ ឯកសារ​នៃ​កិច្ចព្រមព្រៀងនោះ តម្រូវឱ្យមានការបញ្ចេញ​ប្រាក់ដែលត្រូវបានបង្កកទុករបស់អ៊ីរ៉ង់ចំនួន ២៤ពាន់លានដុល្លារ មកវិញជាបណ្តើរៗ ក្នុងអំឡុងពេលចរចា ៦០ថ្ងៃ បន្ទាប់ពីអនុស្សរណៈចូលជាធរមាន។ អ្វីដែលរឹតតែពិសេសនោះ គឺសាច់ប្រាក់ចំនួនពាក់កណ្តាល ពោលគឺប្រហែល ១២ពាន់លានដុល្លារ នឹងត្រូវប្រគល់ឱ្យ​អ៊ីរ៉ង់ភ្លាមៗ មុនពេលដំណើរការចរចាផ្លូវការចាប់ផ្តើម។

យ៉ាងណាមិញ រហូតមកទល់ពេលនេះ ខ្លឹមសារនៃអនុស្សរណៈដែលមាន ១៤ចំណុចនេះ មិនទាន់ត្រូវបានរដ្ឋាភិបាលទីក្រុងវ៉ាស៊ីនតោន ឬទីក្រុងតេហេរ៉ង់ ចេញមុខប្រកាសទទួលស្គាល់ជាផ្លូវការនៅឡើយទេ។

គួរ​រំលឹក​ថា ក្រោយផ្ទុះ​សង្គ្រាម​ជិត​៤ខែ អាមេរិក និងអ៊ីរ៉ង់ បានប្រកាសពីកិច្ចព្រមព្រៀងសន្តិភាពជាប្រវត្តិសាស្ត្រ ដែល​ពិធីចុះហត្ថលេខាជាផ្លូវការ គ្រោងធ្វើឡើងនៅថ្ងៃសុក្រ សប្ដាហ៍នេះ ក្នុងប្រទេសស្វីស។ ទន្ទឹមនោះ ប្រទេស​មហាអំណាចអឺរ៉ុបទាំង៤ ឬហៅកាត់ថា E4 ដែលរួមមាន ចក្រភពអង់គ្លេស បារាំង អាល្លឺម៉ង់ និងអ៊ីតាលី ក៏​បានចេញមុខប្រកាសដែរ​ថា ពួកគេបានត្រៀមលក្ខណៈរួចជាស្រេច ក្នុងការដកទណ្ឌកម្មសេដ្ឋកិច្ចចេញពីប្រទេសអ៊ីរ៉ង់វិញ ខណៈ​​បញ្ហា​កម្មវិធីនុយក្លេអ៊ែរ និង​ការ​ចម្រាញ់សារធាតុអ៊ុយរ៉ាញ៉ូម នឹង​ត្រូវ​​ដោះស្រាយ​នៅក្នុងដំណាក់កាលទីពីរនៃកិច្ចព្រមព្រៀង​៕

ប្រែសម្រួល៖ ឈាង