ព័ត៌មានអន្ដរជាតិ

ហ្វាំងឡង់ដែលជាសមាជិកណាតូ នឹងទិញគ្រាប់បែកបំពាក់លើយន្តហោះចម្បាំង F-35 ពីអាមេរិក

បានផុស

២១ វិនាទី មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

ក្រោយមានការអំពាវនាវពីសហរដ្ឋអាមេរិក ឱ្យអឺរ៉ុបបង្កើនសមត្ថភាពលើវិស័យការពារជាតិ និងភាពមិនប្រាកដប្រជារបស់រុស្ស៊ីក្នុងការបញ្ចប់សង្គ្រាមនាពេលអនាគត សមាជិកណាតូមួយចំនួនបានធ្វើតាមសម្តី លោក ត្រាំ ដើម្បីធានាថា ប្រទេសរបស់ពួកគេគ្មានការគំរាមកំហែង។

នៅថ្ងៃព្រហស្បតិ៍នេះ ក្រសួងការពារជាតិប្រទេសជាប់មហាសមុទ្រអាត្លង់ទិកខាងជើង ហៅកាត់ថា «Nordic» លើកឡើងក្នុងសេចក្តីថ្លែងការណ៍មួយ ថា ប្រទេសហ្វាំងឡង់នឹងទិញគ្រាប់បែក GBU-53 SDB II ពីសហរដ្ឋអាមេរិកប្រើសម្រាប់យន្តហោះចម្បាំង F-35 ។

យោងតាមទីភ្នាក់ងារសារព័ត៌មានរ៉យទ័រ ផ្សាយថ្ងៃទី១៨ ខែមិថុនា ឆ្នាំ២០២៦ ការទិញនេះ គឺជាការបន្ថែមសមត្ថភាពវាយប្រហារពីលើអាកាសដល់កងទ័ពអាកាស F-35 របស់ប្រទេសហ្វាំងឡង់ដែលជាសមាជិកណាតូ និងបំពេញបន្ថែមលើការទិញយន្តហោះចម្បាំង F-35 ចំនួន ៦៤គ្រឿងពីក្រុមហ៊ុន Lockheed Martin ក្នុងតម្លៃ ៩.៤ប៊ីលានដុល្លារ។

គ្រាប់បែកសម្រាប់យន្តហោះចម្បាំង។ រូបភាព៖ T&P

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិហ្វាំងឡាំងថ្លែងក្នុងសេចក្តីថ្លែងការណ៍មួយថា គ្រាប់បែកម៉ាក GBU-53 SDB II គឺជាគ្រាប់បែកដែលរអិលជាក់លាក់ខ្ពស់ មានសមត្ថភាពអាចវាយប្រហារគោលដៅ កំពុងធ្វើចលនាក្នុងចម្ងាយមធ្យមនៅស្ថានភាពអាកាសធាតុមិនល្អ។

មិនតែប៉ុណ្ណោះ ទំហំដ៏តូចរបស់វាអនុញ្ញាតឱ្យគ្រាប់រំសេវ SDB II ច្រើនគ្រាប់ ដំណើរការដំណាលគ្នា នៅលើយន្តហោះ F-35 តែមួយ។

គួរបញ្ជាក់ថា គ្រាប់បែកទាំងនេះនឹងផលិតដោយក្រុមហ៊ុន Raytheon ជាអង្គភាពមួយរបស់ក្រុមហ៊ុនម៉ៅការវិស័យការពារជាតិអាមេរិក RTX ។ កញ្ចប់នេះនឹងគ្របដណ្តប់លើគ្រឿងបន្លាស់ ឯកសារ ការដឹកជញ្ជូន ការបណ្តុះបណ្តាល ការជួសជុល និងសេវាកម្មគាំទ្រ។

រដ្ឋមន្ត្រីក្រសួងការពារជាតិហ្វាំងឡង់ លោក Antti Hakkanen និយាយថា ការទិញនេះតំណាងឱ្យសមត្ថភាពថ្មីមួយដែលពង្រឹងការការពារជាតិរបស់ប្រទេសហ្វាំងឡង់ក្នុងលក្ខខណ្ឌដ៏លំបាក។

គួរបញ្ជាក់ថា សមាជិកណាតូចាប់ផ្តើមបានបង្កើនសមត្ថភាពយោធា សព្វាវុធនិងសហការគ្នាជាថ្មី ដើម្បីធានាថាប្រទេសពួកគេមានសុវត្ថិភាពនិងគ្មានការគំរាមកំហែងពីសត្រូវ៕

សម្រួល៖ ណឺ មិនា